म. टा. प्रतिनिधी, नाशिक दिवसेंदिवस जातीपातींच्या भिंती अधिकाधिक घट्ट होत चाललेल्या असताना व जातीतील उपजातींच्या अस्मितानाही धुमारे फुटत असताना नाशिकमध्ये गेल्या पन्नास वर्षांपासून जैन समाजातील सर्व पंथ सकल जैन समाजाच्या झेंड्याखाली एक होऊन दरवर्षी भगवान महावीरांची जयंती अमाप उत्साहाने साजरी करीत असतात. गेली ५० वर्षे नाशिकमधील जैन समाजाने एकात्मतेचे असे दर्शन घडविले आहे. भगवान महावीर यांच्या जयंतीदिनी सकल जैन समाजाने जन्मकल्याणक महोत्सवाचे आयोजन करून समस्त समाजाच्या एकत्रीकरणाचा आदर्श निर्माण केला आहे. श्री जैन सेवासंघ आणि जैन सोशल ग्रुप, नाशिक परिवार यांच्यातर्फे भगवान महावीर जन्मकल्याणक महोत्सवानिमित्त आज (दि. २९) भव्य शोभायात्रेसह विविध कार्यक्रमांचे आयोजन करण्यात आले आहे. त्यामध्ये शोभायात्रा, धार्मिक व सामाजिक कार्यक्रम होणार आहेत. सर्व जैन संप्रदायातील समाजबांधवांनी या सोहळ्याचा लाभ घ्यावा, असे आवाहन श्री जैन सेवा संघाचे अध्यक्ष पवन पटणी, कार्याध्यक्ष महेश शाह, सचिव सचिन गांग, समन्वयक जयेश शाह आणि राजेश पहाडे यांनी केले आहे. श्री सकल जैन समाजाकडून गत ५० वर्षांपासून भगवान महावीर जन्मकल्याणक महोत्सवाचे आयोजन करण्यात येते. त्यामध्ये विविध सामाजिक उपक्रमांसह साधू-संतांच्या प्रवचनाचे आयोजन केले जाते. यावर्षीही नाशिक शहरात हा महोत्सव होणार असून, भगवान महावीरांच्या जयंतीनिमित्त आज (दि. २९) सकाळी ८ वाजता दहीपूल परिसरातून शोभायात्रा प्रारंभ होईल. यानंतर चोपडा बँक्वेट हॉल येथे सकाळी १०.३० ते ११.३० या वेळेत भगवान महावीर यांच्या जीवनावर मार्गदर्शक संतांच्या माध्यमातून आधारित 'तत्त्वज्ञान प्रवचन आणि मांगलिक सादरीकरण' होणार आहे. या कार्यक्रमानंतर गौतमी प्रसादाचे वितरण होईल. एकात्मतेचा संदेश संत अशोक मुनी महाराज यांच्या संकल्पनेतून याची सुरुवात करण्यात आली होती. त्याचा आता वटवृक्ष होऊन गेली ५० वर्षे अखंडपणे हा अभिनव उपक्रम राबविला जात आहे. त्यातून सर्व समाजबांधवांनी एकत्रित येणे, एकमेकांच्या समस्या सोडविणे, वैचारिक देवाणघेवाण करणे यांसारख्या गोष्टी सोप्या केल्या आहेत. यात शहरातील जैन समाजातील सर्व संप्रदायांचा एकत्रित सहभाग असतो, हे वैशिष्ट्य. भगवान महावीर यांच्या अहिंसेच्या संदेशाला या महोत्सवाच्या माध्यमातून समाजाच्या शेवटच्या टोकापर्यंत पोहोचवले जात आहे. याद्वारे विविध सामाजिक उपक्रमही राबविले जातात. त्यातून गरजूंना आरोग्यसेवा पुरविली जाते. स्वच्छतेबाबतही संदेश देण्याचा प्रयत्न यातून करण्यात येत असल्याचेही आयोजकांनी 'मटा'शी बोलताना सांगितले. जैन समाजातील प्रत्येक गट सर्व भेदभाव विसरून या महोत्सवाच्या माध्यमातून संघटित होऊन समाजात एकात्मतेचा संदेश देत आहे. आज कार्यक्रमांची रेलचेल रविवार कारंजा येथील श्री जैन श्वेतांबर स्थानकवासी श्रीसंघातर्फे आज, 'जीवदया अभियान' राबविण्यात येईल. तर श्री वर्धमान जैन श्वेतांबर मूर्तिपूजक संघातर्फे सायंकाळी ६ वाजता भव्य 'अंगरचना' हा कार्यक्रम होईल. श्री दिगंबर जैन मंदिर दूध बाजार यांच्यातर्फे सकाळी ८ वाजता पंचामृत, अभिषेक व सायंकाळी ७ वाजता पाळणा होईल. श्री दिगंबर जैन तीर्थक्षेत्र, गजपंथ, म्हसरूळ यांच्यातर्फे सकाळी ६.३० ते ८ या वेळेत प्रभात फेरी, सायंकाळी ७.३० वाजता संगीतसंध्या, नाटिका आणि पाळणा असे कार्यक्रम होतील. यावेळी नाशिक मध्यवर्ती कारागृहातील कैदी आणि जिल्ह्यातील विविध शाळांमधील एक लाख विद्यार्थ्यांना भगवान महावीर यांच्या सिद्धांतांवर चालण्याची प्रतिज्ञा देण्यात येईल. श्री चिंतामणी पार्श्वनाथ जैन संघातर्फे टिळकवाडी येथील श्री महावीर जिनालय येथे सायंकाळी ६ वाजता कार्यक्रम होईल. यासोबतच जैन सोशल ग्रुपतर्फे रक्तदान शिबिर, जीतो वुमेन्स विंगतर्फे रस वाटप आणि जे. ए. जी. मिडटाऊनतर्फे सर्व मंदिरांमध्ये विविध कार्यक्रमांची रेलचेल आज दिवसभर राहणार आहे. भगवान महावीरांच्या जयंतीनिमित्त आज, सकाळी ८ वाजता दहीपूल परिसरातून शोभायात्रेस सुरुवात होणार आहे. ही शोभायात्रा, दहीपूल-जुनी तांबट लेन-भद्रकाली जैन मंदिर-गाडगे महाराज पुतळा-धुमाळ पॉइंट-रविवार कारंजा-अशोक स्तंभ-गंगापूररोडमार्गे चोपडा हॉल येथे समारोप होईल. २४ तीर्थंकरांचे रथ हे या शोभायात्रेचे प्रमुख आकर्षण राहणार असून, या यात्रेतून स्वच्छता अभियान राबविण्यात येणार आहे. गोशाळा मदतीसाठी गो-रथाचेही नियोजन करण्यात आले आहे. या शोभायात्रेत सहभागी होण्यासाठी चोपडा लॉन्स येथे वाहन पार्किंगची व्यवस्था करण्यात आली आहे. तेथून यात्रामार्गावर जाण्यासाठी वाहनव्यवस्था राहणार असल्याची माहिती आयोजकांनी दिली आहे.
मोबाइल अॅप डाउनलोड करा आणि राहा अपडेट
