रामकुंड परिसरात साधू, पुजारी, भाविक यांची झालेली गर्दी, काही पाण्यात उभे राहून तर काही काठावर बसून, हातात माळ घेऊन सुरू मंत्रजप करीत होते. महिला भाविकांचीही संख्या मोठी होती. प्रत्येकाची जप करण्याची पद्धत वेगवेगळी होती. मनातल्या मनात सुरू असलेल्या मंत्रजपामुळे गर्दी असूनही रामकुंडावर शांतता होती.
बुधवारी (दि. ३१) खग्रास चंद्रग्रहण आल्याने ग्रहण काळात मोक्ष प्राप्त करण्यासाठी अनेक भाविकांनी रामकुंडात स्नान केले. ग्रहणकाळात नदीत स्नान शुभ मानले जात असल्याने साधू, पुजारी, भाविक यांनी स्नान केले. खग्रास चंद्रग्रहण काळात भोजन करू नये, ग्रहण स्पर्श ते मोक्ष काळात मल- मूत्र विसर्जन, भोजन, अभ्यंगस्नान, झोप, कामविषयक सेवन शक्यतो टाळावे, असे सांगितले असल्याने या काळात नागरिकांनी काही सेवन करणे वर्ज्य केले होते. नदीत स्नान शुभ मानले जात असल्यामुळे थंडीतही स्नान करीत भाविक रामकुंडात उभे होते. काही साधू पद्मासनात बसून, काही तोंडावर पांघरून घेऊन, काही पाण्यात हात हलवीत तर काही केवळ स्तब्ध राहून मनातल्या मनात मंत्र जप करीत होते. जो तो आपापल्या मंत्र जपात मग्न झालेला दिसत होता. स्नान, दान, होम, तर्पण, श्राद्ध, मंत्र ग्रहण काळात केले जात होते. काही ग्रहण लागण्याच्या सुरुवातीलाच दर्भ व तुळशीपत्र अर्पण करीत होते.
खग्रास चंद्रग्रहण गोदावरी नदीत डुबकी लावून पुण्यकर्म करण्यासाठी रामकुंडावर संध्याकाळी ग्रहण काळात एकच गर्दी झाली होती. ग्रहणात अनेक भाविकांनी गोदावरी नदीत स्नान करुन पूजापाठ करीत मंत्रजप केले. यामध्ये महिला, पुरुष आणि तृतीयपंथियांचादेखील समावेश होता.
चंद्रग्रहण सुरू होताच पंचवटीसह शहरातील बहुतांशी सर्व मंदिरे बंद करण्यात आली होती. काही मंदिरांचे गाभारे बंद ठेवण्यात आले होते.
पुन्हा हा योग कधी?
आता यानंतर २६ मे २०२१ रोजी सुपरमून आणि चंद्रग्रहण असा योग येईल. ३१ डिसेंबर २०२८ रोजी ब्ल्यूमून आणि चंद्रग्रहण असा योग येईल.
मोबाइल अॅप डाउनलोड करा आणि राहा अपडेट