म. टा. वृत्तसेवा, इंदिरानगर
रविवारची सुटी साधून काही महाविद्यालयीन युवक व युवती पांडवलेण्यावर ट्रेकिंगला गेले होते. मात्र, त्यातील एक मुलगा व मुलगी पंचवीस फूट खोल दरीत पडले. हा प्रकार लक्षात आल्यानंतर नागरिकांनी तातडीने पोलिसांना कळवले. पोलिसांनी अग्निशामक दलाच्या मदतीने या युवकांना वाचवले. या प्रकारामुळे या परिसरात सुरक्षेचा प्रश्न पुन्हा ऐरणीवर आला आहे. पोलिसांनी पुरातत्व विभागाशी सुरक्षा रक्षकाबाबत पत्रव्यवहार करूनही विभागाने याकडे दुर्लक्ष केल्याचे समोर आले आहे.
याबाबत सविस्तर वृत्त असे की, पांडवलेणी येथे रविवारी सकाळी नितीन देशपांडे, प्रवीण चाकोले व अजय जाधव हे फिरायला गेले असताना त्यांना लेणी क्रमांक १ येथे सुमारे वीस ते पंचवीस फूट खोल एक मुलगा व मुलगी जखमी अवस्थेत पडलेले असल्याचे दिसले. हा प्रकार पाहिल्यानंतर त्यांनी तातडीने पोलिस आयुक्त डॉ. रवींद्रकुमार सिंगल यांच्याशी संपर्क साधून या घटनेची माहिती दिली. त्यानंतर काही वेळातच जलद प्रतिसाद पथक, नियंत्रण कक्ष, अग्निशामक दलासह इंदिरानगर पोलिस ठाण्याचे कर्मचारी घटनास्थळी दाखल झाले. त्यानंतर पोलिस कर्मचाऱ्यांनी जखमी अवस्थेत असलेल्या विदुला दौलत पगार (१९, रा. पिंपळगाव बसवंत) व अरविंद वैद्यनाथन (२२, रा. प्रभूधाम, एचएएलजवळ, नाशिक) यांना सुखरूप खाली उतरविले. त्यानंतर या दोघाही जखमींना जिल्हा रुग्णालयात दाखल करून त्यानंतर खासगी रुग्णालयात दाखल करण्यात आले. ट्रेकिंगला गेलेल्या त्या तिघांनी तातडीने पोलिसांना माहिती दिल्यानंतर पोलिसांनीही या घटनेचे महत्त्व लक्षात घेत केलेल्या कारवाईमुळे दोघांचे प्राण वाचले. पांडवलेणी परिसरात दररोज अनेक नागरिक फिरायला जातात. सुटीच्या दिवशी येथे मोठी गर्दी असते. त्यामुळे याठिकाणी पुरातत्व विभागाने कायमस्वरुपी सुरक्षा रक्षक नेमण्याची मागणी होवूनही त्याची पुर्तता होत नसल्याचे दिसत आहे. याबाबत पोलीस आयुक्तांनीही अनेक पत्रव्यवहार केले असून या सुरक्षा रक्षकांच्या प्रश्नाबाबत पुरातत्व विभाग गांभीर्याने बघत नसल्याचे समोर आले आहे. याठिकाणी आज सुरक्षा रक्षक असते तर निश्चितच हा अपघात घडलाच नसता असे मत अनेक नागरिकांनी व्यक्त केले आहे.
जागरूक नागरिकांकडून मिळालेल्या माहितीनंतर जलदगतीने जलद प्रतिसाद पथकाने चांगले काम केल्याचे आयुक्त डॉ. सिंगल यांनी सांगितले. या जखमींना वाचविण्यासाठी इंदिरानगरचे वरिष्ठ पेालिस निरीक्षक नारायण न्याहाळदे, वाहतूक विभागाचे सहाय्यक निरीक्षक सुरेश भाले, जलद प्रतिसाद पथकाचे निरीक्षक टी. आर. नलावडे, एस. यू. हिरे यांच्यासह डी. आर. वाघ, पी. सी. पाटील, एस. जी. शर्मा, आर. टी. सिंग, व्ही. आर. वाघ, डी. व्ही. निकम, एस. यू. माळोदे, एन. ए. ढवळे, बी. बी. धरम, डी. एस. दातीर, एस. आर. निकम, आर. पी. बहिरम, एस. डी. सपकाळे, एस. आर. बुचडे, व्ही. ए. जाधव, ए. ए. भवर, एन. ए. शेख, एस. एम. कोळी या कर्मचाऱ्यांनी विशेष परिश्रम घेतले.
सुरक्षाव्यवस्था गरजेची
पांडवलेणी परिसरात दररोज पर्यटकांची संख्या वाढत असतानाही या ठिकाणी आवश्यक सुविधा नाहीत. अनेकदा नागरिकांकडून मागणी होऊनही येथील समस्या सुटत नसल्याचे अनेकदा लक्षात आले आहे. तसेच धोकादायक असलेल्या भागाजवळ फलकसुद्धा लावलेले नसल्याने नवख्या पर्यटकांना किंवा ट्रेकिंग करणाऱ्यांना अडचणी येतात. येथे योग्य ती सुरक्षाव्यवस्था असण्याची गरज व्यक्त करण्यात येत आहे.
सुटीच्या दिवशी ट्रेकिंगला जाताना संरक्षणाच्या हेतूने नागरिकांनी आवश्यक साहित्य बरोबर ठेवणे आवश्यक आहे. सोबत प्रशिक्षक असावा. पुरातत्व विभागाला याठिकाणी सुरक्षा रक्षक नेमण्याच्या सूचना यापूर्वीच करण्यात आल्या आहेत. आताही या घटनेनंतर तातडीने पत्रव्यवहार करण्यात येणार आहे.
- डॉ. रवींद्रकुमार सिंगल
मोबाइल अॅप डाउनलोड करा आणि राहा अपडेट
