म. टा. खास प्रतिनिधी, नाशिक
शहर परिसरातील अनेक एटीएममध्ये पैसे उपलब्ध नसल्याने ग्राहकांना भरदुपारी वणवण भटकण्याची वेळ आली. साडेतीन मुहुर्तांपैकी एक असलेल्या अक्षय तृतीया सणाच्या पार्श्वभूमीवर एटीएममधील खडखडाट ग्राहकांमध्ये संताप निर्माण करणारा ठरत होता. राष्ट्रीय बँकांपासून सहकारी बँकांपर्यंत अनेक एटीएम पैशांविनाच असल्याचे बोर्ड लावण्यात आले होते. काही एटीएमवर कुठल्याही प्रकारची सूचना नसल्याने ग्राहक पैशांसाठी प्रयत्न करुनही त्यांना पैसे मिळत नव्हते. गंगापूररोड, एमजीरोड या बाजारपेठेतील एटीएमही पैशांविनाच असल्याचे दिसून आले. यामुळे ग्राहकांना पैशांसाठी वणवण करावी लागली.
जिल्ह्यातील एटीएममध्ये पैसे नाहीत याबाबत सध्या तरी कुठलीही तक्रार प्राप्त झालेली नाही. चलन तुटवड्याबाबत तातडीने आढावा घेतला जाईल.
- राधाकृष्णन बी., जिल्हाधिकारी
रांगा लावूनही हात रितेच!
म. टा. वृत्तसेवा, नाशिकरोड
शहरातील जवळपास सर्वच बँकांच्या एटीएममध्ये मंगळवारी पैशांचा खडखडाट झाल्याने नागरिकांची पैशांअभावी मोठी गैरसोय झाली. नाशिकरोडला एटीएममधील कॅश संपल्यानंतर नागरिकांना तासभर रांगेत उभे राहूनही रिकाम्या हाती माघारी परतावे लागले.
शहरातील बहुतांश एटीएममध्ये मंगळवारी सकाळी काही प्रमाणात रोकड होती. परंतु, दुपारनंतर जवळजवळ सर्वच एटीएम कॅशलेस झाल्याने नागरिकांचा हिरमोड झाला. रांगेत तासभर उभे राहूनही नागरिकांना एटीएममधून पैसे मिळाले नाही. प्रेस आवारातील स्टेट बँकेच्या एटीएमवर शेकडो कामगारांची पैसे काढण्यासाठी रांग लागलेली होती. परंतु, एटीएममधील कॅश संपल्याने कामगारवर्गास रिकाम्या हाताने माघारी परतावे लागले. दत्तमंदिर, बिटको चौक, रेल्वे स्टेशन, स्टेट बँक शाखा या परिसरातील सर्वच एटीएमवर पैसे काढण्यासाठी नागरिकांनी गर्दी केली होती.
दुपारनंतर धावाधाव
मंगळवारी दुपारनंतर बहुतांश एटीएम कॅशलेस झाल्याने नागरिकांना दुसरे एटीएम शोधावे लागले. काही एटीएमवर नागरिकांची प्रचंड गर्दी झाली. ज्या काही तुरळक ठिकाणच्या एटीएममध्ये कॅश उपलब्ध होती, तिथेही केवळ दोन हजाराच्या नोटाच मिळाल्या. परंतु, अवघ्या तासाभरातच सर्वच एटीएम खाली झाली. नागरिकांना पैशांसाठी धावाधाव करावी लागली. काही नागरिकांनी ऐनवेळी बँकांमध्ये धाव घेतली.
सणाच्या पार्श्वभूमीवर पैशांची टंचाई
अक्षय्य तृतिया सणाच्या निमित्ताने नागरिकांकडून मोठी खरेदी केली जाते. या सणाच्या पार्श्वभूमीवर बाजारपेठांत खरेदीसाठी नागरिकांची मंगळवारी मोठी झुंबड उडालेली असताच एटीएममधील कॅश संपल्याने नागरिकांची मोठी फजिती झाली. काही नागरिकांना ऐनवेळी कॅशअभावी किरकोळ खरेदी करता आली नाही.
प्रेस आवारातील स्टेट बँकेच्या एटीएममधील कॅश मंगळवारी संपल्याने नागरिकांना पैसे काढता आले नाहीत. या एटीएमवर पैसे काढण्यासाठी मोठी रांग लागली होती.
-दिनेश मोवळे, ग्राहक
मंगळवारी गंगापूररोड, अशोकस्तंभ, सीबीएस या भागातील एटीएममध्ये खडखडाट होता. सोमवारीदेखील पेठफाटा, दिंडोरी रोड, मेरी कॉलनी या भागातील एटीएममध्ये पैसे नव्हते. दोन दिवसांपासून एटीएममध्ये पैशांची टंचाई आहे.
-अनिल कदम, ग्राहक
सायंकाळी आले पैसे
म. टा. वृत्तसेवा, सातपूर
गेल्या काही दिवसांपासून एटीएममध्ये पैसै नसल्याने ग्राहकांचे हाल होत आहेत. सातपूर भागात गेल्या तीन दिवसांपासून काही ठराविक ठिकाणी असलेल्या एटीएममध्येच पैसे असल्याने ग्राहकांची गर्दी झाली होती. रविवारी व सोमवारी एटीएमध्ये पैसेच नसल्याने रिकाम्या हाती ग्राहकांना परतावे लागले. मंगळवारीदेखील दिवसभर एटीएममध्ये खडखडाट पहायला मिळाला. सायंकाळी पाच वाजेनंतर एटीएममध्ये पैसे आल्याने ग्राहकांनी समाधान व्यक्त केले. वयोवृद्ध नागरिक व निवृत्त झालेल्या कामगारांना एटीएममध्ये नसलेल्या
पैशांमुळे सर्वांधिक त्रास सहन करावा लागला.
पंचवटीत एटीएम पर्यायी व्यवस्था
पंचवटी : पंचवटी परिसरातील स्टेट बँकेच्या एटीएममध्ये खडखडाट होता. अॅक्सिस, बँक ऑफ महाराष्ट्र, आयडीबीआय, युनियन, आयसीआयसीआय आदी बँकांच्या एटीएममध्ये पैसे उपलब्ध होते. पर्यायी व्यवस्था असल्यामुळे पंचवटीतील ग्राहकांना फारसा परिणाम जाणवला नाही.
ज्येष्ठांची वणवण
म. टा. वृत्तसेवा, इंदिरानगर
दोन दिवसांपासून इंदिरानगर परिसरातील एटीएममध्ये खडखडाट झाल्याचे दिसून येत आहे. एटीएममध्ये पैसे नसल्याने नागरिकांचे हाल होत आहेत. बँकेत याबाबत विचारणा केली असता प्रतिसाद मिळत नसल्याचे नागरिकांनी सांगितले. बँकांच्या एटीएममध्ये ऐन सणावारात अशा प्रकारे पैसे मिळत नसल्याने नागरिकांनी संतप्त प्रतिक्रिया व्यक्त केल्या आहेत.
बँक बंद असताना किंवा बँक जवळ नसताना एटीएममधून पैसे काढणे सहज शक्य होते. आजकाल सर्वचजण एटीएमचा वापर करीत असल्याचे दिसून येत आहे. कालपासून इंदिरानगर परिसरातील एकाही एटीएमवर पैसे उपलब्ध नसल्याने एटीएम बंद असल्याचा फलक लावण्यात आले होते. अचानकपणे असे फलक लावल्याने नागरिकानी संताप व्यक्त केला आहे. विशेष म्हणजे बँकांच्या जवळ असलेल्या एटीएममध्येसुद्धा पैसे शिल्लक नसल्याचे दिसून आले. बँकेत इतरवेळी पैसे काढण्यासाठी उभे राहिल्यावर कर्मचारी एटीएमचा वापर करण्याचा सल्ला देत असतात, मात्र आता एटीएममध्येच पैसे नसल्याने काय करायचे, असा प्रश्न नागरिकांसमोर उभा राहिला होता. इंदिरानगर परिसरात साधारणतः ३५ एटीएम असून यातील एकाही एटीएमवर पैसे शिल्लक नव्हते. ज्या एटीएमवर पैसे आहेत तेथे केवळ दोन हजाराच्याच नोटा उपलब्ध असल्याचे दिसून आले.
कॅशलेस करण्याच्या सवय नागरिकांना लावण्याआधी बँकांनी एटीएममध्ये पैसे भरण्याची व्यवस्था सक्षम करावी अशी अपेक्षा नागरिकांनी व्यक्त केली आहे.
जवळ पैसे ठेवण्यापेक्षा गरजेनुसार एटीएममधून पैसे काढणारे ज्येष्ठ नागरिक अनेक आहेत. सण असताना नागरिकांना बँकेतून स्वतःचेच पैसे काढता येत नसल्याने त्रास होत आहे. बँकांनी याबाबत योग्य नियोजन केले पाहिजे.
- हर्षद गोखले