ख्रिसमस पाठोपाठ सरत्या वर्षाला निरोप देणाऱ्या तळीरामांचा आनंद वाढवण्यासाठी प्रशासनाने सर्व मद्य विक्रीची दुकाने पहाटेपर्यंत सुरू ठेवण्याचा निर्णय घेतला आहे. नाताळातील २४ व २५ आणि त्यानंतर ३१ डिसेंबर रोजी ही दुकाने पहाटेपर्यंत सुरू असणार आहे.
थर्टी फर्स्टच्या पार्टीचे शहरात सर्वत्र आयोजन केले जाते. वर्ष सरताना तसेच नवीन वर्षाचे स्वागत करताना ओल्या पार्ट्यांना विशेष महत्त्व असते. या दरम्यान मद्य विक्रीचा उच्चांक गाठला जातो. वेगवेगळ्या प्रकारच्या मद्यास मोठी मागणी असते. समाजाचा हा बदलेला दृष्टिकोन लक्षात घेत राज्य उत्पादन शुल्क विभागाने महसूल वाढीस त्याचा फायदा करून घेण्याचा निर्णय घेतला. मद्यपींना या दिवशी त्यांच्या मागणीनुसार मद्य पुरवठा झाला नाही, तर बेकायदा मद्य विक्रीचे प्रमाण वाढते. यामुळे महसूल तर बुडतोच; पण बनावट मद्यामुळे नागरिकांचा जीवही जाण्याचा धोका निर्माण होतो. या पार्श्वभूमीवर काही वर्षांपासून ठराविक दिवशी पहाटेपर्यंत मद्य विक्रीची दुकाने, हॉटेल्स सुरू ठेवण्याचा निर्णय घेण्यात आला आहे.
याबाबत जिल्हाधिकारी राधाकृष्णन् बी. यांच्याकडे शुक्रवारी सकाळी झालेल्या वरिष्ठ अधिकाऱ्यांच्या बैठकीत त्यांनी शासनाच्या आदेशाची माहिती देत अंमलबजावणीचे आदेश दिले. यावेळी जिल्हा पोलिस अधीक्षक संजय दराडे, उत्पादन शुल्क विभागाचे अधीक्षक चरणसिंग राजपूत, सहायक पोलिस आयुक्त अशोक नखाते आदी उपस्थित होते.
पहाटे पाचपर्यंत बार राहणार सुरू
या आदेशानुसार सकाळी साडेअकरा वाजता सुरू झालेले परमीट रूम आणि बिअर बार दुसऱ्या दिवशी पहाटे ५ वाजेपर्यंत उघडे ठेवता येणार आहेत. यापूर्वी यासाठी रात्री दीड वाजेपर्यंत सवलत देण्यात येत होती. तर वाइन शॉपी, बीअर शॉपी, देशी दारू विक्रीची दुकाने रात्री दहा ते साडेदहाऐवजी आता एक वाजेपर्यंत सुरू ठेवता येणार आहेत. यामुळे तळीरामांच्या झिंगाट पार्ट्यांचा जोर नवीन वर्षाच्या पहिल्याच दिवशी कायम राहणार आहे.
आयोजनासाठी धावपळ
शहरात थर्टी फर्स्ट पार्ट्यांचे हॉटेल्स, पब, विविध फार्म हाऊस अशा ठिकाणी आयोजन होते. शक्यतो तरुणाईचे ग्रुप्स यासाठी पुढाकार घेत आहेत. ‘साग्रसंगीत’ पार्ट्यांची तयारी सुरू असून, यासाठी आवश्यक असलेले परवाने घेण्यासाठी व्यावसायिकांची धावपळ सुरू आहे. पार्ट्यांसाठी खर्च करण्यापेक्षा काहींनी फार्म हाऊसला पसंती देत नियोजन आखले आहे.
नाताळातील २४ व २५ डिसेंबर आणि ३१ डिसेंबर या तीन दिवशी मद्यविक्रीची दुकाने पहाटेपर्यंत सुरू ठेवण्यास शासनाने परवानगी दिली आहे. याची अंमलबजावणी करण्याचे आदेश जिल्हाधिकाऱ्यांनी दिले आहेत.
- चरणसिंग राजपूत, अधीक्षक, उत्पादन शुल्क
मोबाइल अॅप डाउनलोड करा आणि राहा अपडेट