आधार कार्डाची मागणी केली म्हणून वाशिम जिल्ह्यात रेशन दुकानदाराला एका लाभार्थी ग्राहकाने मारहाण केली. जिल्ह्यातील रेशन दुकानदारांनी सोमवारी दुकाने बंद ठेवून या घटनेचा नाशिकमध्येही निषेध नोंदविला. रेशन दुकानदारास मारहाण करणाऱ्या संशयितांवर कठोर कारवाई झाली पाहिजे, अशी मागणी जिल्हाधिकाऱ्यांकडे निवेदनाद्वारे करण्यात आली आहे.
स्वस्त धान्य वितरणप्रणालीत पारदर्शकता आणण्यासाठी पुरवठा विभागाने बायोमेट्रिक प्रणालीचा वापर सुरू केला आहे. प्रत्येक रेशन कार्डधारकाला पॉइंट ऑफ सेल (पीओएस) मशिनच्या मदतीनेच धान्य वितरण केले जाते; परंतु त्याकरिता रेशन कार्डाशी आधार लिंक करणे अनिवार्य आहे. ही जबाबदारी पुरवठा विभागाने रेशन दुकानदारांच्या माथी मारली आहे. आधार लिंकिंगबाबत पुरवठा विभागाचा दबाव आणि सर्वसामान्यांचा उफाळून येत असलेला रोष अशा कात्रीत रेशन दुकानदार सापडत आहेत. वाशिम येथेही असाच प्रकार घडला. एका लाभार्थ्याकडे आधार कार्डाची मागणी केली म्हणून गणेश तिवारी या रेशन दुकानदारास आणि त्याच्या कुटुंबीयांना मारहाण करण्यात आली. या घटनेचा निषेध म्हणून जिल्ह्यातील २,६०९ रेशन दुकानदारांनी दुकाने बंद ठेवून निषेध नोंदविला. जिल्हाधिकारी व जिल्हा पुरवठा अधिकाऱ्यांना रेशन दुकानदारांच्या संघटनेने निवेदन दिले. अध्यक्ष निवृत्ती कापसे यांच्यासह महेश सदावर्ते, दिलीप तुपे, सलीम पटेल, रतन काळे, राजू लोढा आदी उपस्थित होते.
मोबाइल अॅप डाउनलोड करा आणि राहा अपडेट