म. टा. खास प्रतिनिधी, नाशिक
मनपा आयुक्त तुकाराम मुंढे यांनी महासभेवर ठेवलेला ३३ ते ८२ टक्क्यांपर्यंतच्या मालमत्ता करात भाडेमूल्याच्या आधारे भरमसाट करवाढीच्या प्रस्तावाला सर्वच स्थरावरून विरोध झाल्यानंतर सत्ताधारी भाजपने करवाढीसंदर्भात नमते घेतले आहे. मुंढेंनी ठेवलेला करवाढीचा तीन टप्प्यातील ठराव महापौरांनी फेटाळून लावला असून, स्थायी समितीच्या सरसकट १८ टक्के भाडेमूल्यावर आधारीत करवाढीच्या प्रस्तावाला मंजुरी दिली. त्यामुळे नाशिककरांना काहीसा दिलासा मिळाला असला तरी, आयुक्त मुंढेंना मात्र जोरदार झटका बसला आहे.
नव्या करवाढीच्या प्रस्तावामुळे महापालिकेच्या तिजोरीत १२ कोटी ६० लाखांची भर पडणार आहे. परंतु, या ठरावावरून महापालिकेत पुन्हा मुंढे विरुद्ध भाजप असा संघर्ष उभा राहणार आहे. नूतन आयुक्त तुकाराम मुंढेंनी सूत्रे हाती घेताच तत्कालीन आयुक्त अभिषेक कृष्णा यांच्या काळातील प्रस्तावात सुधारणा करीत त्यात भरघोस वाढ केली होती. निवासी मालमत्ता करात ३३ टक्के, अनिवासी मालमत्ता करात ६४ तर औद्योगिक मालमत्ता करात तब्बल ८२ टक्क्यांपर्यंत दरवाढ करण्यााच प्रस्ताव ठेवला होता. तसेच, भांडवली मूल्यावर आधारित करवाढीचा आग्रह प्रस्तावात धराला होता. मात्र, सत्ताधारी भाजपने हा प्रस्ताव फेटाळून लावत सरसकट १८ टक्के करवाढीचा निर्णय घेतला आहे. या निर्णयामुळे नाशिककरांना थोडा दिलासा मिळाला आहे. विरोधी पक्षांनीही महापौरांचे या निर्णयाचे स्वागत केले आहे.
प्रशासनाने प्रथम ठेवलेल्या प्रस्तावाला मंजुरी दिली आहे. करवाढीसंदर्भात सर्वंकष विचार करूनच निर्णय घेण्यात आला असून, सर्वसामान्य नागरिक ते उद्योजकांना दिलासा देण्याचा प्रयत्न केला आहे. उत्पन्न वाढविण्याचेही प्रयत्न केले आहेत.
- रंजना भानसी, महापौर
मोबाइल अॅप डाउनलोड करा आणि राहा अपडेट
