म. टा. प्रतिनिधी, नाशिक
माजी उपमुख्यमंत्री आणि ओबीसींचे नेते छगन भुजबळ यांच्यावर सूडबुद्धितून होणारी कारवाई थांबवावी अशी मागणी करीत शेकडो भुजबळ समर्थकांनी जिल्हाधिकारी कार्यालयासमोर निदर्शने केली. काळे कपडे परिधान करून निषेध व्यक्त करण्यात आला. मोठ्या संख्यने रस्त्यावर उतरलेल्या आंदोलकांमुळे वाहतूक व्यवस्थेचा मात्र फज्जा उडाला.
‘सामान्यांसाठी जगणं ज्यांचं, सामान्यांचाच ध्यास, त्या साहेबांसाठी लढणं आमचं, त्यांच्यासाठीच श्वास’ यांसारख्या आशयाचे हाती पोस्टर्स, डोक्यावर ‘मी भुजबळ’ असा संदेश असणारी टोपी, भुजबळ नावाचे पिवळे झेंडे, राष्ट्रवादी काँग्रेस, रिपब्लिकन पार्टीचे झेंडे घेऊन पदाधिकारी व कार्यकर्ते जिल्हाधिकारी कार्यालयाच्या प्रवेशद्वारावर दाखल झाले. तेथे जोरदार निदर्शने करण्यात आली. ‘छगन भुजबळ संघर्ष करो, हम तुम्हारे साथ है’, ‘समीर भुजबळ संघर्ष करो, हम तुम्हारे साथ है’ अशा घोषणा देण्यात आल्या. भुजबळ समर्थक समन्वय समितीने जिल्हाधिकारी राधाकृष्णन् बी. यांच्यामार्फत पंतप्रधान नरेंद्र मोदी व मुख्यमंत्री देवेंद्र फडणवीस यांना मागण्यांचे निवेदन पाठविण्यात आले. त्यामध्ये म्हटल्यानुसार, भुजबळ हे देशातील बहुजन, ओबीसी, दलित, आदिवासी, भटके-विमुक्त, अल्पसंख्यांकांचे आशास्थान आहेत. महाराष्ट्र सदन घोटाळ्याच्या आरोपाखाली चौकशी यंत्रणांनी त्यांना २२ महिन्यांपासून डांबून ठेवले आहे. बंदी करून जामीन न देणारा कायदा घटनाबाह्य असल्याचा न्यायनिवाडा सुप्रीम कोर्टाने नुकताच दिला आहे. तरीही त्यांना केवळ आकसापोटी कारागृहात डांबून ठेवल्याचा आरोप निवेदनात करण्यात आला आहे. भुजबळांच्या काही हितशत्रूंनी वैयक्तिक आकस, मत्सर व राजकीय वैमनस्यातून खोटी-नाटी कपट कारस्थाने केली आहेत. बनावट व खोटे साक्षीदार उभे करून तपास यंत्रणांना चुकीची माहिती पुरविल्याचा गंभीर आरोपही आंदोलकांनी केला. गेले काही दिवस त्यांच्याविरुद्ध पद्धतशीर राजकीय कट सुरू असून त्यांच्या चारित्र्यहननाचा प्रयत्न होत असल्याचा दावाही करण्यात आला.
वस्तुस्थितीची मोडतोड करून अवास्तव आकडे मांडून तपासाचे आदेश घेण्यात आले असून, तक्रारदारांनी लिहिलेल्या पूर्वनियोजित पटकथेनुसार तपास यंत्रणा काम करताना दिसत असल्याची शंकाही निवेदनात उपस्थित करण्यात आली आहे. महाराष्ट्र सदन प्रकल्पासाठी राज्य सरकारचा एक रुपयाही खर्च झालेला नाही किंवा संबंधित बिल्डरला अद्याप एफएसआयसुद्धा दिलेला नाही. त्यामुळे भ्रष्टाचार झाला कुठे, कसा, असा सवाल उपस्थित करीत भुजबळांवरील आरोप म्हणजे कल्पनाविलास असल्याची टीकाही करण्यात आली आहे. यावेळी भुजबळ समर्थक आमदार जयवंत जाधव, माजी खासदार देवीदास पिंगळे, नानासाहेब महाले, जिल्हाध्यक्ष अॅड. रवींद्र पगार, शहराध्यक्ष रंजन ठाकरे, समता परिषदेचे दिलीप खैरे, विष्णूपंत म्हैसधुणे, महापालिका गटनेते गजानन शेलार, माजी आमदार प्रा. दिलीप सोनवणे, युवक शहराध्यक्ष अंबादास खैरे, समता परिषद शहराध्यक्ष संतोष सोनपसारे, महिला जिल्हाध्यक्षा प्रेरणा बलकवडे यांसह पदाधिकारी व कार्यकर्ते मोठ्या संख्येने उपस्थित होते.
फलकांनी वेधले लक्ष
‘खूप झालं, खूप सोसलं, तयारी आता सत्याग्रहाची, साहेबांवरील अन्यायाविरुद्ध, वेळ आली लढण्याची’, ‘भावना सूडबुद्धीची, लाचार राजकारणाची, आवाज उठवू आज सारे, साथ देऊ या योद्ध्याची’, ‘सूडबुद्धीने वागणाऱ्या सरकारला, चला धरू या धारेवर, न्याय आता मिळालाच पाहिजे, नाहीतर आणू सरकार ताळ्यावर’, ‘अन्यायाविरुद्ध आवाज हा, सरकारविरुद्ध एल्गार हा, साहेबांच्या न्याय हक्कासाठी, समतेचा मार्ग हा’, ‘चला करुया तयारी, आपण आता आंदोलनाची, समतेचा मार्ग आपला, मागणी आमची न्यायाची’, अशा आशयाच्या पोस्टर्सने नागरिकांचे लक्ष वेधले.
मोबाइल अॅप डाउनलोड करा आणि राहा अपडेट
