म. टा. प्रतिनिधी, नाशिक
पैशांची मागणी करणाऱ्या संशयित आरोपीने तरुणावर चाकू हल्ला केला. ही घटना सिडकोतील कामटवाडा भागात घडली असून, या प्रकरणी अंबड पोलिस स्टेशनमध्ये गुन्हा दाखल करण्यात आला आहे.
लिंबाजी रामभाऊ गोरनर (वय ३०, रा. श्रीकृष्णनगर, डीजीपीनगर) यांनी दिलेल्या तक्रारीनुसार, गुरुवारी (दि. ८) दुपारी साडेचार वाजेच्या सुमारास गोरनर कामटवाडा येथील मीनाताई ठाकरे शाळेजवळून जात होते. यावेळी तिथे आलेल्या संशयित शाहरूख शेख तसेच त्याच्या एका साथीदाराने गोरनर यांना थांबवून पैशांची मागणी केली. गोरनर यांनी पैसे देण्यास नकार देताच संतप्त झालेल्या दोघांनी त्यांना लाथाबुक्क्यांनी मारहाण केली. तर शाहरूखने आपल्या खिशातील छोटा धारदार चाकू काढून गोरनर यांच्या पोटावर वार केला. यात गोरनर जखमी झाले असून, अधिक तपास हवालदार गायकवाड करीत आहेत.
पर्समधून मंगळसूत्र चोरी
कारमध्ये ठेवलेल्या पर्समधील मंगळसुत्रावर चोरट्यांनी डल्ला मारल्याची घटना नाशिक पुणे महामार्गावरील बिग बाझारजवळ घडली. याप्रकरणी उपनगर पोलिसांनी गुन्हा दाखल केला आहे. प्रवीण सत्यनारायणसिंग कुमार (रा. आईएसपी इस्टेट नाशिकरोड) यांनी तक्रार दिली आहे. प्रवीणकुमार आपल्या कुटुंबासह गुरुवारी (दि. ८) बिग बाझार येथे गेले होते. कुमार यांच्या पत्नी दिव्यासिंग यांच्या गळ्यातील सुमारे २५ हजार रुपये किमतीचे मंगळसूत्र प्रवासात तुटल्याने त्यांनी ते काढून आपल्या पर्समध्ये ठेवले होते. अज्ञात चोरट्यांनी पार्क केलेल्या कारचा दरवाजा उघडून पर्समधील तुटलेले मंगळसूत्र चोरून नेले. घटनेचा अधिक तपास उपनिरीक्षक शिंदे करीत आहेत.
घरगुती गॅसचा वाहनासाठी वापर
घरगुती सिलिंडरमधून गॅस काढून वाहनासाठी वापर करणाऱ्या दोघांविरोधात गुन्हा दाखल करीत पोलिसांनी अटक केली. याप्रकरणी उपनगर पोलिस स्टेशनमध्ये गुन्हा नोंदवण्यात आला. संजय किसन पुरकर (रा. शिवनेरी बंगला, श्रमनगर) आणि संदीप दत्तात्रेय जोशी (रा.माधव अपार्ट. लोखंडे मळा) अशी कारवाई करण्यात आलेल्या दोघांची नावे आहेत. शिवनेरी बंगल्याच्या आवारात एका कारमध्ये (एमएच. १५ बीएन ९१२४) बेकायदा घरगुती सिलेंडरमधील गॅस पाईपद्वारे भरताना मिळून आले. घटनेचा अधिक तपास उपनिरीक्षक शिंदे करीत आहेत.
संशयास्पद हालचालींवरून महिलेस अटक
महामार्ग बस स्थानक परिसरात संशयास्पद हालचाली करीत असलेल्या एका ५२ वर्षाच्या महिलेस पोलिसांनी अटक केली. तिच्या ताब्यातून सुमारे १४ हजार रूपये किंमतीचे विविध कपडे पोलिसांनी हस्ततगत केले. यात साड्या ब्लाऊज पिस आणि परकर यांचा समावेश असून, हे नवीन कपडे चोरीचे असल्याचा संशय पोलिसांनी व्यक्त केला आहे. सुगंधाबाई सूर्यभान मोकळ (५२, रा. मनमाड, ता. नांदगाव) असे संशयित महिलेचे नाव आहे. गुरुवारी (दि. ८) सकाळी ही महिला महामार्ग बस स्थानकात असलेल्या चिंचेच्या झाडाजवळ संशयास्पद हालचाल करताना मिळून आली. पोलिसांनी तिला ताब्यात घेऊन झडती घेतली असता २१ साड्या, ६६ ब्लाऊजपीस, ७ परकर असा १४ हजार रुपयांचा मुद्देमाल मिळून आला. सदर महिलेने एखाद्या दुकानात चोरी केल्याचा पोलिसांना संशय असून, तिची चौकशी सुरू आहे. या प्रकरणाचा अधिक तपास उपनिरीक्षक पवार करीत आहेत.
जुगार अड्ड्यावर कारवाई
पंचवटी कारंजावरील एका हॉटेलच्या तळमजल्यावर जुगार खेळणाऱ्या चौघांना पोलिसांनी अटक केली. संशयितांच्या ताब्यातून रोकड आणि जुगाराचे साहित्य जप्त करण्यात आले असून, या प्रकरणी पंचवटी पोलिस स्टेशनमध्ये गुन्हा दाखल करण्यात आला. अशोक शंकर देशमुख (५६ रा. जाधव संकुल), मंगल रामा बोरसे (४८ रा. फुलेनगर, पेठ रोड), दिलीप हिरामण वानखेडे (३५ रा. येवलेकर चाळ, पंचवटी कारंजा) व वसंत रघुनाथ ससाणे (५२ रा.वाल्मीकनगर, पंचवटी) अशी अटक केलेल्या संशयितांची नावे आहे. पंचवटी कारंजा येथील साहेबा हॉटेल इमारतीच्या तळमजल्यावर गुरूवारी ही कारवाई करण्यात आली. घटनेचा अधिक तपास हवालदार बस्ते करीत आहेत.
मोर्चा आयोजकांवर गुन्हा
आरोग्य विज्ञान विद्यापीठातील कंत्राटी कामगारांसाठी विना परवानगी मोर्चा काढून जमाव बंदी आदेशाचा भंग केल्याप्रकरणी सीआयटीयू संघटनेच्या प्रमुख नेत्यांसह पदाधिकाऱ्यांविरुद्ध मुंबईनाका पोलिस स्टेशनमध्ये गुन्हा दाखल करण्यात आला आहे. श्रीधर देशपांडे, डॉ. डी. एल. कराड, संतोष काकडे, तानाजी जायभावे, सीताराम ठोंबरे आदीं प्रमुख नेत्यांसह कार्यकर्त्यांवर गुन्हा दाखल करण्यात आला आहे. आरोग्य विद्यान विद्यापीठातील कंत्राटी कामगारांच्या विविध प्रलंबित मागण्यासाठी गुरुवारी (दि. ८) सकाळी ११ वाजेच्या सुमारास सीआयटीयू या कामगार संघटनेच्यावतीने शहरातून भव्य मोर्चा काढण्यात आला होता. या वेळी आयोजकांनी मोर्चाची कुठलीही परवानगी घेतली नव्हती, तसेच पोलिस आयुक्तांनी जमावबंदी आणि शस्त्रबंदी आदेश जारी केलेली असतांना हा मोर्चा काढण्यात आल्याने या प्रकरणी मुंबईनाका पोलिस स्टेशनमध्ये गुन्हा दाखल करण्यात आला आहे. घटनेचा अधिक तपास सहाय्यक निरीक्षक राठोड करीत आहेत.
मोबाइल अॅप डाउनलोड करा आणि राहा अपडेट
