मखमलाबादरोड भागात पैठणींचे दुकान फोडले (फोटो) पंचवटी : मखमलाबादरोडवरील जगझाप मार्गाजवळ नव्याने सुरू करण्यात आलेल्या पैठणी साडीचे दुकान शुक्रवारी मध्यरात्री चोरट्यांनी फोडले. या दुकानातील दीड ते दोन लाख रुपयांच्या साड्या चोरट्यांनी लंपास केल्या. मखमलाबादरोडवरील वैशाली अपार्टमेंटमधील राहुल तानाजी फडोळ यांच्या येवलेकर पैठणी या दुकानाचे शटर वाकवून चोरट्यांनी दुकानात प्रवेश करून पैठणी लंपास केल्या. पैठणींची खोकी फेकून केवळ साड्याच घेऊन चोरटे पसार झाले. राहुल फडोळ सकाळी दहा वाजता दुकान उघडण्यासाठी आले असता हा प्रकार उघडकीस आला. त्यांनी पंचवटी पोलिस ठाण्याशी संपर्क साधून माहिती दिली. हा रस्ता निर्मनुष्य असतो. येथे पोलिसांची गस्तही कमी असते. त्याचा फायदा घेत ही चौरी झाली. -- हातमाग कापड स्पर्धा नाशिक : राज्यातील हातमाग विणकरांना प्रोत्साहन देण्यासाठी व त्यांच्या उत्पादित वाणाला सन्मान मिळावा या दृष्टिकोनातून राज्यात विभागीय हातमाग कापड स्पर्धेचे आयोजन करण्यात आले आहे. स्पर्धेत प्रथम, द्वितीय व तृतीय बक्षीसपात्र नमुन्याकरिता अनुक्रमे २५ हजार, २० हजार व १५ हजार रुपयांचे प्रत्येकी एक बक्षीस देण्यात येईल. हातमाग कापडाचे नमुने विहित कालावधीत दाखल करून सोबत संपूर्ण नाव व पत्ता, वापरण्यात आलेल्या धाग्याचा प्रकार तसेच कापडाचे विवरण किमतीसह देणे आवश्यक आहे. कमीत कमी एक नग व कमीत कमी दोन मीटर कापड प्रादेशिक उपसंचालक, वस्त्रोद्योग, मुंबई, सातवा मजला, चरई टेलिफोन एक्स्चेंज बिल्डिंग, मावळी मंडळरोड, ठाणे (पश्चिम)- ४००६०१ येथे पाठवावे. ०२२- २५४०५३६३ दूरध्वनी क्रमांकावर संपर्क साधता येईल. -- घंटागाडी उलटली (फोटो) सातपूर : परिसरात कचरा संकलन करून खत प्रकल्पाकडे निघालेली घंटागाडी पपया नर्सरीच्या वळणावर अचानक उलटली. त्यामुळे घंटागाडीतील कचरा रस्त्यावर पसरून वाहतूक विस्कळीत झाली होती. ट्रॅक्टरला लावण्यात येणारी स्टीलची प्लेट फिरल्याने घंडागाडीची स्ट्रॉली पलटल्याचे चालकाने सांगितले. ट्रॅक्टरचे स्टेअरींग चालकाच्या छातीला लागल्याने दुखापत झाली. त्याला तात्काळ रुग्णालयात दाखल करण्यात आले. काही वेळानंतर नंतर दुसऱ्या घंटागाडीत कचरा भरून खत प्रकल्पावर नेण्यात आला. क्रेनच्या साहाय्याने स्ट्रॉली सरळ करीत रस्ता मोकळा करण्यात आला. --- पॉइंटर्स -- कॅम्पसच्या पदरी उपेक्षाच -२ चेन स्नॅचर वरचढ -३ तलाव तसा चांगला, पण आकाराने तोकडा -४ कौशल्याची 'परीक्षा' -५ स्वच्छ, सुंदर दिवेआगर -६ --- (लीडखाली सिंगल) उंटवाडीत म्हसोबा यात्रेने रंगत म. टा. प्रतिनिधी, नाशिक उंटवाडी येथील श्री म्हसोबा महाराज यात्रोत्सवाला जयघोषात सुरुवात झाली असून, शनिवारी पहिल्याच दिवशी ग्रामस्थांसह भाविकांची दर्शनासाठी गर्दी झाली होती. सायंकाळी श्री दत्तगिरीबाबा भजन, भारुड, कला, नाटक पथकाने भारुडाद्वारे समाजप्रबोधन केले. हा यात्रोत्सव ९१ वर्षांपासून अखंडितपणे साजरा केला जातो. यंदाही सिटी सेंटर मॉललगतच्या म्हसोबा महाराज देवस्थान येथे उत्साहपूर्ण आणि भक्तिमय वातावरणात यात्रोत्सवाला सुरुवात झाली. दोन दिवस हा यात्रोत्सव सुरू राहणार असून, श्री म्हसोबा महाराज यात्रा कमिटीच्या वतीने यंदाही भरगच्च कार्यक्रमांचे आयोजन करण्यात आले आहे. शनिवारी सकाळी नऊ वाजता महाराजांची महापूजा करण्यात आली. कमिटीचे पदाधिकारी विठ्ठल तिडके, मधुकर तिडके, सदाशिव नाईक, फकिरराव तिडके, राजेश गाढवे, विलास जगताप, दिनकर तिडके, अॅड. राहुल तिडके, संतोष कोठावळे आदी उपस्थित होते. यात्रोत्सवांतर्गत आज, रविवारी (दि. २२) दुपारी तीन ते सायंकाळी सात या वेळेत येथील श्री म्हसोबा महाराज देवस्थान पटांगणावर कुस्त्यांचा फड रंगणार आहे. अनेक नामांकित पहिलवान या फडात हजेरी लावणार आहेत.
मोबाइल अॅप डाउनलोड करा आणि राहा अपडेट
