महिलांसाठी आज मतदार नोंदणी मोहीम

March 7, 2018, 2:30 pm

≫ Next: सिमेंट, खडीतून आयुष्याला सोनेरी मुलामा

म. टा. प्रतिनिधी, नाशिक

महिला वर्गात मतदानाबाबत जागृती निर्माण व्हावी यासाठी प्रशासनाने महिला दिनाचे औचित्य साधून गुरूवारी (दि. ८) विशेष अभियान राबविण्याचा निर्णय घेतला आहे.

उपमुख्य अधिकारी निवडणूक अधिकारी गिरीश मोहोड यांनी दिले आहेत. जानेवारीत प्रसिद्ध झालेल्या मतदारयादीत पुरुषांच्या तुलनेत महिला मतदारांचे प्रमाण बरेच कमी आहे. त्यामुळे महिला मतदारांची नोंदणी वाढणे आवश्यक असून त्यावर भर देण्याच्या सूचना जिल्हा निवडणूक अधिकारी प्रज्ञा बढे-मिसाळ यांनी तहसीलदार, नायब तहसीलदारांना दिल्या आहेत. महिला दिनानिमित्त मतदान जागृतीचे उपक्रम राबविण्यात येणार आहेत.

महिला वसतिगृह, अंगणवाडी सेविका, आशा स्वयंसेविका, परिचारिका, महिला बचत गटाच्या सदस्या, शिक्षिका यांना या मोहिमांमध्ये सामावून घेऊन मतदार नोंदणी वाढविण्यासाठी प्रयत्न करावेत, अशा सूचना देण्यात आल्या आहेत. सरकारी व असरकारी संस्था, महामंडळ आदींच्या मदतीने महिला मतदारांची नोंदणी वाढविणे, तालुक्यातील प्रतिष्ठित महिलांच्या माध्यमातून महिलांना मतदार नोंदणीसाठी प्रोत्साहित करणे, यासाठी विविध कार्यक्रम घेणे, नवविवाहित महिलांची पूर्वीची मतदार नोंदणी रद्द करून नवीन मतदार म्हणून नोंदणी करणे, मागील वर्षभरात प्राथमिक आरोग्य केंद्रात प्रसुतीसाठी नोंदणी केलेल्या महिलांची यादी प्राथमिक आरोग्य केंद्रातून प्राप्त करून घेणे व या महिलांचे मतदारयादीत नाव नसल्यास त्यांची नावे मतदारयादीमध्ये समाविष्ट करण्याच्या सूचना दिल्या आहेत. सैन्य दलातील महिला, युवती, सैन्य दलातील मतदार तसेच लोकशाही प्रक्रियेपासून वंचित राहिलेले आदिवासी, तृतीयपंथी, स्थलांतरित कामगार यांचीही नोंदणी करण्यात येणार आहे.

Latest Images