म. टा. खास प्रतिनिधी, नाशिक
वाहतुकीची कोंडी, प्रदूषणासह धकाधकीच्या जीवनातील टेन्शनपासूनही सुटका करून घेण्याची संधी येत्या रविवारी नाशिककरांना ‘हॅपी स्ट्रीट’ या उपक्रमाच्या माध्यमातून पुन्हा अनुभवण्याची संधी मिळणार आहे. बिटको पॉइंट ते कोठारी कन्याशाळा, जेलरोड येथे रविवारी (२५ फेब्रुवारी) सकाळी ७ ते ९.३० या वेळेत नाशिकरोड येथील रहिवाशांची सकाळ हॅपी होणार आहे.
नेहमीच वाहतुकीने गजबजलेले रस्ते आपल्यासाठी खुले होणे, हा विचारच आपल्याला सुखावून जातो. त्यातच या रस्त्यांवर विविध खेळ, उपक्रम, डान्स, गाणी होणार असतील तर त्याची मजाच न्यारी असते. हीच मजा हॅपी स्ट्रीटमधून अनुभवण्यास मिळत असल्याने हा उपक्रम नेहमीच लोकप्रिय ठरला आहे. त्यामुळेच नाशिकमध्ये कॉलेजरोड व गोविंदनगरमधील हॅपी स्ट्रीटला नाशिककरांनी उत्स्फूर्त प्रतिसाद दिला. आता वेळ आहे नाशिकरोड, जेलरोडवासीयांना हॅपी करण्याची. येत्या रविवारी ही संधी उपलब्ध करून देण्यात आली असून, झुम्बा, स्केटिंग, मेहंदी, पारंपरिक खेळ, योगासने, सायकल राइड, स्केच, टॅटू, वारली पेंटिंग, पेपर आर्ट, रांगोळी, बासरीवादन अशा अनेक कलाप्रकारांचे सादरीकरण या वेळी विविध ग्रुप्सतर्फे होणार आहे. पहिल्या दोन हॅपी स्ट्रीटला धमाल केलेला प्रसिद्ध विनोदी अभिनेता अंशुमन विचारे नाशिकरोडलाही येणार असून, त्याला भेटण्याचीही संधी या वेळी मिळणार आहे.
हॅपी स्ट्रीटमध्ये एलिट फिटनेस क्लब, प्रज्ञा फिटनेस अँड क्लब, एमएच १५ रॉक्स, द गिटार वर्ल्ड, डेकेथलॉन स्पोर्टस गुडस मॉल, आर. डी. भडांगे स्केटिंग ग्रुप, मानव उत्थान मंच, धीरज फोटोग्राफी, रचना आर्ट, १८१ टॅटू, शंकर कंदेरा सिंगिंग, किट्टू कॉलीग आर्ट, नाशिक सायकलिस्ट असोसिएशन, एनडीज क्रिएटिव्ह ग्रुप, स्पार्टन हेल्थ सेंटर, प्राइस मेहंदी आर्ट, खगोल मंडळ, जादुगार विजयराज, पूजाज आर्ट अँड क्राफ्ट, ओम रंगोत्सव क्लासेस, अक्षरयज्ञ अॅकॅडमी, शिल्पकार वरुण भोईर, रंगलहरी आर्ट, नम्रता क्रिएशन, अंजलीज विसपुते आर्ट, दीपाज आर्ट सहभागी होणार असून, ते आपापली कला सादर करणार आहेत.
जिंका सरप्राइझ गिफ्ट
महाराष्ट्र टाइम्स हॅपी स्ट्रीटमध्ये तुम्हाला सरप्राइझ गिफ्ट लकी ड्रॉद्वारे जिंकण्याची संधीदेखील मिळणार आहे. त्यासाठी ‘स्वच्छ सोसायटी- स्वच्छ नाशिक’ या उपक्रमात सहभागी होणे आवश्यक आहे. आपली सोसायटी, अपार्टमेंट स्वच्छ करतानाचा फोटो आणि स्वच्छ झाल्यानंतरचा फोटो तुम्हाला सिटिझन रिपोर्टरच्या अॅपवर पाठवायचा आहे. फोटो पाठवताना सोसायटीचे नाव, पूर्ण पत्ता आणि फोन नंबर लिहायला विसरू नका. ‘हॅपी स्ट्रीट-स्वच्छ सोसायटी’ या मथळ्याखाली फोटो, सोसायटीचे नाव, पदाधिकाऱ्याचे नाव पाठवायचे आहे. विजेत्या सोसायट्या, तसेच हॅपी स्ट्रीटमध्ये भाग्यवंतांना प्रसिद्ध अभिनेता अंशुमन विचारे याच्या हस्ते सरप्राइझ गिफ्टही मिळू शकते.
इच्छुकांना संधी
हॅपी स्ट्रीटमध्ये कला सादर करण्याची इच्छा असलेल्यांनी आजच ०२५३- ६६३७९८७, ७०४०७६२२५४ या क्रमांकावर संपर्क साधावा.
मोबाइल अॅप डाउनलोड करा आणि राहा अपडेट
