एकीकडे कर्मचाऱ्यांना पुरेसे वेतन न देऊ शकणारे एसटी महामंडळ दुसऱ्या बाजूला आर्थिकदृष्ट्या डबघाईत असतानादेखील अवास्तव खर्च करते. या कामाचे ऑडिट करण्यासाठी महामंडळाने गेल्या तीन वर्षांत घेतलेले निर्णय आणि त्यापोटी केलेल्या खर्चाची श्वेतपत्रिका काढण्यात यावी, अशी मागणी माजी आमदार आणि महाराष्ट्र एसटी वर्कर्स काँग्रेस संघटनेचे अध्यक्ष जयप्रकाश छाजेड यांनी केली आहे.
सेवाज्येष्ठतेनुसार पदनिहाय वेतनश्रेणीसह इतर मागण्यांसाठी १७ ते २० ऑक्टोबर या कालावधीत कर्मचाऱ्यांनी संप पुकारला होता. मात्र, आर्थिक उत्पन्नाचे कारण पुढे करीत अल्प पगारवाढीचा प्रस्ताव महामंडळाने ठेवला होता, असे संघटनेचे म्हणणे आहे.
महामंडळाने बस आणि बसस्थानक सफाईसाठी १२९३ स्वच्छक कर्मचारी आणि ५१४ सफाई कामगार कार्यरत असताना खासगी कंत्राटदारास ४४७ कोटी रुपयांचे कंत्राट दिले आहे. नव्याने शिवशाही बस भाडेतत्त्वावर घेण्यासाठी आलेल्या निविदाप्रक्रियेनुसार १५०० खासगी बस कुणाच्या मालकीच्या आहेत, त्यावर किती रुपयांचा भार सोसावा लागणार आहे, असे प्रश्न छाजेड यांनी उपस्थित केले आहेत. गणवेश खरेदी, ईटीआयएम तिकीट मशिनच्या ट्रायमॅक्स कंपनीस मुदतवाढ देणे, करार संपल्यानंतर मशिन आणि यंत्रसामग्री महामंडळास वर्ग करणे आवश्यक असताना पुन्हा ट्रायमॅक्स कंपनीस ठेका देणे, ट्रायमॅक्स कंपनीच्या नव्या करारानुसार आलेल्या मशिनमध्ये जीपीएस यंत्रणा असतानाही ट्रायमॅक्स कंपनीलाच व्हेइकल ट्रॅकिंग सिस्टीमचे काम देणे, चेसीज खरेदी निविदेत केंद्रीय दक्षता आयोगाच्या नमूद सूत्राप्रमाणे धंदा वाटप न करणे, केपीएमजी या बाह्य सल्लागार संस्थेस अनावश्यक नेमणे, बाह्य निविदा प्रकरण, बसस्थानक नूतनीकरण, स्मार्ट कार्ड योजना, वाय फाय, टायर खरेदी, भरतीप्रक्रिया, बाहेरून बस बांधून घेणे, तुर्भे येथील बस आगाराकरिता सिडकोकडून घेण्यात आलेल्या जागेवर ऑटोमोबाइल इंजिनीअरिंग कॉलेज आणि स्वयंचलन इंजिनीअरिंग कॉलेज बांधण्याचा निर्णय, पुणे स्वारगेट येथे सुपरस्पेशालिटी रुग्णालय बांधण्याचा निर्णय, अवास्तव जाहिरातींसाठी खर्च, मराठी भाषादिन, वर्धापनदिन, गणवेशवाटप आदी कामांसाठी करण्यात आलेला खर्च यासह गेल्या तीन वर्षांपासून घेतलेल्या निर्णयांची, कामांची व खर्चाची श्वेतपत्रिका एसटी महामंडळाने काढावी, अशा मागण्या छाजेड यांनी केल्या आहेत.
मोबाइल अॅप डाउनलोड करा आणि राहा अपडेट