म. टा. प्रतिनिधी, नाशिक
जिल्ह्यात ११ पतसंस्थांमध्ये अपहार झाला असून, संचालक व मोठ्या कर्जदारांसह ४७० जणांवर सहकार विभागाने गुन्हे दाखल केले आहेत. जिल्ह्यातील एकूण पतसंस्थांपैकी २७ पतसंस्था अडचणीत सापडल्या असून, त्यांच्याकडे तब्बल १४७७ कोटी रुपयांची थकबाकी असल्याची माहिती पुढे आली आहे.
पतसंस्थांमध्ये संचालक मंडळाकडून झालेले गैरव्यवहार आणि बड्या थकबाकीदारांनी कर्ज बुडविल्यामुळे जिल्ह्यातील २७ पतसंस्था डबघाईस आल्या आहेत. त्यामुळे ठेवीदारांच्या एकूण २१९९ कोटी ४५ लाख रुपयांच्या ठेवी अडकून पडल्या आहेत. सहकार विभागाने आतापर्यंत कलम ८८ अन्वये १९ पतसंस्थांची चौकशी केली आहे. दहा संस्थांची चौकशी प्रक्रिया पूर्ण झाली असून, अन्य दोन पतसंस्थांची चौकशी बाकी आहे. फेब्रुवारी २०१८ पर्यंत बुडीत निघालेल्या पतसंस्थांकडून सहकार विभागाने ७२१ कोटी ८३ लाख रुपयांची वसुली केली. जिल्ह्यात ११ पतसंस्थांमध्ये तब्बल १,८०१ कोटींचा अपहार झाला असून, अशा प्रकरणांमध्ये पतसंस्थांच्या संचालकांसह थकबाकीदारांवर गुन्हे दाखल करण्यात आले आहेत. यात गुंतलेल्या एकूण आरोपींची संख्या ४७० पर्यंत पोहोचली असून, त्यापैकी २०५ जणांना पोलिसांनी अटक केली आहे.
चार मोठ्या बँका अवसायनात
जिल्ह्यातील चार मोठ्या बँका अवसायनात निघाल्या आहेत. या बँकांवर पाच वर्षांपासून अवसायक नेमण्यात आले आहेत. यापैकी श्रीराम बँकेकडे सर्वाधिक ३० कोटींची रक्कम वसुली बाकी आहे. बालाजी बँकेकडून चार कोटी, तर सिन्नर नागरी बँकेतून ५० लाखांची वसुली बाकी आहे. डबघाईस आलेल्या काही पतसंस्थांना सरकारने बिनव्याजी दोन कोटी रुपयांचे कर्ज उपलब्ध करून दिले आहे. सरकारकडून प्राप्त मदत आणि पतसंस्थांकडील निधी यांमधून ठेवीदारांना दोन कोटी ६३ लाख १७ हजार रुपये परत करण्यात आले आहेत. पतसंस्थांकडून करण्यात आलेल्या वसुलीपैकी दोन कोटी ४२ लाख ७४ हजार रुपये सरकारला परत करण्यात आले आहेत; परंतु अद्याप २० लाख ३३ हजार रुपये वसुली बाकी असल्याची माहिती देशमुख यांनी दिली.
मोबाइल अॅप डाउनलोड करा आणि राहा अपडेट
