महाराष्ट्र राज्य माध्यमिक व उच्च माध्यमिक परीक्षा मंडळाने इयत्ता दहावी, बारावीच्या परिक्षार्थींसाठी परीक्षा ठिकाणी उपस्थितीबद्दल नियम जाहीर केले आहेत. हे नियम कठोर व विद्यार्थी अहिताचे असल्याची भूमिका अध्यापक भारतीने मांडली आहे. हे अन्यायकारक नियम त्वरित रद्द करावेत, अशी मागणी त्यांनी राज्य मंडळाकडे पत्रकाद्वारे केली आहे.
दैनंदिन प्रवासात दळण वळणाच्या साधनांची उपलब्धता, मानसिक वा शारीरिक, नैसर्गिक अडचणी आदी कारणांमुळे शहरी वा ग्रामीण परीक्षार्थींना परीक्षा केंद्रावर पोहचण्यास उशीर होऊ शकतो. ग्रामीण भागातील विद्यार्थी मोठ्या संख्येने प्रवास करून शहरात परीक्षांसाठी येत असतात. यामध्ये त्यांना काही अडचणींचा सामनाही करावा लागतो. त्यामुळे अशा जाचक निर्णयांमुळे विद्यार्थ्यांना परीक्षेस मुकावे लागू शकते, अशी भीती विद्यार्थ्यांकडून वर्तवण्यात येत आहे. त्यामुळे परीक्षार्थी विद्यार्थ्यांना परीक्षा केंद्रावर येण्यास काही कारणाने उशीर झाल्यास पूर्वीच्या नियमाप्रमाणे विद्यार्थ्यास पेपर लिहू द्यावा, अशी मागणी अध्यापक भारतीचे संस्थापक शरद शेजवळ, प्रा. विनोद पानसरे, पालक प्रतिनिधी वनिता सरोदे यांनी पत्रकाद्वारे केली आहे.
मोबाइल अॅप डाउनलोड करा आणि राहा अपडेट
