म. टा. वृत्तसेवा, त्र्यंबकेश्वर वारकरी संप्रदायाचे आद्यसंस्थापक संतश्रेष्ठ निवृत्तिनाथ महाराज संजीवन समाधी मंदिर जीर्णोद्धार पायाभरणी शनिवारी करण्यात आली. महामंडलेश्वर डॉ. रामकृष्ण महाराज लहवीतकर, नगराध्यक्ष पुरुषोत्तम लोहगावकर, ट्रस्ट अध्यक्ष संजय धोंडगे हे सपत्नीक तर विश्वस्त ललीता शिंदे, जिजाबाई लांडे आपल्या पतींसह पुजेसाठी बसले होते. जवळपास तासभर पूजाविधी झाला. सुरज शिखरे, मंदिराचे पुजारी जयंत गोसावी यांनी पौरोहित्य केले. त्यानंतर उपस्थित मान्यवरांच्या हस्ते पायाभरणी करण्यात आली. यावेळेस विश्वस्त रामभाऊ मुळाणे, पंडित कोल्हे, पुंडलिक थेटे, त्र्यंबकराव गायकवाड, पवन भुतडा, डॉ. धनश्री हरदास, अविनाश गोसावी आदींसह मधुकर लांडे, महंत संपतदास धोंगडे, शंकरानंद सरस्वती, माजी अध्यक्ष मुरलधीर पाटील, वसंतराव घुले आदींसह वारकरी भक्त उपस्थित होते. काळ्या पाषाणातील मंदिर संत निवृत्तिनाथ महाराज समाधी मंदिर हे अत्यंत प्राचीन मंदिर आहे. मंदिर गर्भगृह दगडी बांधकामातील आहे. या मंदिराचा सद्य स्थितीला असलेला कळस आणि शिखर सिमेंट बांधकामाचे आहे. गर्भगृह आणि समाधी यांचे उंचीचे गुणोत्तर शास्त्राने बांधलेले आहे. त्यास कोणत्याही प्रकारे धक्का न लावता गर्भगृहाचे बाजुस पाच फुट रूंदीच्या कलाकुसर असलेल्या काळ्या पाषाणाच्या भिंती बांधण्यात येत आहेत. त्यावर मूळचे सिमेंटचे शिखर काढून तेथे दगडाचे शिखर बांधण्यात येणार आहे. हे सर्व काम २ कोटी ६० लाख रुपयांचे असून, पनवेल येथील श्रीहरी तिडके यांना याचा ठेका देण्यात आला आहे. याकरिता कोल्हापूर येथून दगड मागविण्यात आला आहे. मंदिराचे काम सुरू झाले असून, त्यानंतर सभामंडप व परिसराचा विकास करण्यात येणार आहे. शहरातील नागरिकांची अनुपस्थिती हजार वर्षांचा इतिहास निर्माण करेल असे मंदिर शिल्प उभे राहत आहे. मात्र या कार्यक्रमाला शहरातील ग्रामस्थांची अल्प उपस्थिती होती. या कामाबाबत शहरातील नागरकांना माहितीच दिली जात नाही असे सांगण्यात येते. तसेच काहींना निमंत्रण देवूनही ते उपस्थित राहत नाही, अशी शहरात चर्चा आहे.
मोबाइल अॅप डाउनलोड करा आणि राहा अपडेट
