नाशिकला होणार आणखी एक उद्योगनगरी

March 23, 2018, 3:58 pm

≫ Next: ट्रकची रुग्णवाहिकेला धडक; तीन ठार

≪ Previous: खबरदार, सार्वजनिक ठिकाणी झुरका माराल तर!

म. टा. खास प्रतिनिधी, नाशिक
नाशिकमध्ये अंबड व सातपूर येथे औद्योगिक वसाहतीला जागा शिल्लक नसल्यामुळे एमआयडीसीने मुंबई-आग्रा महामार्गावर विल्होळीजवळील राजूर बहुला येथे १४४ हेक्टर जमीन संपादन करण्याचा निर्णय घेतला असल्याची माहिती एमआयडीसीचे जॉइंट सीईओ अभिषेक कृष्णा यांनी दिली.

नाशिकमध्ये अनेक मोठ्या उद्योजकांना गुंतवणूक करण्याची इच्छा असली तरी जागा शिल्लक नसल्यामुळे त्यांनी पाठ फिरवली. त्यामुळे एमआयडीसीने हा निर्णय घेतला आहे. गेल्या काही दिवसांपासून नाशिकलगत जागा घ्यावी व येथे भूखंड पाडावे अशी मागणी उद्योजकांनी केली होती. त्यानंतर हा निर्णय घेण्यात आला आहे. नाशिकमध्ये एमआयडीसीमध्ये सातपूर औद्योगिक क्षेत्र ६२५.७३ हेक्टरमध्ये वसले असून, त्यात १२२२ भूखंड आहे. त्याचप्रमाणे अंबड येथील औद्योगिक वसाहत ५१५.५० हेक्टरमध्ये वसली असून, त्यात १६१६ भूखंड आहेत. पण, यातील एकही भूखंड नव्या उद्योगासाठी शिल्लक नाही.
जागा नसल्यामुळे गेल्या काही वर्षात नाशिकमध्ये एकही मोठा उद्योग आला नाही. त्यामुळे मोठ्या उद्योगांनी गुंतवणूक करावी यासाठी ‘मेक इन नाशिक’सह विविध उपक्रम औद्योगिक संघटनेने केले. त्यानंतर अनेक उद्योगांनी गुंतवणूक करण्याची तयारीसुद्धा दाखवली. एमआयडीसीने जिल्ह्यातील इतर ठिकाणी जागा दाखवली. मात्र, त्या जागांवर उद्योग येण्यास उत्सुक नसल्यामुळे आता एमआयडीसीने ही नवीन जागा घेण्याचा निर्णय घेतला आहे.

पांजरापोळ जागेची मागणी
एमआयडीने पांजरापोळची जागा घ्यावी अशी मागणी उद्योजकांच्या संघटनेने केली. त्यावरही एमआयडीसीने विचार सुरू केला आहे. त्यामुळे येत्या काळात नाशिकलगत मोठी जागा उपलब्ध होणार आहे.

तिसरी औद्योगिक वसाहत
शहरात सातपूर आणि अंबड अशा दोन औद्योगिक वसाहती आहेत. आता राजूर बहुला येथे नवी वसाहत निर्माण होणार असल्यामुळे ती तिसरी वसाहत ठरेल. या ठिकाणी मोठ्या प्रमाणात गुंतवणूक होण्यासह रोजगार निर्मितीही होणार आहे. परिणामी ही बाब नाशिक शहरासह जिल्ह्याच्या विकासाला पूरक ठरणार आहे. उद्योजकांकडून या निर्णयाचे स्वागत होत आहे.

Latest Images