नाशिकरोड विभागात सर्वात जास्त निधी मिळूनही कामे नाही
म. टा. वृत्तसेवा, नाशिकरोड
जास्तीत जास्त विकासकामे खेचून आणण्याचा प्रयत्न करणारे नगरसेवक, निवडणुकीनंतर वर्चस्ववादाची सुरू झालेली लढाई, पालिकेतील राजकारणाचा बळी पडल्याने विकासकामांना लागलेला ब्रेक, एकमेकांना पाण्यात बघण्याची लागलेली शर्यत अशी ओळख सध्या क्रमांक २० ची झालेली आहे.
नाशिकरोड विभागातील सर्व प्रभागांत सर्वात जास्त निधीची विकासकामे याच प्रभागात मंजूर झालेली आहेत. मात्र त्यातही काही कामांना ब्रेक लागल्याचे दिसत आहे. गेल्या निवडणुकीत या प्रभागातील नागरिकांनी भाजपला शंभर टक्के साथ दिली असली तरी या प्रभागातील भाजपच्याच काही नगरसेवकांना विरोधी पक्ष नेत्यांपुढे आपली गाऱ्हाणी मांडावी लागत असल्याचे चित्र दिसून येत आहे.
प्रभाग क्र.२० चा विस्तार पूर्णपणे शहरीभागात असून, या प्रभागात संभाजी मोरुस्कर आणि संगीता गायकवाड या दोन नगरसेवकांचा मोठा प्रभाव आहे. सीमा ताजणे यांची दुसरी टर्म असूनही त्यांचे अद्यापही चाचपडत प्रयत्न सुरू आहेत. तर अंबादास पगारे यांची नगरसेवकपदाची पहिलीच टर्म असल्याने त्यांचा गृहपाठ सुरू आहे. गेल्या वर्षभरात प्रभागात विकासकामे सुरू करण्यात अंबादास पगारे आणि सीमा ताजणे यांना भोपळाही फोडता आला नाही. तर संगीता गायकवाड यांचे प्रगतीपुस्तकावरही समाधानकारक गुण नोंदवलेले नाही. विकासकामांना ब्रेक लागल्याने त्यांनी सामाजिक उपक्रमांतून दांडगा लोकसंपर्क प्रस्थापित केला आहे. संभाजी मोरुस्कर यांनी मात्र काहीशी आघाडी घेतलेली असून, सर्वांत जास्त निधीची विकासकामांचे टेंडर झालेले आहे.
प्रभागात समाविष्ट भाग
जिमखाना वसाहत, आशानगर, विजयनगर, रामनगर, मोटवानी रोड, शांती पार्क, साने गुरुजी नगर, चंद्रमणी नगर, अजंठानगर, शिखरेवाडी, नेहरूनगर वसाहत, आयशर इस्टेट, बिटको कॉलेज परिसर, दत्तमंदिर असा मोठा विस्तार या प्रभागाचा आहे. या प्रभागात मध्यमवर्गीयांचा भरणा अधिक आहे. संजय गांधी नगर, महात्मा फुले नगर आणि जेतवननगर हा स्लम भागही यात समाविष्ट आहे.
लोकसंख्या : ४४,७६५
वर्षभरात झालेली कामे
प्रभाग २० 'ड' मध्ये शिखरेवाडी बॅडमिंटन हॉल शेजारी पाथवे व स्वच्छतागृह, रोझा कॉलनीसमोरील रस्ता काँक्रिटीकरण, झवेरी कॉलनीतील खुल्या जागेस कंपाऊंड, शिखरेवाडी बॅडमिंटन हॉलचे पत्रे बदलणे व विद्युतीकरण, फुलेनगर व संजय गांधी झोपडपट्टी येथे शौचालय, साने गुरुजी नगर व विद्यानगरी उद्यानात प्रकाशव्यवस्था, साने गुरुजी नगरातील खुल्या जागेवर स्टेज व पाथवे, सोमाणी गार्डनमध्ये गझिबो, 'अ' आणि 'ब' गटात एकही काम झालेले नाही. तर 'क' गटात प्रकाश नगर गार्डन दुरुस्ती, आयशर इस्टेट गार्डन दुरुस्ती ही कामे झालेली आहेत. तर शिखरेवाडी मैदान विकास, प्रकाश नगर जलवाहिनी, त्र्यंबक नगर गार्डन दुरुस्ती ही कामे सुरू आहेत.
मंजूर कामे
अ गट : प्रकाशनगर रस्ता दुरुस्ती व गंधर्वनगरी भुयारी गटार दुरुस्ती, ब गट : श्री कलानगर ओपन स्पेसमध्ये गार्डन विकसित करणे, ग्रीन जिम, टेनिस कोर्ट आणि बास्केटबॉल कोर्ट, क गट : तुळसा पार्क,पंजाब कॉलनी व स्नेहबंधन कॉलन रस्ता डांबरीकरण, ऑक्टोगोनस पोल दत्तमंदिर ते गुरुद्वारा रोड, लोणकर मळा उद्यान, ड गट : सहाणे मळा महिला स्वास्थ केंद्र, विद्याविहार कॉलनी महिला व्यायामशाळा, मनोहर गार्डन महिला अभ्यासिका, स्वयंसिद्धी महिला केंद्र विस्तारीकरण, देवळाली मनपा अभ्यासिका सोलर सिस्टिम, देवळाली महिला स्वास्थ केंद्र, जयभवानी रोड निसर्गोपचार केंद्र जॉगिंग ट्रॅक व कंपाऊंड वॉल, जेलरोड मनपा शाळा १११, ११३, व क्र ७ इमारत दुरुस्ती व रंगकाम, जेतवननगर शाळा क्र. ११० इमारत दुरुस्ती, केला शाळेलगत भाजी मार्केट ओटे, शिखरेवाडी कारंजा सुशोभीकरण, साने गुरुजी नगर ग्रीन जिम, शिखरेवाडी ग्रीन जिम, महिला स्वास्थ केंद्र दुरुस्ती, समाजमंदिर विद्युतीकरण, बेला डिसुझा रोड जलकुंभ, जिजामाता नगर ड्रेनेज लाईन, मालाणी भवन ड्रेनेज लाईन, पाटोळे मळा आरसीसी पाईप गटार, जेलरोड रस्ता दुभाजक सुशोभीकरण, झवेरी कॉलनी उद्यान ही कोट्यवधी रुपये खर्चाची कामे मंजूर असून, या प्रभागात प्रस्तावित कामांचीही संख्या मोठी आहे.
लोकप्रतिनिधी म्हणतात...
गेल्या वर्षभरात प्रभागाच्या गरजेनुसार विविध विकासकामे मंजूर करून घेतलेली आहेत. मात्र नगरसेवक निधी खर्च झालेला नाही. अजून मोठा कालावधी बाकी असल्याने लवकरच मंजूर कामे प्रत्यक्षात सुरू होतील.
-अंबादास पगारे, नगरसेवक
विविध विकासकामे मंजुरीच्या प्रतीक्षेत आहेत. अद्याप एकही विकासकाम झालेले नाही. नगरसेवक निधीही अखर्चित आहे.
-सीमा ताजणे, नगरसेविका
काही विकासकामांना मंजुरी मिळालेली आहे.परंतु सध्या कामे थांबलेली आहेत.दोनच विकासकामे पुर्ण झालेली आहेत.काही विकासकामांचे लवकरच उद्घाटन केले जाणार आहे.
-संगीता गायकवाड, नगरसेविका
स्वच्छता, पाणीपुरवठा, ड्रेनेज, पेस्ट कंट्रोल या मुलभूत सुविधाविषयक कामे मार्गी लावली. आयुक्तांनी नव्याने केलेले बजेट नाशिक शहराच्या सर्वांगीण विकासाला हातभार लावणारे असून, त्यात नद्यांचे शुद्धीकरण, सांडपाणी व्यवस्था, शहर बससेवा, एलईडी, खेड्यांचा विकास या योजनांना प्राधान्य दिले गेले आहे. त्यामुळे मंजूर कामे थोडी उशिरा पूर्ण होतील.
-संभाजी मोरुस्कर, नगरसेवक
नागरिक म्हणतात...
स्थानिक नगरसेवक प्रभागातील नागरिकांशी संपर्क ठेवून असतात. समस्या थेट मांडण्याचा विश्वास निर्माण झाला असून, सुरुवातीला सुरू केलेली कामे मात्र आता थांबली आहेत.
-आचल राजे, नागरिक
सध्याचे नगरसेवक दिलेल्या शब्दाप्रमाणे काम करण्याचा प्रयत्न करीत आहेत. स्वच्छता, पिण्याचे पाणी आणि स्ट्रीट लाईट या मुख्य समस्या होत्या. परंतु, या समस्या तातडीने सोडविण्यात आल्या आहेत.
-शशिकांत अमृतकर, नागरिक
नगरसेवकांचा सामान्य नागरिकांची संपर्क आहे, मात्र विकासकामे झालेली नाहीत. यामध्ये पथदीप आणि रस्त्यांची समस्या मात्र कायम आहे. बहुतेक रस्ते खराब झालेले आहेत. वाळलेल्या झाडांकडेही दुर्लक्ष झाले आहे.
-सारिका सागर, नागरिक
प्रभागात विशेष विकासकामे झालेली नाहीत. पथदीपांची समस्या कायम आहे. काही ठिकाणी रस्ते दुरुस्तीचीही आवश्यकता आहे. किरकोळ तक्रारींची दखल नगरसेवकांकडून घेतली जाते मात्र, पार्किंगची समस्या सोडविण्यासाठी प्रयत्न झाले पाहिजे.
-राकेश कुमावत, नागरिक
मोबाइल अॅप डाउनलोड करा आणि राहा अपडेट