शहर परिसर

लुटमारीला मोकळी वाट

बाटलीबंद पाणी छापील किमतीपेक्षा जास्त दराने विकता येण्याची मुभा न्यायालयाच्या निर्णयामुळे व्यावसायिकांना मिळाली आहे. व्यावसायकांनी काहीही किमतीत विकायचे आणि ग्राहकांनी ते का घ्यायचे? त्यामुळे छापील किंमत द्यायचीच कशाला? ही लुटमारीला मोकळी वाटच आहे.

-सुभाष काळे

कॉलेजरोड

दररोज वाहतूक कोंडी

कॉलेजरोडवर सध्या दररोज सायंकाळी वाहतुकीची कोंडी होताना दिसते. त्याची कुठलीही दखल घेतली जात नाही. येथे पोलिसदेखील तैनात नसतात. त्यामुळे येथील वाहतुकीला शिस्तच राहिलेली दिसत नाही. त्याचा जाच अन्य वाहनचालक व स्थानिक रहिवाशांनी किती दिवस सहन करायचा.

-सागर घुगे

पेठरोड

घंडागाडी आणि कचरा

ओंकारनगर, पेठरोड येथे एसटी वर्कशॉपच्या भिंतीलगत असा कचरा कायमच साचलेला असतो. तो वेळच्या वेळी उचलला जात नाही. त्यामुळे या परिसराची जणू कचराकुंडीच झाली आहे. येथे घंटागाडी चार दिवसांनी येत असल्याचा हा परिणाम आहे. संबंधितांनी याची दखल घ्यावी.

-संदीप कापरे

लेखानगर

जीवघेणा खड्डा

लेखानगर येथील स्टेट बँकेजवळ पाणी सोडण्यासाठी केलेला खड्ड्यावर झाकण न ठेवता तो उघडा ठेवलेला आहे. तेथे पाणीगळती होते व कचराही साचलेला आहे. या ठिकाणी गाडी पार्क करताना किंवा पायी चालणाऱ्या व्यक्तीस खड्डा न दिसल्यास अपघात होऊ शकतो. येथे त्वरित उपाययोजना व्हावी.

-हेमंत काळे

सिडको

कबुतराला जीवनदान...

गणेश चौक परिसरातील गणपती मंदिराच्या आवारात नुकतेच जखमी कबुतर आढळून आले. परिसरातील पक्षीप्रेमींना त्याची माहिती समजताच त्यांनी त्याला पाणी देऊन प्राथमिक उपचार केले. पक्षीप्रेमींनी वेळीच केलेल्या धावपळीमुळे या कबुतराला जीवनदान मिळाळे. त्याची भरारी पाहून सर्वांनी समाधान व्यक्त केले.

-संदीप देवांग

(सिटिझन रिपोर्टर)

किरकोळ फेरबदलासह ४१२ कोटीचे अंदाजपत्रक

म. टा. वृत्तसेवा, मालेगाव

येथील महापालिकेत सोमवारी आयोजित अंदाजपत्रकीय महासभेत चर्चेअंती जमा व खर्च बाजूत किरकोळ फेरबदल सुचवीत महासभेने मंजुरी दिली. महापौर रशीद शेख यांना फेराफारीचे अधिकार महासभेत प्रदान करण्यात आले. अंदाजपत्रकात सुमारे १५ कोटीची  वाढ अपेक्षित असून एकूण ४१२ कोटी रुपयांचेचे अंदाजपत्रक मंजूर करण्यात आले. 

येथील महापालिकेच्या जुन्या सभागृहात सोमवारी अंदाजपत्रकीय महासभेचे आयोजन करण्यात आले होते. महापौर रशीद शेख, उपमहापौर सखाराम घोडके, आयुक्त संगीता धायगुडे, नगरसचिव राजेश धसे आदींच्या उपस्थिती महासभा झाली. धायगुडे यांनी नागरिकांच्या मुलभूत सोई सुविधांना प्राधान्य देत ३८२ कोटीचे अंदाजपत्रक स्थायी समितीस सादर केले. स्थायी समितीच्या बैठकीत अंदाजपत्रकावर चर्चा होवून स्थायीने १५ कोटीची वाढ सुचवीत महासभेपुढे ३९७ कोटीचे अंदाजअपत्रक मंजुरीसाठी सादर केले होते. 

नागरिकांवर कोणतीही करवाढ या अंदाजपत्रकात करण्यात आलेली नाही. तसेच नगरसेवकांना आपापल्या प्रभागात नगरसेवक निधी व्यतिरिक्त विकास कामांसाठी १६ लाख रुपयांचा निधी खर्च करण्याची तरतूद यात करण्यात आली. तर विकास निधीत सुमारे दहा कोटीची वाढ सुचविण्यात आली. सुमारे दोन तास चर्चेनंतर महासभेने किरकोळ फेरबदलासह महापौर शेख यांना अधिकार प्रदान करीत अंदाजपत्रकास मंजुरी दिली. यावेळी चर्चेत एमआयएम गटनेते डॉ. खालिद परवेज, आघाडीचे गटनेते बुलंद इक्बाल, भाजप गटनेते सुनील गायकवाड, शिवसेना गटनेते नीलेश आहेर, नगरसेवक अब्दुल मलिक आदींनी सहभाग घेतला. 

१५ कोटींची वाढ

अंदाजपत्रकीय महासभेत प्रारंभी स्थायी समिती सभापती सलीम अन्वर यांनी प्रास्ताविक करीत महासभेपुढे अंदाजपत्रक मांडले. यानंतर लेखाअपरीक्षक कमरुद्दीन शेख यांनी क्रमशः या अंदाजअपत्राकातील जमा व खर्च बाजूच्या तपशिलासह वाचन केले. यावेळी आयुक्त धायगुडे यांनी महापालिकेच्या मालमत्ता कर वसुली विषयी निवेदन करताना सांगितले की, पालिका प्रशासनास ९० टक्के वसुलीचे उद्दिष्ट देण्यात आले असून आत्तापर्यंत ६० टक्के वसुली झाली असल्याने पालिकेच्या जमा बाजूत मोठी वाढ झाली आहे. यानंतर महापालिका दर व कर यावर उपस्थित नगरसेवकांनी चर्चा करीत अपेक्षित वाढ सुचवली. यात स्थानिक संस्था कर, सिनेमा कर, बीफ व मटन स्लॉटर भाडे, हॉकर्स गाळे भाडे आदी उत्पन्नच्या बाजूंवर चर्चा होवून सुमारे १५ कोटीची वाढ सुचविण्यात आली.

साश्रू नयनांनी जवानास निरोप

म. टा. वृत्तसेवा, मालेगाव

तालुक्यातील गिगाव येथील लष्करातील जवान प्रवीण सुदाम पाटील (वय २४) याचा रविवारी अपघातात दुर्दैवी मृत्यू झाला. सोमवारी त्याच्यावर शासकीय इतमामात अंत्यसंस्कार करण्यात आले. यावेळी गिगाव ग्रामस्थांसह पंचक्रोशीतील नागरिकांनी साश्रू नयनांनी प्रवीणला अखेरचा निरोप दिला. 

 १२ उत्तीर्ण झाल्यानंतर घरातील गरिबीची परिस्थिती असताना देखील त्याने जिद्दीने सैन्यदलात प्रवेश मिळवला होता. सध्या तो सिकंदराबाद येथील युनिटमध्ये लष्करी सेवेत होता.  आपल्या भावी आयुष्यातील जोडीदाराचा शोध घेण्यासाठी प्रवीण सुट्टीवर आला होता. रविवारी मालेगाव-चाळीसगाव रस्त्यावर अपघातात प्रवीण जागीच ठार झाला. त्याचा साथीदार जयदीप मराठे जखमी झाला होता. सोमवारी त्याच्यावर शासकीय इतमामात गिगाव येथील स्मशानभूमीत अंत्यसंस्कार करण्यात आले. यावेळी सैन्य दाल्याच्या वतीने त्यास मानवंदना देण्यात आली. प्रशासनाच्या वतीने तहसीलदार ज्योती देवरे, पोलिस निरीक्षक के. के. पाटील, जिल्हा सैनिक कल्याण अधिकारी बाळासाहेब सातपुते उपस्थित होते. प्रवीणच्या पश्चात आई, वडील, भाऊ असा परिवार आहे. 

पोलिस वसाहतीचा पाणी पुरवठा बंद

दहा दिवसांपासून पाणी प्रश्नाने कर्मचारी त्रस्त

म. टा. प्रतिनिधी, नाशिक

यंदाचा उन्हाळा आताच तापदायक वाटत असला तरी नाशिककरांना घाम फोडेल अशी एक गरम बातमी आहे. नाशिकसह उत्तर महाराष्ट्रात यंदा तापमानाचा पारा ४१ अंश सेल्सियसच्या पुढे जाईल, असा अंदाज वर्तवला जात आहे. तप्त झळांना सामोरे जाण्यासाठी नाशिककरांनी सज्ज राहावे, असे आवाहन हवामान तज्ज्ञांकडून करण्यात आले आहे.

रविवारी नाशिकचे कमाल तापमान ३७.३ अंश सेल्सियस ऐवढे नोंदविण्यात आले होते. सोमवारी हेच तापमान ३८.१ अंश सेल्सियसवर पोहोचले. किमान तापमानातही ६.१ अंश सेल्सियसने वाढ होऊन ते १६.६ अंशांपर्यंत पोहोचले. येत्या ४८ तासांमध्ये नाशिकसह उत्तर महाराष्ट्रात कमाल तापमानात दोन अंश सेल्सियसपर्यंत वाढ होईल, असा अंदाज वर्तविण्यात आला आहे. दक्षिणेकडून उत्तरेकडे येणाऱ्या उष्ण लाटांमुळे उत्तर कोकण, उत्तर महाराष्ट्रासह मुंबईतील तापमानात दोन अंश सेल्सियसने वाढ होण्याची शक्यता हवामान तज्ज्ञांकडून व्यक्त केली जाऊ लागली आहे. त्यामुळे नाशिक, मालेगावसह जळगावकरांना यंदा तप्त झळांचा सामना करावा लागण्याची शक्यता आहे. यापूर्वी मुंबई, ठाण्यात १९५६, २०११ मध्ये तापमानाचा पारा ४१ अंशांच्या पुढे गेला होता. यंदाही तो ४१ अंश सेल्सियसच्या पुढे सरकरण्याची शक्यता आहे.

क्राइम डायरी

०००००००

किरकोळ कारणावरून

तरुणावर चाकू हल्ला

..

म. टा. प्रतिनिधी, नाशिक

किरकोळ कारणातून चौघांनी तरुणावर चाकू हल्ला केल्याची घटना कॉलेजरोड भागात घडली. या प्रकरणी गंगापूर पोलिस स्टेशनमध्ये गुह्याची नोंद करण्यात आली आहे. हल्ल्यानंतर हल्लेखोर पसार झाला असून, पोलिस तपास करीत आहेत.

नाविन्या चव्हाण उर्फ डोन्या, ऋषीकेश गरड, अथर्व सानप आणि त्यांचा एक साथीदार अशी संशयित आरोपींची नावे आहेत. या प्रकरणी आकाश मधुकर कुरणेकर (मिशनमळारोड, शरणपूररोड) या तरुणाने तक्रार दिली आहे. आकाश कुरणेकर हा शनिवारी सायंकाळी कॉलेजरोडवरील अकबर सोडा दुकान परिसरातील विजू दाबेली समोर उभा होता. तिथे आलेल्या संशयितानी आकाशला रंगपंचमीच्या दिवशी माज आला होता का? असा प्रश्न करीत त्याच्यावर हल्ला चढविला. संशयितांकडून लाथा बुक्यांनी मारहाण होत असतांना आकाशचा मित्र सुनंद आहिरे याने वाद मिटविण्याचा प्रयत्न केला. यावेळी संशयित नाविन्या आणि ऋषीकेश गरड यांनी त्याच्यावर चाकू हल्ला केला. घटनेचा अधिक तपास सहाय्यक निरीक्षक बुराडे करीत आहेत.

राठी अमराईत लॅपटॉपची चोरी

दरवाजा उघडा असलेल्या घरात घुसून चोरट्यांनी लॅपटॉप चोरून नेला. ही घटना गंगापूररोड भागातील राठी अमराई परिसरात घडली. या प्रकरणी सरकारवाडा पोलिस स्टेशनमध्ये गुन्हा दाखल करण्यात आला आहे.

कोमल अशोक राजगिरे (रा. महेश सोसा. राठी अमराईजवळ) यांनी दिलेल्या फियार्दीनुसार, १३ सप्टेंबर २०१७ रोजी राजगिरे सकाळी केटीएचएम कॉलेजमध्ये सेमिनारसाठी गेल्या होत्या. या दरम्यान उघड्या घरात प्रवेश करून चोरट्यांनी सुमारे १२ हजार रुपयांचा लॅपटॉप चोरून नेला. घटनेचा अधिक तपास हवालदार सातभाई करीत आहेत.

मैत्रिणीच्या दागिण्यांवर डल्ला

गप्पा मारण्याच्या बहाण्याने घरात घुसलेल्या महिलेने आपल्या मैत्रिणीच्या दागिण्यांवर डल्ला मारल्याची घटना सिडकोतील रायगड चौक भागात घडली. या प्रकरणी अंबड पोलिस स्टेशनमध्ये गुह्याची नोंद करण्यात आली. पोलिसांनी संशयित महिलेस अटक केली आहे.

पल्लवी भदाणे (रा. रायगड चौक, सिडको) असे अटक केलेल्या संशयित महिलेचे नाव आहे. या प्रकरणी सुनिता नंदकिशोर सोनजे (रा. रायगड चौक) यांनी तक्रार दिली. शेजारी-शेजारी राहणाऱ्या दोघी महिला मैत्रिणी आहेत. संशयित पल्लवी भदाणे ही सुनिता सोनजे यांच्याकडे शनिवारी (दि. २४) दुपारी गप्पा मारण्यासाठी गेली. यावेळी सोनजे या कामात व्यस्त असल्याचे बघून संशयित महिलेने डब्यात ठेवलेले सुमारे ३८ हजार ५०० रुपयांचे दागिने चोरून नेले. ही घटना घरातील लहान मुलाने बघितल्याने उघड झाली. संशयित महिलेस पोलिसांनी अटक केली आहे. घटनेचा अधिक तपास हवालदार सोनवणे करीत आहेत.

जनमाहिती अधिकाऱ्यास दणका

राज्य माहिती आयुक्तांकडून २५ हजारांचा दंड

म. टा. प्रतिनिधी, नाशिक

जुम्मा मस्जीद चॅरिटेबल ट्रस्टचे (वक्फ) अभिलेख जुम्मा चॅरिटेबल ट्रस्टकडे वर्ग का करण्यात आले नाहीत, ही माहिती देण्यास टाळटाळ करणाऱ्या जनमाहिती अधिकारी (विधी), धर्मादाय आयुक्त यांना राज्य माहिती आयुक्त अजितकुमार जैन यांनी २५ हजार रूपयांचा दंड ठोठवला आहे.

या प्रकरणी अॅड. दिलावरखान पठाण यांनी अर्ज सादर केला होता. जुम्मा मस्जीद चॅरिटेबल ट्रस्टच्या मिळकतींबाबत धर्मादाय आयुक्त विभागाने परिपत्रक जारी केले होते. याविरोधात नाशिकसह राज्यातील इतर धार्मिक संस्थांनी मुंबई हायकोर्टात २००४ मध्ये धाव घेतली होती. या प्रकरणी २०११ रोजी हायकोर्टाने आपला निकाल सुनावला. पण यानंतर पाच ते सहा वर्ष धर्मादाय आयुक्त कार्यालय, मुंबई यांनी धार्मिक संस्थांचे अभिलेख महाराष्ट्र राज्य वक्फ मंडळ, औरंगाबाद यांच्याकडे वर्ग केले नाही. एवढ्या वर्षात हे काम झाले नाही याची माहिती अॅड. पठाण यांनी नाशिकच्या सहधर्मादाय आयुक्तांकडे माहितीच्या अधिकारात माहिती मागितली. सदर प्रकरणात मुंबई हायकोर्टात रिट पिटीशन दाखल असून, म्हणून हे वर्ग करण्यात आलेले नसल्याचे उत्तर देण्यात आले. त्यामुळे पठाण यांनी मुंबईच्या धर्मादाय आयुक्तांकडे माहिती मागितली. पण त्यांना मुदतीत माहिती देण्यात आली नाही. त्यामुळे त्यांनी प्रथम अपील केले. त्यामध्ये धर्मादाय आयुक्तांकडे सुनावणीच घेण्यात आली नाही. त्यामुळे पठाण यांनी राज्य माहिती आयोगाकडे धाव घेतली. १४ मार्च २०१७ रोजी सुनावणी घेऊन आयोगाने संबंधित प्रकरणात दंड का ठोठवण्यात येऊ नये, म्हणून आदेश दिले.

आदेशानंतरही गती नाही

आयोगाच्या आदेशानंतरही धर्मादाय आयुक्त कार्यालयातून हालचाली झाल्या नाहीत. संधी देऊनही धर्मादाय आयुक्त कार्यालयाचे वि. मा. उकरुळकर हजर झाले नाहीत तसेच म्हणणेही मांडले नसल्याने ३ मार्च २०१८ रोजी माहिती आयोगाचे आयुक्त अजितकुमार जैन यांनी उकरुळकर यांना २५ हजार रुपये दंडाची शिक्षा ठोठावली.

पाण्यासाठी संघर्षयात्रा

म. टा. वृत्तसेवा, मालेगाव

तालुक्यातील  येथील टेहरे येथे वांजुळपाणी संघर्ष समितीतर्फे संघर्ष यात्रेच्या पहिल्या टप्प्याला सोमवारी सुरुवात करण्यात आली. बैलगाडीवर संघर्ष यात्रेचे फलक लावून टेहरे गावातून जनजागृती फेरी  काढून राम मंदिर येथे बैठक घेण्यात आली. यावेळी गावातील युवक व ज्येष्ठ नागरिक उपस्थित होते. 

पंचायत समिती सदस्य अरुण  पाटील यांनी प्रास्ताविक केले. समितीचे अनिल निकम व कुंदन चव्हाण यांनी  वांजुळपाणी प्रकल्प  गिरणा मोसम खोऱ्यासाठी कसा लाभदायी आहे, याबाबत मार्गदर्शन केले. शेखर पवार यांनी टेहरे गावतील जुन्या आंदोलनाच्या आठवणींना उजाळा देत तरुणांनी या आंदोलनात सहभागी व्हावे, असे आवाहन केले.

प्रा. के. एन. आहिरे  जिल्ह्याचे पालकमंत्री गिरीश महाजन यांच्यावर आरोप केले. महाजन आपल्या हक्काचे पाणी गुजरातला देत असून, त्याबदल्यात फक्त जळगावच्या पदरात काही प्रमाणात पाणी  मिळवून घेत आहेत. हा 'कसमादेना'च्या जनतेवर अन्याय  असून, यावर संरक्षण राज्यमंत्री डॉ. सुभाष भामरे, खा.  हरिशचंद्र चव्हाण व स्थानिक नेते मोदींच्या दबावामुळे काहीही बोलायला तयार नाहीत, असाही आरोप त्यांनी केला. आपल्या हक्काच्या पाण्यासाठी प्रत्येकाने सज्ज झाले पाहिजे असे सांगत या संघर्ष यात्रेत जनतेने सहभागी व्हावे, असे आवाहन त्यांनी केले. चंद्रकांत शेवाळे, विश्वास देवरे यांनीही मनोगत व्यक्त केले. प्रा विजय शेवाळे यांनी आभार मानले. 

'अल्पवयीन' प्रेमवीराचा प्रताप; आईची पोलिसात तक्रार

म. टा. वृत्तसेवा, जेलरोड

प्रेयसीने आपल्या प्रियकराकडे तुझ्या आईचे काळीज आणून दे, असा हट्ट धरला. मुलाने आईस मारले. काळीज काढून घेतले. पळत निघाला... पडला... ते काळीज हातून पडले नि आवाज उमटला, बाळा तुला कुठे लागले तर नाही ना...ही लोककथा तुम्हाला आठवत असेलच! या कथेशी मिळती जुळती कथा प्रत्यक्षात घडली आहे. आपल्या अल्पवयीन मैत्रिणीसाठी मुलाने घरदार सोडले. एवढ्यावरच न थांबता तिच्यासाठी जन्मदात्या मातेला जीवे मारण्याची धमकीही त्याने दिली आहे.

प्रेम हे आंधळे असते, असे म्हणतात. पण इतकेही आंधळे नसावे की ते आपल्या मातेच्या जीवावर उठावे. प्रेमा तुझा रंग कसा... असे म्हणण्यापुरते चांगले वाटत असले तरी त्या प्रेमाचे हिंसक 'रंग' नकोसे वाटतात.

मुंबईतील अल्पवयीन मैत्रिणीसाठी नाशिकमधील एका अल्पवयीन मुलाने घरदार सोडून दिले. तसेच, जन्मदात्या मातेला जीवे मारण्याची धमकीही दिली. ही माता पोलिस दलात सेवेत आहे. तिने मुलाच्या मैत्रिण व तिच्या आई-वडिलांविरुद्ध उपनगर पोलिस ठाण्यात तक्रार दिली आहे. त्यावरून गुन्हा दाखल झाला असून, मुलीच्या आई-वडिलांना ताब्यात घेण्यात आले आहे. त्यांना लवकरच अटक करण्यात येईल, अशी माहिती वरिष्ठ पोलिस निरीक्षक प्रभाकर रायते यांनी दिली.

आईने काबाडकष्टाने वाढवलेला हा मुलगा पूर्ण १७ वर्षांचाही झालेला नाही. तो आई, आजी-आजोबांसह जयभवानीरोडला राहतो. या मातेवरच कुटुंब चालते. गेल्या काही महिन्यांपासून हा मुलगा कुटुंबीयांशी व्यवस्थित बोलत नव्हता. अरेरावीची भाषा करीत होता. आईने विश्वासात घेऊन विचारल्यावर मुंबईतील मुलीशी मैत्री झाल्याचे त्याने सांगितले. आईने समजावून सांगितल्यानंतरही, तो मैत्रिणीचे आई-वडील सांगेल तसेच वागत होता. आपल्या आईशी तो सतत वाद घालू लागला. आईकडे मोठी रक्कम व मोटारसायकलीसाठी तगादा लावत होता. अनेक दिवस तो घरीच येत नव्हता. मुंबईतील या मैत्रिणीच्या घरी मुक्कामी राहत होता.

मुलगा अल्पवयीन असल्याने आईने त्याला समजावून सांगण्याचा अनेकदा प्रयत्न केला. परंतु, त्याने आईला तू मध्ये पडल्यास, तुझा काटा काढीन अशी धमकी दिली.

पैशांसाठी आईवर उगारला चाकू

दि. २३ मार्चला आई रात्री साडेआठला कामावरून घरी आली. मुलाला कोठे होतास अशी विचारणा केल्यावर त्याने वाद घातला व स्वयंपाक घरातील चाकू उगारून पैशांची मागणी केली. तुला संपवून मी मैत्रिणीसोबत या घरात राहणार आहे. तू मध्ये कशी येते बघतोच, असे सांगून आईला ठार मारण्याची धमकी देऊन निघून गेला. तो मैत्रिणीच्या घरी गेल्याचा संशय व्यक्त करून आईने मैत्रिणीसह तिच्या आई वडिलांविरुध्द तक्रार दिली आहे. आपला मुलगा अल्पवयीन असल्याने त्याची दिशाभूल करून मुलीचे आई-वडील माझ्या जीवितास धोका निर्माण करून त्याच्याकडून आर्थिक फायदा करून घेण्याचा प्रयत्न करीत आहेत. मुलाला या कुटुंबाने मुंबईतील घरातच ठेवले आहे, असे तीने तक्रारीत म्हटले आहे. दरम्यान, पोलिसांनी मुंबईला जाऊन मुलीच्या पालकांना नाशिकला आणले आहे. त्यांची रात्री उशिरापर्यंत चौकशी सुरू होती.

म. टा. वृत्तसेवा नाशिकरोड

भुसावळकडून मुंबईच्या दिशेने जाणाऱ्या मंगला एक्स्प्रेसच्या एका बोगीची बोलेस्टर लिंक निखळल्याने नाशिकरोड येथे ही गाडी मोठ्या अपघातातून बालंबाल बचावली. सोमवारी सकाळी सातवाजेच्या दरम्यान ही घटना घडली. गाडीतील एसीकंडक्टर विजय मसराम आणि अनिल झा या दोघांच्या सतर्कतेमुळे मोठा अनर्थ टळला.

सोमवारी सकाळी मंगला एक्स्प्रेस मनमाडकडून नाशिकरोडकडे येत असताना गोदावरी नदीवरील पूल ओलांडल्यानंतर इंजिनपासून आठव्या क्रमांकावरील बी २ या बोगीच्या मागील चाकाखालून काहीतरी घासत असल्याचा मोठा आवाज आल्याचे एसी कंडक्टर विजय मसराम यांच्या लक्षात आले. गाडी ६.४० वाजता नाशिकरोड रेल्वे स्टेशनला येऊन थांबल्यावर विजय मसराम यांनी डाव्या बाजूस खाली उतरून बघितले असता, बोगी पूर्णपणे कललेली व बोगी आणि चाकाचे ॲक्सल यांना धरून ठेवणारी बोलेस्टर लिंक निखळून घासत आलेली आढळून आली. बोगी जमीनीला टेकण्यास अवघे काही इंच उरले होते. तोपर्यंत गाडीला हिरवा सिग्नलही मिळाल्याचे त्यांच्या लक्षात आले. त्यांनी तत्काळ चेन खेचून गाडी थांबवली व भुसावळला वरिष्ठ अधिकाऱ्यांना माहिती दिली. त्यामुळे गाडी नाशिकरोडलाच थांबविण्यात आली. टेक्निकल स्टाफ हजर झाल्यावर या अपघाताचे गांभीर्य लक्षात आले. उजव्या बाजूकडील बोलेस्टर लिंक निखळली असती तर बी २ बोगी प्लॅटफॉर्मला धडकून मोठा अपघात झाला असता. सुदैवाने हा अनर्थ टळला.

म. टा. खास प्रतिनिधी, नाशिक

महापालिकेच्या मूल्यनिर्धारण व करसंकलन विभागाने मार्चचे उद्दिष्ट पूर्ण करण्यासाठी सुरू केलेल्या मालमत्ताजप्तीच्या नोटिसांची फलश्रुती चांगली झाली असून, यंदा गेल्या वर्षीपेक्षा घरपट्टी व पाणीपट्टीतून महापालिका मालामाल झाली आहे. मार्चअखेरपर्यंत महापालिकेला घरपट्टीतून ८७ कोटी ३४ लाख वसूल झाले आहेत. गेल्या वर्षीपेक्षा तब्बल सात कोटींनी वाढ झाली आहे, तर पाणीपट्टीत यंदा विक्रमी वसुली झाली आहे. महापालिकेने यंदाचे उद्दिष्टही पूर्ण केले आहे. पाणीपट्टीचे ४१ कोटींचे उद्दिष्ट असताना महापालिकेच्या तिजोरीत थकबाकीसह तब्बल ४२ कोटी ३५ लाख रुपये जमा झाले आहेत. त्यामुळे घरपट्टी आणि पाणीपट्टीने प्रथमच वसुलीचा सव्वाशे कोटींचा टप्पा गाठला आहे.

महापालिकेने मार्चअखेरपर्यंत घरपट्टी आणि पाणीपट्टी वसुलीचे उद्दिष्ट पूर्ण करण्यासाठी यंदा जोरदार मोहीम सुरू केली होती. ९० हजार घरपट्टीच्या थकबाकीदारांना तर ६७ हजार पाणीपट्टीच्या थकबाकीदारांना नोटिसा दिल्या होत्या. सोबतच थकबाकी वसुलीसाठी मालमत्ताजप्तीची मोहीम सुरू केली होती. त्याचा चांगला परिणाम झाला असून, यंदा घरपट्टी व पाणीपट्टीची विक्रमी वसुली झाली आहे. २६ मार्चपर्यंत घरपट्टीची ८७ कोटी ३४ लाखांची वसुली झाली आहे. गेल्या वर्षीच्या आजच्या तारखेपर्यंत घरपट्टीतून महापालिकेला ८१ कोटी १३ मिळाले होते. यंदा त्यात सात कोटींची वाढ झाली आहे, तर पाणीपट्टीची वसुली ४२ कोटी ३५ लाखांपर्यंत गेली आहे. गेल्या वर्षी पाणीपट्टीची वसुली २६ कोटी २१ लाख रुपये होती. मात्र, यंदा त्यात तब्बल १६ कोटींनी वाढ झाली आहे. यंदा पाणीपट्टीचे उद्दिष्ट हे ४१ कोटी ठेवण्यात आले होते. अद्याप आठ दिवस बाकी असून, सुटीच्या दिवशीही कार्यालय भरणासाठी सुरू राहणार आहे.

प्लास्टिक वापरास पर्याय द्या

महाराष्ट्र चेंबरच्या सभेत व्यापारी-उद्योजकांचा ठराव

म. टा. खास प्रतिनिधी, नाशिक

राज्य सरकारने प्रथम प्लास्टिक वापरास पर्याय द्यावा व त्यानंतरच त्यावर बंदी घालावी असा ठराव व्यापारी व उद्योजकांच्या सभेत एकमताने करण्यात आला. महाराष्ट्र सरकारने १ एप्रिलपासून राज्यात सर्वत्र प्लास्टिक व कॅरिबॅग वापरास बंदी करणारा आदेश जारी केला आहे. त्या आदेशाच्या अनुषंगाने व्यापारी व उद्योजकांना जाणवणाऱ्या अडचणीबाबत महाराष्ट्र चेंबरने आयोजित सभेत हा ठराव करण्यात आला.

बैठकीत चेंबरचे अध्यक्ष संतोष मंडलेचा, चेंबरचे माजी अध्यक्ष व विश्वस्त खुशालचंद्र पोद्दार, नाशिक प्लास्टिक ट्रेड असोसिएशनचे अध्यक्ष आशिष बाफणा, नशिक प्लास्टिक मॅन्युफॅक्चरर्स असोसिअेशनचे अध्यक्ष राहुल कर्नावट, चेंबरचे सचिव चंद्रकांत दीक्षित उपस्थित होते. यावेळी चेंबरचे अध्यक्ष संतोष मंडलेचा यांनी असे स्पष्ट केले की आम्ही सर्व व्यापारी व उद्योजक पर्यावरणाच्या बाजूलाच आहेात, पर्यावरणाला घातक ठरेल अशा प्लास्टिक व थर्माकोलच्या वस्तू वापरू नयेत याबाबत आम्हीही आग्रही आहोत. मात्र, सरकारने अशा प्रकारचा निर्णय घेताना व्यापारी, उद्योजकांना विश्वासात घेणे आवश्यक होते. बंदी त्वरित लागू केल्याने व्यापारी व उद्योजकांमध्ये संभ्रम आहे. पॅकिंगला पर्याय दिला नसल्याने मालाची विक्री करणे अवघड झाले आहे. प्लास्टिक व थर्माकोल याला पर्याय द्यावा, त्यानंतरच अंमलबजावणी करावी, ठेास पर्याय दिल्याशिवाय निर्णयास स्थगिती द्यावी अशी मागणी यावेळी करण्यात आली.

सभेत शहरातील नाशिक धान्य किराणा घाऊक व्यापारी संघटनेचे अध्यक्ष प्रफुल्ल संचेती, सचिव राहुल डागा, धान्य किराणा किरकोळ व्यापारी संघटनेचे अध्यक्ष शेखर देशपुते, उपाध्यक्ष पटेल, सिडको किराणा व्यापारी संघटनेचे अध्यक्ष विजय कुलकणी, नाशिक मोटार मर्चंट असोसिएशनचे सुरेश चावला, रेडिमेड होजिअरी मर्चंट असोसिएशनचे प्रवीण चांडक, मसाला उत्पादक संघटना, नाशिक मिठाई उत्पादक संघटनेचे अध्यक्ष मनोज कोटकर, सिमेट व्यापारी संघटनेचे अध्यक्ष मदन पारख, नशिक ट्रान्सपोर्ट असोसिअेशनचे अध्यक्ष श्रीजयपाल शर्मा, सचिव सुभाष जांगडा, हार्डवेअर मर्चंट असोसिएशनचे मोगरावाला, घाऊक कापड व्यापारी संघटना, चेंबरचे कार्यकारणी सदस्य भावेश माणेक, अंजू सिंगल, संजय खैरनार, राजेश मालपूरे, सचिन जाधव सुनिता फाल्गुणे, सलिम बटाडा, आदी संघटनांचे ५० हून अधिक पदाधिकारी उपस्थित होते.