एअर डेक्कनकडून असुविधा
म. टा. खास प्रतिनिधी, नाशिक
नाशिकच्या विमानसेवेतील अडथळ्यांची शर्यत संपता संपत नसल्याचे स्पष्ट होत आहे. गुरुवारपासून विमानसेवेचे बुकिंग सुरू होणार असल्याचे जाहीर झाले. मात्र, एअर डेक्कनसह कुठल्याही वेबसाइटवर तिकीट बुकिंगची सेवा उपलब्ध नसल्याचे दिसून आले. त्यामुळे नाशिककरांमध्ये निराशेचे वातावरण आहे.
एअर डेक्कन कंपनीने २३ डिसेंबरपासून पुणे आणि मुंबई सेवा सुरू करण्याची घोषणा केली आहे, तसेच यासाठीचे ऑनलाइन बुकिंग कंपनीच्या वेबसाइटवर सुरू होईल. १४२० रुपयांपासून तिकिटाचे दर असतील. काही भाग्यवंतांना अवघ्या एक रुपयात तिकीट मिळेल, असेही कंपनीने जाहीर केले. विमानसेवेच्या वेळापत्रकाचीही घोषणा झाल्याने नाशिककरांनी या सेवेचा लाभ घेण्यासाठी सकारात्मक प्रतिसाद दिला. कंपनीच्या वेबसाइटवर दिवसभर नाशिककरांनी भेट दिली; पण तेथे कुठल्याही प्रकारची बुकिंग व्यवस्था सुरू झालेली नव्हती. ट्रॅव्हल बुकिंग करणाऱ्या अन्य वेबसाइटवरही काही जणांनी बुकिंगचा प्रयत्न केला; पण तोही निष्फळ ठरला. काही जणांनी ट्रॅव्हल एजंट्सशी संपर्क साधला, पण त्याचाही फायदा झाला नाही. त्यामुळे दिवसभर या बुकिंगच्या अनुपलब्धतेची चर्चा नाशिककरांमध्ये होती. हे बुकिंग नक्की कधी सुरू होईल, याची कुठलीही माहिती कंपनीने रात्री उशिरापर्यंत जाहीर केली नाही.
संपर्क क्रमांक नाही
एअर डेक्कनने त्यांच्या वेबसाइटवर तिकीट बुकिंग लवकरच, केवळ एवढीच माहिती पुरवली आहे. त्यावर कुठलाही संपर्क क्रमांक नसल्याने या संदर्भात संपर्क कुणाशी करावा, असा प्रश्न नाशिककरांना पडला. मात्र, समाधानकारक उत्तर कुठूनही मिळू शकले नाही.
लगेजचे नक्की काय?
१९ आसनी असलेल्या विमानाद्वारे सेवा मिळणार असली तरी या विमानात प्रवाशांना नक्की किती सामान नेता येईल, याची स्पष्टता झालेली नाही. हवाई वाहतूक क्षेत्रातील तज्ज्ञांच्या मते, केवळ हँडबॅग प्रवाशांना नेता येईल. त्यामुळे जे प्रवासी मुंबईहून पुढे प्रवास करणार आहेत, त्यांना सामान नेण्याची मोठी अडचण होणार आहे. त्यामुळे एअर डेक्कनने याबाबत लवकर खुलासा करावा, अशी मागणी नाशिककरांकडून होत आहे.
माहिती इतर साइटवरही नाही
एअर डेक्कनच्या सेवेसाठी केवळ त्यांच्याच वेबसाइटवर नाही, तर इतरही ट्रॅव्हल बुकिंग साइटवर बुकिंगची कुठलीच सुविधा नसल्याचे दिसून आले. शहरात अनेक जण विविध ट्रॅव्हल बुकिंग साइटचा वापर करतात. मात्र, नाशिक, पुणे, मुंबई, जळगाव या मार्गांसाठी बुकिंगचा कुठलाही पर्याय या वेबसाइटवर आढळून आला नाही. त्यामुळे नाशिककरांनी चिंता व्यक्त केली आहे.
ट्रॅव्हल एजंटकडे नोंदणी
शहरात ट्रॅव्हल एजंट्स असोसिएशनचे शेकडो सदस्य आहेत. ऑनलाइन तिकीट बुकिंगसाठी अडचणी येत असल्याने अखेर काही नाशिककरांनी या असोसिएशनच्या सदस्यांकडे बुकिंगची नोंदणी केली आहे. शहरातील उद्योजक, डॉक्टर, वकील, व्यावसायिकांनी पुणे आणि मुंबई या सेवांसाठी बुकिंगला पसंती दर्शविल्याचे असोसिएशनच्या पदाधिकाऱ्यांनी सांगितले आहे.
एअर डेक्कनच्या वेबसाइटवर बुकिंग सुरू झालेले नाही. त्यामुळे दिवसभरात आमच्याकडे चौकशीसाठी भरपूर फोन आले. मात्र, या बुकिंगबाबत आम्हाला काहीही माहिती मिळालेली नाही.
- दत्ता भालेराव, अध्यक्ष, तान
एअर डेक्कनच्या प्रतिनिधींशी संपर्क साधला. ऑनलाइन बुकिंगसंदर्भात आमचे काम सुरू असून, लवकरच सुविधा उपलब्ध होईल, असे त्यांनी सांगितले आहे.
- हेमंत गोडसे, खासदार
विमानसेवेचे तिकीट बुकिंग करण्यासाठी कंपनीच्या वेबसाइटला भेट दिली; पण तेथे बुकिंगचा कुठलाही पर्याय नव्हता. लवकरच ते सुरू होईल, एवढे मात्र, झळकत होते. अन्य वेबसाइटवरही बुकिंगची सुविधा उपलब्ध झाली नाही.
- जितेंद्र ठक्कर, बांधकाम व्यावसायिक
मोबाइल अॅप डाउनलोड करा आणि राहा अपडेट