इंदिरानगरमधील वडाळा-पाथर्डी रोडवरील केंब्रिज शाळा व गुरूगोविंद सिंग महाविद्यालयाच्या परिसरात वाहतुकीची कोंडी होत असल्याने यावर कारवाई करण्यासाठी वाहतूक पोलिसांनी मोहिमच सुरू केली आहे. मंगळवारी दुसऱ्या दिवशी पोलिसांनी येथे बेशिस्तपणे वाहने उभी करणाऱ्यांवर कारवाई केली असली, तरी विद्यार्थ्यांना सोडण्यासाठी वाहनचालकांनी याबाबत नाराजी व्यक्त केली आहे. आमची वाहने पार्किंगला जागा द्या, अशी मागणी त्यांनी केली आहे.
इंदिरानगरमधील केंब्रिज शाळेसमोर कायमच वाहतुकीची कोंडी होत असते. याठिकाणी येणारे पालक किंवा विद्यार्थ्यांच्या खासगी वाहतुकीच्या गाड्या या सरळ रस्त्यावरच उभ्या करण्यात येत असल्याने रस्त्याला वाहनतळाचे स्वरुप प्राप्त झाले आहे. यावर कारवाई करण्यासाठी सोमवारी वाहतूक विभागाचे सहाय्यक पोलिस आयुक्त अजय देवरे व वरिष्ठ पोलिस निरीक्षक नंदकुमार इथापे यांच्या मार्गदर्शनाखाली सहाय्यक पोलिस निरीक्षक सुरेश भाले व कर्मचाऱ्यांनी याठिकाणी मोहीम सुरू केली. पहिल्या दिवशी नागरिकांचे रस्त्यावर वाहने उभी न करण्याबाबत प्रबोधन करून कारवाईही करण्यात आली. मात्र, सोमवारीही त्याठिकाणी पुन्हा रस्त्यावर वाहने उभी असल्याने पोलिसांनी दंडात्मक कारवाई केली.
यावेळी विद्यार्थ्यांची खासगी वाहतूक करणाऱ्या वाहनचालकांनी पर्यायी जागेची मागणी केली. याबाबत शाळा प्रशासनाशी चर्चा करा, परंतु रस्त्यावर वाहन उभे केले तर दंडात्मक कारवाई करण्यात येईल, असा पवित्रा पोलिसांनी घेतल्याने अखेरीस या वाहनचालकांनी शाळा प्रशासनाबरोबर बैठक घेण्याचा निर्णय घेतला आहे.
शिक्षणसंस्थांना नोटीस
या प्रकारानंतर पोलिसांनी केंब्रिज व गुरूगोविंद सिंग महाविद्यालयातील मुख्याध्यापक व प्राचार्य यांना कलम १४९ अन्वये नोटीस दिली आहे. शाळा व कॉलेज यांनी पालकांच्या वाहनांकरीता स्वमालकीच्या जागेत वाहनतळ करावे व रस्त्यावर वाहने उभी राहणार नाहीत याची दक्षता घ्यावी अन्यथा कायदेशीर कारवाई करण्यात येईल व अपघातास आपणास वैयक्तिक जबाबदार धरण्यात येईल अशी नोटीस देण्यात आली आहे. यामुळे आता या दोन्ही शैक्षणिक संस्था याबाबत काय कारवाई करणार याकडे नागरिकांचे लक्ष लागले आहे. या दोन्ही शैक्षणिक संस्थांमुळे रस्त्यावरच वाहनतळ होत असून पोलिसांनी सुरू केलेल्या या कारवाईचे परिसरातील नागरिकांकडून स्वागत होत आहे.
मोबाइल अॅप डाउनलोड करा आणि राहा अपडेट