अंबड लिंक रोडवरील अनधिकृत भंगार बाजार वर्षातून दोनदा हटवूनही जाच संपत नसल्याचे चित्र आहे. गेल्या वर्षी जानेवारी आणि ऑक्टोबर या दोन महिन्यात दोनदा कारवाई करण्यात आली असली तरी, भंगार बाजार पुन्हा तुकड्यांमध्ये सुरू होत असल्याचे चित्र आहे. विशेष म्हणजे महापालिकेने भंगार बाजारावर नियंत्रण मिळवण्यासाठी दक्षता समितीही स्थापन केली. परंतु, त्याचाही उपयोग होत नसून, हळूहळू भंगार बाजाराने बसण्यास पुन्हा जोर धरण्यास सुरुवात झाली आहे.
महापालिकेने सातपूर-अंबड लिंकरोडवरील अनधिकृत भंगार बाजार हटविण्याची मोहीम ७ ते १० जानेवारी दरम्यान राबवून शहराच्या इतिहासात पहिल्यांदाच मोठी कारवाई केली होती. महापालिकेने एकूण ७६३ अनधिकृत भंगार बाजाराचे शेड हटवले. आयुक्त अभिषेक कृष्णा यांनी या बाजारावर कारवाईची हिंमत दाखवल्यानंतर सुद्धा पुन्हा बाजार वसला. त्यामुळे महापालिकेने पुन्हा एकदा १२ ते १७ ऑक्टोबर या कालावधीत भंगार बाजार हटवण्याची मोहीम राबवली. तसेच पुन्हा भंगार बाजार सुरू होऊ, नये यासाठी अधिकाऱ्यांचे दक्षता पथक स्थापन करण्यात आले. तहीही अनधिकृत भंगार बाजार आटोक्यात येत नसल्याचे चित्र आहे. तीन महिन्यानंतर पुन्हा एकदा भंगार बाजार व्यावसायिकांनी आपली मुजोरी कायम ठेवत अनधिकृतपणे व्यवसायाला सुरुवात केली आहे. दक्षता पथकाकडून गेल्याच आठवड्यात १८ जणांविरोधात अनधिकृतपणे भंगार व्यवसाय सुरू केल्याप्रकरणी गुन्हे दाखल करण्याची शिफारस करण्यात आली. परंतु, त्याचे पुढे काही झाले नसल्याचे व्यावसायिकांनी पुन्हा हातपाय पसरण्यास सुरुवात केली आहे.
पोलिसांना पत्र
अनधिकृत भंगार बाजारात पुन्हा नव्याने दुकाने थाटण्यास सुरुवात केल्यानंतर महापालिकेने या दुकानदारांवर पुन्हा कारवाई करण्यास सुरुवात केली आहे. अनधिकृतपणे व्यवसाय करणाऱ्या १८ जणांवर गुन्हे दाखल करण्याचे पत्र नगररचना विभागाने सातपूर आणि अंबड पोलिसांना दिले आहे. तसेच, एका व्यावसायिकाचा बांधकाम परवाना चुकीच्या कागदपत्रे दिल्यामुळे रद्द केला आहे.
मोबाइल अॅप डाउनलोड करा आणि राहा अपडेट
