म. टा. प्रतिनिधी, नाशिक शहरात उन्हाळ्याने रौद्र रूप धारण केले असून, उष्णतेच्या त्रासाने नागरिकांच्या जिवाची लाहीलाही होत आहे. दिवसेंदिवस तापमान वाढत असल्याने सकाळी जॉगिंग ट्रॅकवर फिरणाऱ्यांची संख्याही कमी झाली आहे. गेल्या काही दिवसांपासून महाराष्ट्रात उष्णतेची लाट आली असून, रविवारी शहरात ३८.६ इतकी तापमानाची नोंद झाली आहे. नाशिककरांच्या दृष्टीने य़ंदाचा उन्हाळा जास्त कडक असल्याचे म्हटले जाते. गेल्या काही दिवसांपासून सातत्याने उष्णतेत वाढ होत असून, अनेकांनी कूलर व एसी घेणे पसंत केले आहे. सकाळचे कोवळे ऊनही नकोसे वाटू लागल्याने जॉगिंग ट्रॅकवर येणाऱ्यांची गर्दी कमी झाली आहे. उन्हाळ्याची तीव्रता घरातही जाणवत असून, तहानेने घसा कोरडा पडतोय. अनेकांनी दुपारचा चहा सोडून पन्हे, कोकम सरबत, आवळ्याचे सरबत याला पसंती दिली आहे. जिवाची लाही होत असताना कितीही पाणी प्यायले तरी तहान काही भागत नाही. बदलत्या वातावरणाचा शरीरावर खूप परिणाम होत असून, नाकाचा घोळणा फुटणे, ताप येणे, सर्दी-खोकला, उष्माघात यांसारख्या आजारांमध्ये वाढ होऊ लागली आहे. एप्रिलमध्ये नाशिकने ३८.६ अंशांवर पारा चढताना पाहिला असल्याने नागरिकांनी अधिक दक्षता घेण्याचा सल्ला डॉक्टर देत आहेत. शहराचा पारा वाढतच असून, हवामान खात्याच्या अंदाजानुसार आणखी काही दिवस उन्हाचा तडाखा कायम राहणार असल्याने नाशिककरांना उन्हाच्या झळांना सामोरे जावे लागणार आहे. उन्हाळ्यात घाम जास्त येतो. त्यामुळे पाण्याच्या कमतरतेचा धोका जाणवू नये म्हणून पाणी जास्त प्यावे. गरज असेल तरच उन्हात बाहेर जावे. उन्हात जाताना पोट रिकामे नसावे, पाणी जवळ असावे. तसेच उन्हापासून बचाव करणारी सर्व साधने सोबत असावीत. लहान मुले आणि वृद्धांसाठी हा ऋतू विशेष देखभालीचा आहे. दोघांची रोगप्रतिकारक क्षमता कमकुवत असल्यामुळे कुठल्याही रोगाचा हल्ला यांच्यावर चटकन परिणाम करतो. पाणी जास्त प्यावे आणि साधे जेवण करावे, असा सल्ला डॉक्टरांनी दिला आहे. थंडपेयांच्या विक्रीत वाढ उन्हाळ्यात घसा कोरडा पडत असल्याने रस्त्यावरील रसवंतीमध्ये उसाचा रस घेण्यासाठी नागरिक गर्दी करताना दिसत आहे. रेडिमेड आवळ्याचे सरबत, कोकम सरबत अशा सरबतांच्या विक्रीत वाढ झाली आहे.
मोबाइल अॅप डाउनलोड करा आणि राहा अपडेट
