टीम मटा
उत्तर महाराष्ट्रासाठी गुरुवार ‘घात’वार ठरला असून, सहा वेगवेगळ्या अपघातांत १५ जण ठार, तर ३१ जण जखमी झाले. सटाणा-मालेगाव महामार्गावरील शेमळी गावात झालेल्या अपघातात सहा, नंदुरबार जिल्ह्यातील म्हसावद-आमोदे रस्त्यावर पाच, सिन्नर- बारागाव पिंप्रीजवळील कानडी मळ्याजवळ, तसेच भुसावळ येथे प्रत्येकी एक, तर नांदगाव- औरंगाबाद मार्गावरील पोखरी शिवारात दोन जण ठार झाले. सरत्या वर्षाला निरोप देण्यासाठी सगळीकडे उत्साहाचे वातावरण असताना या अपघातांनी उत्तर महाराष्ट्रावर शोककळा पसरली आहे.
देवमामलेदार यात्रोत्सवावर शोककळा
सटाणा ः सटाणा- मालेगाव राज्य महामार्गावरील व शहरापासून चार किलोमीटरवरील शेमळी गावानजीक अवजड वाहनाने अॅपे रिक्षाला दिलेल्या धडकेत गुरुवारी सहा जण ठार झाले. अपघातात अॅपे रिक्षाचा चक्काचूर झाला असून रिक्षातील चालकासह सहाही प्रवासी जागीच ठार झाले. हे सहा प्रवासी सटाणा येथे सुरू असलेल्या देवमामलेदार यात्रोत्सवातील व्यावसायिक असून, त्यात मामा-भाच्याचा समावेश आहे. यातील चार व्यावसायिक परराज्यातील असून, दोन व्यावसायिक अंमळनेर व चोपडा येथील आहेत.
मुंबई येथून माल खरेदी करून लक्झरीने हे व्यावसायिक मालेगाव येथे गुरुवारी पहाटे उतरले. तेथून सटाण्याकडे येण्यासाठी त्यांनी संजय पंधाडे (रा. अयोध्यानगर, मालेगाव) यांच्या अॅपे रिक्षाने (एमएच ४१/ व्ही १५५९) भाड्याने केली. या रिक्षासोबत माल घेऊन येत असताना शेमळीजवळील सुकड पुलाजवळील वळणावर रिक्षाला अज्ञात वाहनाने जोरदार धडक दिली. यात रिक्षाचा चक्काचूर होऊन रिक्षामधील सहाही जणांचा जागीच मृत्यू झाला. यात अशोक शंकर देवरे (वय ५५, रा. पारोळा रोड, अंमळनेर, जि. जळगाव), अलीम शेख तायर (३४, मण्यार गल्ली, चोपडा, जि. जळगाव), राजेशकुमार शंकरदास गुप्ता (२८, करमपुरा, ता. तलझाडी, जि. साहेबगंज झारखंड), कैलास प्रसाद अर्जुन प्रसाद गुप्ता (२९, करमपुरा, ता. तलझाडी, जि. साहेबगंज, झारखंड), मोहम्मद लखन जल्लू (३५, करमपुरा, ता. तलझाडी, जि. साहेबगंज, झारखंड), रहेमतुल्लाभाई गोहरआशमी पानवाला (६८, इनामपूर, ता. कोठान, जि. झोनपूर, उत्तर प्रदेश) यांचा समावेश आहे.
पानाची लाली हरपली
देवमामलेदार यशवंतराव महाराज यात्रोत्सव सुरू झाल्यावर यात्रेत हमखास दिसणारा लाल कपड्यांमधील बनारस पानवाला बाबा सटाण्यातील सर्वांना परिचित होता. यात्रेत प्रवेश केला, की ‘लेलो भाई लेलो, बनारसवाला पान लेलो, कल्लकत्ता लेलो, पान खाओ मिठा,’ असे ओरडून लक्ष वेधून घेणारा उत्तर प्रदेशातील रहेमतुल्लाभाई गोहरआशमी पानवाला बाबा सटाणा यात्रेतील एक ओळख होती. त्यांची आता केवळ आठवणच उरणार आहे.
बलक यांचा अपघाती मृत्यू
सिन्नर ः सिन्नर-बारागावपिंप्री रस्त्यावरील कानडी मळ्याजवळ गुरुवारी सकाळी साडेसहाच्या सुमारास बैलगाडी व मोटारसायकलदरम्यान झालेल्या अपघातात मोटारसायकलवर असलेले राजेंद्र दादा बलक (वय ४९) यांचा मृत्यू झाला. ते सगर शिक्षण संस्थेचे उपाध्यक्ष तथा राष्ट्रवादी काँग्रेसचे माजी शहराध्यक्ष आहेत. बलक मोटारसायकलने आपल्या शेतावर जात होते. कानडी मळा परिसरात बलक यांच्या दुचाकीची पुढे जाणाऱ्या बैलगाडीला जोरदार धडक बसली. त्यात बलक गंभीर जखमी झाले. त्यांना खासगी रुग्णालयात दाखल करण्यात आले. मात्र उपचारापूर्वीच त्यांचा मृत्यू झाला. बलक यांनी समता परिषदेचे पदाधिकारी म्हणूनही काम पाहिले आहे, तसेच शैक्षणिक, सामाजिक कार्यातही त्यांचे योगदान होते. त्यांच्या मागे पत्नी, दोन मुलगे, मुलगी असा परिवार आहे.
पोखरी शिवारात दोन ठार
मनमाड ः नांदगाव- औरंगाबाद मार्गावर पोखरी शिवारात ट्रकने मोटारसायकलला समोरून धडक दिल्याने गुरुवारी दुपारी झालेल्या भीषण अपघातात दोन तरुणांचा जागीच मृत्यू झाला. पोलिसांनी ट्रकचालकास अटक केली आहे. नांदगाव तालुक्यातील चिंचविहीर येथील तांड्यावरील अजय कांतीलाल जाधव (वय २२) व मन्साराम देवसिंग जाधव (३४) मोटारसायकलने नांदगाव येथे बाजारासाठी आले होते. बाजार आटोपून चिंचविहीरकडे ते परतत होते. मात्र, पोखरी शिवारात गागरे वस्तीनजीक वळणावर त्यांच्या मोटारसायकलला औरंगाबाद येथून नांदगावकडे येणाऱ्या ट्रकने (एमएच २०/ईजी ९०३३) जोरदार धडक दिली. ही धडक इतकी भीषण होती की मोटारसायकलवरील अजय व मन्साराम जाधव जागीच ठार झाले. ट्रकचालक रमेश काळूराम मरमट (रा. सिल्लोड) याला अटक केली आहे. या प्रकरणी नांदगाव पोलिस ठाण्यात गुन्हा दाखल करण्यात आला आहे.
नंदुरबार जिल्ह्यात पाच ठार
धुळे ः नंदुरबार जिल्ह्यातील शहादा तालुक्यातील म्हसावद-आमोदे रस्त्यावर मिनी ट्रक आणि अॅपे रिक्षाचा अपघात होऊन पाच जणांचा मृत्यू झाला आहे. या प्रकरणी म्हसावद पोलिस ठाण्यात नोंद करण्यात आली आहे. ही घटना गुरुवारी सकाळी सात वाजेच्या सुमारास घडली. तलावडी गावातील लोक भोंगऱ्या गावाला धार्मिक कार्यक्रमासाठी बुधवारी रात्री गेले होते. कार्यक्रम आटोपून गावाकडे परतत असताना हा अपघात झाला. मृतांमध्ये रिक्षाचालक सोंगा रायमल पावरा (वय ३२), गोरख इंदा पावरा (४०), गुलाब फकिरा पावरा (५५), शिकाऱ्या पाचा पावरा (७०), रोहिदास कमा पावरा (६५, सर्व रा. तलावडी) यांचा समावेश आहे. यात तेरा जण जखमी झाले आहेत. त्यांच्यावर शहादा येथील ग्रामीण रुग्णालयात उपचार सुरू आहेत. अॅपे रिक्षात एकूण १८ प्रवासी होते. हे सर्व भोंगरा येथील इंदेल हा धार्मिक कार्यक्रम आटोपून गावाकडे परतत होते.
भुसावळला तरुण ठार
जळगाव : भुसावळ शहरातील खडका गावात गुरुवारी सकाळी भरधाव जीपच्या धडकेने दुचाकीस्वार ठार झाला. कल्पेश दिलीप फिरके (वय २०, रा. किन्ही) असे दुचाकीस्वाराचे नाव असून, या प्रकरणी कालीपिली चालकास पोलिसांनी अटक केली आहे.
मोबाइल अॅप डाउनलोड करा आणि राहा अपडेट
