म. टा. वृत्तसेवा, धुळे
शहरातील पांझरा नदीकिनारी महाकाली मंदिर, शितला माता मंदिराचे अतिक्रमण तीन दिवसांत काढून घेण्याच्या अपर तहसीलदार कार्यलयाकडून नोटीस जारी करण्यात आली. त्यामुळे आता मंदिर बचाव कृती समितीच्या नावाखाली सर्वपक्षीय पदाधिकारी पुन्हा एकदा आक्रमक झाले आहेत. बुधवारी (दि. २३) दुपारी याबाबत महाकाली मंदिरात बैठक घेतली. त्यानंतर जिल्हाधिकारी कार्यालयार मोर्चा काढून धार्मिक भावना पायदळी तुडवल्यास आम्ही वेगळ्या पद्धतीने विरोध करू आणि तुम्हाला त्याचे दुष्परिणाम भोगावे लागतील, असा इशाराही जिल्हा प्रशासनास सर्वपक्षीय समितीने दिला आहे.
पांझरा नदीकाठी रस्त्यांना अडथळा ठरणारे महाकाली मंदिर, शितला माता मंदिराचे अतिक्रमण तीन दिवसात काढून घेण्याच्या नोटिसा प्रशासनातर्फे मंदिरांमध्ये मंगळवार दुपारी चिकटविण्यात आल्या. मुदतीत मंदिर व्यवस्थापनाने अतिक्रमण न हटविल्यास प्रशासनाकडून ते काढण्यात येईल व त्याचा खर्च व्यवस्थापनाकडून वसूल केला जाणार असल्याचे नोटिसीत नमूद केले आहे. यामुळे याचे दुष्परिणाम भोगावे लागतील. याची प्रशासनास जाणीव करून देण्यासाठी मोर्चा काढून जिल्हाधिकार्‍यांना इशारा देण्यात आला. मंदिर बचाव कृती समितीच्या नावाखाली एकत्र आलेल्या सर्वपक्षीयांनी बुधवारी सकाळी महाकाली मंदिरात तातडीची बैठक घेतली. त्यानंतर जिल्हाधिकारी कार्यालयावर घोषणाबाजी करीत मोर्चा काढण्यात आला. जिल्हाधिकारी राहुल रेखावार यांना भेटून मनोज मोरे, महेश मिस्तरी, हिरामण गवळी, कल्पना गंगवार आदींनी निवेदन दिले.
जिल्हाधिकारी राहुल रेखावर यांनी याबाबत पत्रकारांना माहिती देताना सांगितले की, शहरातील जनतेचा विचार करून, न्यायालयाचा आदेशाचा भंग होणार नाही. तसेच सर्व परिस्थितीचा विचार करून योग्य निर्णय घेण्यात येईल. याबाबत संबंधित विभागाच्या अधिकाऱ्यांशी चर्चा करून तत्काळ प्रश्न सोडविण्यात येईल. मात्र कायदा व सुव्यवस्था बाधित झाल्यास कारवाई करण्यात येणार असल्याचेही जिल्हाधिकाऱ्यांनी सांगितले.
मोबाइल अॅप डाउनलोड करा आणि राहा अपडेट
