म. टा. प्रतिनिधी, नाशिक
विवाह सोहळा आटोपून मुलाची वाट पाहत थांबलेल्या महिलेच्या गळ्यातील सोन्याची पोत हिसकावून पोबारा करणाऱ्या चोरट्यास नागरिकांनी पकडून बेदम चोप देत पोलिसांच्या हवाली केले. ही घटना औरंगाबाद मार्गावर घडली. संशयिताच्या अटकेमुळे या परिसरात झालेले काही गुन्हे उघडकीस येण्याची शक्यता आहे. या प्रकरणी आडगाव पोलिस स्टेशनमध्ये गुन्ह्याची नोंद करण्यात आली.
संतोष तुकाराम निकम (वय ३३, रा. लखमापूर, ता. दिंडोरी, हल्ली शिवअमृत सोसा. बोरगड) असे या संशयित चेन स्नॅचर्सचे नाव आहे. निर्मला संजय गामणे (रा. गामणेमळा, मखमलाबाद) या महिलेच्या गळ्यातील दागिन्यांवर डल्ला मारताना संशयित संतोष नागरिकांच्या हाती सापडला. नातेवाईकांच्या विवाह सोहळ्यासाठी गामणे सोमवारी औरंगाबाद रोडवरील गुरूदत्त लॉन्स येथे गेल्या होत्या. सायंकाळी विवाह आटोपताच साडेसात वाजेच्या सुमारास त्या रस्ता ओलांडून नजीकच्या सिद्धिविनायक लॉन्ससमोर पोहचल्या. येथे त्यांचा मुलगा दुचाकीवर येणार होता. गामणे आपल्या मुलाची वाट पाहत उभ्या असताना त्यांच्या शेजारी तोंडाला मास्क बांधून संतोष तयारीतच थांबला होता. संतोषने गामणे यांच्या गळ्यातील सुमारे पाच तोळे वजनाची सोन्याची पोत हिसकावून पोबारा करण्याचा प्रयत्न केला. मात्र, संतोषने पोतीवर हात टाकताच गामणे यांनी जोरात आरडाओरड केली. सोमवारी लग्नाची तिथी दाट असल्याने या मार्गावर वर्दळ होती. तसेच गोरस मुहूर्तावरील विवाह सोहळे आटोपून वऱ्हाडी मंडळी लॉन्स बाहेर पडत असताना त्यांच्या हा प्रकार लक्षात आला. यातील काही नागरिकांनी पाठलाग करीत संशयितास पकडून बेदम चोप दिला. ही घटना आडगाव पोलिसांना समजताच वरिष्ठ पोलिस निरीक्षक सुनील पुजारी फौजफाट्यासह घटनास्थळी पोहचले. नागरिकांनी मुद्देमालासह बेदम मारलेल्या संशयितास पोलिसांच्या स्वाधीन केले. गामणे यांनी दिलेल्या फिर्यादीनुसार आडगाव पोलिस स्टेशनमध्ये संशयित संतोष निकमविरोधात गुन्हा दाखल करण्यात आला असून, अधिक तपास हवालदार बोऱ्हाडे करीत आहेत.
इतर गुन्ह्यांशी संबंध तपासणार
संशयिताच्या अटकेमुळे या परिसरात झालेले काही गुन्हे उघडकीस येण्याची शक्यता आहे. आडगाव, पंचवटी तसेच उपनगर या पोलिस स्टेशन हद्दीत गेल्या काही दिवसांत सतत चेन स्नॅचिंगच्या घटना घडल्या असून, त्यांच्याशी संशयिताचा थेट संबंध आहे काय याचा तपास पोलिस करीत आहेत.
फटाके वाजविण्यावरून मारहाण
मित्राच्या हळदीच्या कार्यक्रमादरम्यान घरासमोर फटाके उडविल्याने दोघांनी एकास बेदम मारहाण केली. ही घटना सिडकोतील उत्तमनगर भागात घडली असून, या प्रकरणी अंबड पोलिस स्टेशनमध्ये मारहाणीचा गुन्हा दाखल करण्यात आला आहे.
अनिकेत उर्फ भूषण साळुंके आणि त्याच्या काकाचा मुलगा (रा. डीजीपीनगर) अशी मारहाण करणाऱ्या संशयितांची नावे आहेत. राजरत्ननगर येथील शिवचौकात राहणाऱ्या गुलाब प्रकाश महाले या तरुणाने दिलेल्या फिर्यादीनुसार रविवारी रात्री घराजवळील मित्र निखिल अहिरराव याच्या हळदीच्या कार्यक्रमात महाले फटाके उडवित असताना वादास सुरुवात झाली. कार्यक्रमानिमित्त आलेल्या दोघा संशयितांनी गुलाब महाले यास बाजूला घेऊन जाऊन फटाके का उडवितो, असा जाब विचारत शिवीगाळ सुरू करून बेदम मारहाण केली. संशयितांपैकी एकाने गुलाबच्या डोक्यात लोखंडी फायटरने मारल्याने तो जखमी झाला असून, अधिक तपास हवालदार वाघ करीत आहेत.
जुगारींना अटक
पंचशीलनगर येथील डॉ. बाबासाहेब आंबेडकर पुतळ्यामागे जुगार खेळणाऱ्या चौघा जुगारींना पोलिसांनी अटक केली. संशयिताच्या ताब्यातून रोकड व जुगाराचे साहित्य हस्तगत करण्यात आले असून, या प्रकरणी भद्रकाली पोलिस स्टेशनमध्ये गुन्हा दाखल करण्यात आला आहे.
सोमवारी दुपारच्या सुमारास वरील ठिकाणी उघड्यावर जुगार सुरू असल्याची माहिती पोलिसांना समजली होती. त्यानुसार पोलिसांनी छापा मारला. यावेळी शंकर रामा शेट्टी तसेच त्याचे तीन साथीदार पत्यांच्या कॅटवर अंदर बाहर जुगार खेळतांना सापडले. घटनेचा अधिक तपास पोलिस नाईक शेख करीत आहेत.
मोबाइल अॅप डाउनलोड करा आणि राहा अपडेट