मटा मालिका : शुभमंगल 'सावधान'
--
शहरातील तब्बल १६६ लॉन्स आणि मंगलकार्यालयांवर अनधिकृत असल्याचा ठपका ठेवत महापालिकेने कारवाईचा फास आवळला आहे. यासंदर्भात मतमतांतरे व्यक्त होत असून, लॉन्स आणि मंगलकार्यालयांवर अवलंबून असलेल्या अनेक व्यवसायांवर नजीकच्या काळात थेट परिणाम होणार आहे. या कारवाईच्या संभाव्य परिणामांचा वेध घेणारी मालिका आजपासून.
--
pravin.bidve@timesgroup.com
Tweet : BidvePravinMT
-
नाशिक : शहरातील १६६ लॉन्स व मंगलकार्यालयांवर अनधिकृत असल्याचा ठपका ठेवत महापालिकेने कारवाईचा बडगा उगारला आहे. त्यामुळे लॉन्स मालकांचे धाबे दणाणले असून, या कारवाईचा थेट परिणाम शुभकार्यावर अवलंबून असलेल्या अनेक व्यवसायांवर होऊ लागला आहे. त्यामुळे सुमारे २० हजार कामगारांवर बेरोजगारीची कुऱ्हाड कोसळण्याची भीती व्यक्त होत आहे. या कामगारांवर अवलंबून असलेल्या सुमारे एक लाख नाशिककरांच्या चरितार्थाचा गंभीर प्रश्न यामुळे निर्माण होणार आहे.
कुठल्याही शुभकार्याचे क्षण अविस्मरणीय करण्यात लॉन्स, मंगलकार्यालयांचे योगदान मोलाचे असते. साखरपुड्यापासून विवाह सोहळ्यापर्यंत आणि बाळाच्या वाढदिवसापासून अमृतवर्ष सोहळ्यांपर्यंतच्या अनेक कार्यक्रमांना चार चांद लावण्याचे काम मंगलकार्यालये, लॉन्समध्ये होते. परंतु, लॉन्स आणि मंगलकार्यालयांसाठी नवीन विकास नियंत्रण नियमावली जाहीर करण्यात आली असून, त्याद्वारे अनेक बंधने लादली आहेत. संबंधित लॉन्सधारक अनधिकृतपणे व्यवसाय करीत असल्याचा ठपका ठेवून महापालिकेने त्यांना नोटिसा बजावल्या आहेत. नियमितीकरणासाठी संबंधित व्यावसायिकांना अवधीही देण्यात आला. परंतु, लाखो रुपयांचा दंड भरणे अशक्यप्राय ठरू लागल्याने हा व्यवसाय संकटात सापडला आहे. काही लॉन्सवर महापालिकेने बुलडोझर फिरविला असून, काहींनी स्वत:हून अतिक्रमणे काढून घेतली आहेत. त्यामुळे या व्यावसायिकांचे मोठे आर्थिक नुकसान होत असून, या व्यवसायावर अवलंबून असलेल्या अन्य व्यवसायांवरही त्याचा थेट परिणाम होऊ लागला आहे. महापालिकेकडून सुरू असलेल्या कारवाईला लॉन्सचालक मालकांचा थेट विरोध नाही. परंतु, या कारवाईमुळे ते धास्तावले आहेत. या कारवाईमुळे केटरिंग, डेकोरेटर्स, सुरक्षा एजन्सीज, इलेक्ट्रेशियन्स, बॅन्डपथक, सफाई कर्मचारी अशा सर्वांचाच रोजगार अडचणीत येण्याची शक्यता बळावली आहे. शहरात मंगल कार्यालये, लॉन्स, बँक्वेट हॉल्सची संख्या सुमारे २०० आहे. लग्नसराईसह अनेकदा एकेका कार्यात किमान १०० ते २०० लोकांना रोजगार मिळतो. त्यामध्ये स्वयंपाकी, वाढपी, भांडी धुणारे, सजावट करणारे, लायटिंग करणारे, सुरक्षारक्षक, सफाई कर्मचारी, वाजंत्री अशा सर्वांचाच समावेश असतो. परंतु, या लॉन्सवर बुलडोझर फिरला तर त्याचा परिणाम थेट येथील रोजगारावरही होणार आहे.
-
अर्थचक्र
शहरातील लॉन्स, मंगलकार्यालय - २००
एका लॉन्सची उलाढाल - ५० ते ७५ लाख
व्यवसायाचे दिवस - ५० ते ६०
लग्नाचे पॅकेज - ३ ते १० लाखांपर्यंत
केटरर्सची संख्या - ५० ते ६०
डेकोरेटर्सची संख्या - ३० ते ४०