म. टा. खास प्रतिनिधी, नाशिक
मुंबईतल्या कमला मिल कंम्पाउंडमधील इमारतीतल्या रेस्टॉरंटमध्ये लागलेल्या आगीच्या दुर्घटनेनंतर नगररचना विभागाने शहरात टेरेसवर सुरू असलेल्या अनधिकृत हॉटेल्सचे सर्वेक्षण केले आहे. यातून शहरात तब्बल ३८ अनधिकृत हॉटेल आढळून आल्या आहेत. त्यामध्ये शहरातील बड्या हॉटेल्सचा समावेश असून, त्यांच्याकडून बेकायदेशीरपणे टेरेसवर पब चालविला जात असल्याचे समोर आले आहे. नगररचना विभागाने कारवाईसाठी हॉटेल्सची यादी अतिक्रमण विभागाकडे सुपूर्द केली असून, विभागाने या हॉटेलचालकांना नोटिसा बजावल्या आहेत.
नाशिकमध्ये टेरेसवर सुरू असलेल्या अनधिकृत हॉटेल्स व रेस्टांरटवर कारवाई करण्याची मागणी शिवसेनेने आयुक्तांकडे केली होती. आयुक्त अभिषेक कृष्णा यांनी यासंदर्भात नगररचना विभागाला सर्वेक्षण करण्याचे आदेश दिले होते. त्यानुसार नगररचना विभागाच्या पथकाने गेल्या आठवड्यात पथकाद्वारे सर्वेक्षण मोहीम राबवली होती.
तब्बल ३८ हॉटेलचालकांनी टेरेसवर अनधिकृतपणे रेस्टांरट व बार सुरू केल्याचे समोर आले. यासंदर्भातील कोणतीही परवानगी महापालिका तसेच अग्निशमन विभागाकडून घेतलेली नसल्याचे चौकशीत उघड झाले आहे. या हॉटेलचालकांनी नियम धाब्यावर बसवत अनधिकृतपणे टेरेसवरच व्यवसाय सुरू केले आहेत. काही हॉटेलचालकांनी टेरेसवर बेकायदेशीरपणे हॉटेल्स सुरू केले आहेत. त्यामध्ये शहरातील प्रतिष्ठितांचाही समावेश आहे. अतिक्रमण विभागाने या सर्व हॉटेल्सचालकाना नोटिसा बजावल्या आहेत. काहींनी स्वतःहून अतिक्रमण काढण्यास सुरुवात केली आहे.
हॉटेल संख्या
पश्चिम विभाग- १६
पंचवटी- ६
सिडको - ६
नाशिकरोड- ४
नाशिक पूर्व - १
सातपूर- ६
या हॉटेलांना नोटीस
पंचवटी विभागातील हॉटेल न्यू पंजाब, हॉटेल प्रेस्टिज पॉइंट, हॉटेल मजा, हॉटेल कारवा आणि हॉटेल राऊ, नाशिक पश्चिम विभागातील हॉटेल प्लेअर अ‍ॅण्ड बार, एम. डी. सफायर, रूफ टेक हॉटेल, व्हायटेक्स हॉटेल अ‍ॅण्ड बार, एन्टर द ड्रॅगन, फर्माइश हॉटेल, हॉटेल पतंग, हॉटेल याहू, कोपा कबाना हॉटेल, हॉटेल मनोरथ, हॉटेल २१ सेंच्युरी, बार्बीक्यू बिस्ट्रो, हॅप्पी नाशिक टाइम्स, टॉक ऑॅफ द टाऊन, डी सेलर टेरेस हॉटेल, टेरेस हॉटेल सम्राट, सिडको विभागातील शिवसागर, सुयोग हॉटेल, साई राज दरबार, साई विजय, न्यू पद्मा हॉटेल, पाथर्डी परिसरातील हॉटेल पोर्टिको, हॉटेल हेमराज व बार रेस्टॉरंट, हॉटेल द पाल्म, हॉटेल सेलिब्रेशन, हॉटेल ग्रॅण्ड अश्विन, नाशिकरोड विभागातील हॉटेल श्रद्धा, हॉटेल नालंदा, स्कायबार आणि गायकवाड क्वालिटी फूडस्, नाशिक पूर्व विभागातील हॉटेल कामतचा यात समावेश आहे.
मटा भूमिका
मुंबईतील कमला मिलमधील हॉटेल दुर्घटनेनंतर जाग आलेल्या नाशिक महापालिकेने आता शहरातील टेरेसवरील हॉटेलांकडे मोर्चा वळविला हे चांगलेच झाले; पण कोणतीही सुरक्षा मानके न पाळणारी ही हॉटेल्स इतक्या दिवस चालू कशी राहिली, याचीही चौकशी व्हावी. नियमबाह्य आस्थापने चालू असताना डोळेझाक करणाऱ्यांनाही जबाबदार धरायला हवे. नाशिकमध्ये मध्यंतरी टेरेसवरील काही हॉटेलांवर कारवाई झाली होती. पण नंतर सगळं शांत झालं. आता तरी कारवाई करताना पुढे अशा बेकायदा आस्थापनांना थारा मिळणार नाही, याची काळजी घेतली तरच या कारवाईला काही अर्थ राहील.
मोबाइल अॅप डाउनलोड करा आणि राहा अपडेट
