वर्षपूर्ती सत्तेची- प्रभाग १
रामनाथ माळोदे, पंचवटी
प्रभाग एक हा परिसर गावठाण आणि नव्याने वाढत असलेल्या लोकवस्तीचा परिसर असून, या प्रभागातील समस्याही वाढत आहेत. नव्या वसाहतीत वाढ होत असताना त्या भागात मुलभूत सुविधा पुरविण्यावर भर देण्याची गरज भासत आहे. नाशिक महापालिकेच्या सहाव्या पंचवार्षिक निवडणुकीनंतर नव्याने निवडून आलेल्या लोकप्रतिनिधींच्या कामकाजाला एक वर्षपूर्ण झाल्यानंतरही प्रभाग एकच्या परिसरातील जुन्या समस्या तशाच आहेत.
प्रामुख्याने रस्त्यांची समस्या सर्वात जास्त प्रमाणात भेडसावत असल्याचे दिसते. अनेक रस्त्यांचे खडीकरण झालले असले तरी डांबरीकरण नसल्यामुळे रस्त्यांची दुरवस्था झाली आहे. म्हसरुळ-आडगाव हा डीपी रस्ता असूनही तो अत्यंत अरुंद आहे. अरुंद, वळणाचा आणि धोकेदायक असलेला हा रस्ता सध्या अपघातांना निमंत्रण देणारा ठरत आहे. या रस्त्याचे रुंदीकरण झाल्यास गुजरातकडे जाणारी अवजड वाहतूक करणारी वाहने आडगावपासून या रस्त्याने वळविता येऊ शकतील. त्यामुळे शहरातील वाहतूक कमी होण्यास मदत होईल. सूर्यवंशी मळ्याजवळील पूलही दोन्ही बाजूने धोकादायक झालेला आहे.
म्हसरुळ गावठाण परिसरात विद्युत केबल टाकण्यात आलेल्या आहेत. तरीही विद्युत पोलवरील तारांचे जाळे अजूनही तसेच आहे. आळंदी कालव्याचा रस्ता डांबरीकरण करण्यात आलेला नाही. त्यामुळे या भागातील मळे परिसरातील नागरिकांना त्याचा त्रास सहन करावा लागतो. या रस्त्यांवर पथदीप नसल्यामुळे चोऱ्या, घरफोड्या यांची भीती येथील रहिवाशांच्या मनात कायम घर करून असते. पौराणिक महत्त्त्व असलेल्या सीता सरोवराच्या सुशोभीकरणाचा प्रश्न अजूनही प्रलंबितच आहे. म्हसरुळ सार्वजनिक वाचनालयाच्या समोरच कचराकुंडी आहे. मांसविक्री केली जात असल्यामुळे या भागातील दुर्गंधी त्रासदायक ठरत आहे. महिलांच्या सुलभ शौचालयाची दुरवस्था झाली आहे. बोरगड भागातील नव्याने झालेल्या वसाहतीचे रस्ते अजूनही कच्चे आहेत. कलानगर परिसरात नव्याने झालेल्या बांधकामांच्या ठिकाणचे कच्चे रस्ते त्रासदायक ठरत आहेत. येथे सध्या सफाई करण्यासाठी कामगार येत आहेत. गोळा केलेला कचरा येथेच जाळण्यात येत असल्यामुळे सर्वत्र धुराच्या समस्येला येथील नागरिकांना तोंड द्यावे लागत आहे. मोकळ्या भूखंडांच्या जागी पाणी तुंबत असल्याने पावसाळ्यात ही समस्या गंभीर होत असल्याच्या नागरिकांच्या तक्रारी आहेत. घंटागाडी वेळेवर येते, बहुतांशी भागात पिण्याचे पाणी पुरेशा प्रमाणात येत आहे.
ही कामे प्रस्तावित
म्हसरुळ गजपंथ सोसायटी, फिटनेस सोसायटी, टी. बी. सॅनिटोरिअमलगतची वसाहत, वैदूवाडी, राजवाडा येथे पाइपलाइन टाकणे, जिजामाता उद्यान, शिवसमर्थ उद्यान, वृंदावन नगर उद्यान आदी ठिकाणी पथदीप सुरू करणे, म्हसरुळ येथील खुल्या जागेत पाथवे, गुलमोहर नगर येथे पाथवे, एकता नगर, बोरगड येथे संरक्षक भिंत, पाथवे, उद्यानांचा विकास आदी कामांना मंजुरी मिळालेली आहे. सुमारे १५ कोटी रुपयांची कामे प्रस्तावित आहेत.
लोकप्रतिनिधी म्हणतात...
शहराची जबाबदारी सांभाळताना प्रभागाकडे दुर्लक्ष होऊ दिले नाही. प्रभाग एकमधील पाणीपुरवठा, उद्यान, विद्युत, बांधकाम आदी विकासकामे मंजूर करण्यावर भर दिला आहे. अनेक कामांची वर्क ऑर्डर निघालेली आहे. ती कामे लवकरच पूर्ण करण्यात येतील.
- रंजना भानसी, महापौर
अनेक विकासकामांना मंजुरी मिळालेली आहे. एलईडीचा प्रश्न प्रलंबित असल्यामुळे पोल उभे असूनही त्यावर दिवे बसविता आले नाहीत. पावसाळ्यापूर्वी खडीकरण करण्यात आलेले रस्ते डांबरीकरण होणे गरजेचे आहे. प्रभागात १५ कोटी रुपयांची कामे प्रस्तावित आहेत. ही कामे लवकर करण्याचा आमचा प्रयत्न आहे.
अरुण पवार, नगरसेवक
प्रभागात विविध विकासकामांना मंजुरी मिळालेली आहे. ही कामे पूर्ण करण्यावर प्रभागातील सर्व सहकारी नगरसेवक भर देत आहेत. नागरिकांच्या समस्या सोडविण्याचा प्रयत्न केला जात आहे. मंजूर कामे लवकरात लवकर पूर्ण केली जातील.
- गणेश गिते, नगरसेवक
नागरिक म्हणतात...
म्हसरुळ येथील सीतासरोवराला पौराणिक महत्त्व असून, हे सरोवर दुर्लक्षित राहिलेले आहे. ठराविक भागातच पथदीप बसविण्यात आलेले आहेत. सुलभ शौचालयात स्वच्छता चांगल्या प्रकारे केली जात नाही. प्रभागात नव्या वर्षात नवीन असे काही मिळाले नाही.
- बाळासाहेब उखाडे, नागरिक
प्रभागात सर्वांगिण विकासासाठी अद्याप भरपूर वाव आहे. प्रभागाला महापौरपद लाभले आहे. त्या माध्यमातून प्रभागात चांगल्या योजना राबविण्याची संधी आहे. लोकप्रतिनिधींचा अनुभव आणि नवीन कल्पना यांची सांगड घालून नागरिकांच्या अपेक्षा जाणून काम केल्यास प्रभागाचा कायापालट करता येऊ शकेल.
- प्रवीण जाधव, नागरिक
--
प्रभागात समाविष्ट भाग - म्हसरुळ गावठाण, म्हसरुळ मळे परिसर, पेठरोड, गोरक्षनगर, टी. बी. सॅनिटोरियम, स्नेहनगर, प्रभातनगर, गुलमोहरनगर, एकतानगर, बोरगड, पुष्पकनगर, पोकार कॉलनी, कलानगर, गजपंथ सोसायटी आदी.
प्रभागाची लोकसंख्या - १८,३३६
मोबाइल अॅप डाउनलोड करा आणि राहा अपडेट
