म. टा. वृत्तसेवा, धुळे
कर्मचाऱ्यांमधील व्यसनाधिनता कमी होऊन व्यसनमुक्त होण्यासाठी दोन समुपदेशकांची नियुक्ती केली आहे. मद्यप्राशन करून वाहन चालविणाऱ्यांना मज्जाव करण्यासाठी अल्को टेस्टसाठी धुळे विभागाला तीन मशिन उपलब्ध झाल्याची माहिती धुळे विभाग नियंत्रक मनीषा सपकाळ यांनी दिली. एसटीच्या ७० व्या वर्धापनदिनानिमित्त धुळे आगारातील कार्यक्रमात त्या बोलत होत्या.
राज्य परिवहन महामंडळाच्या एसटीचा प्रवास सुखकर आणि सुरक्षित होण्यासाठी विविध योजना एसटी महामंडळ राबवत आहे. चालक आणि वाहकांच्या आरोग्याकडे लक्ष दिले जात असल्याचेही त्या महणाल्या. एसटी महामंडळाच्या वर्धापनदिनानिमित्त येथील मध्यवर्ती आगारात विभाग नियंत्रक मनीषा सपकाळ यांनी पत्रकार परिषद घेतली. या वेळी आगार व्यवस्थापक भगवान जगनोर, स्वाती पाटील, शिवाजीराव घोरपडे उपस्थित होते.
मद्यप्राशन करून वाहन चालविणाऱ्यांची अल्को टेस्ट करण्यासाठी धुळे विभागासाठी तीन अल्को टेस्ट मशिन उपलब्ध झाले आहेत. भरारी पथकांकडून चालकांची तपासणी करण्यात येत आहे. त्याचबरोबर ४० वर्षांआतील कर्मचाऱ्यांची तीन वर्षांतून एकदा आणि ४० वर्षांवरील कर्मचाऱ्यांची दर वर्षाला आरोग्य तपासणी केली जात आहे, अशी माहिती त्यांनी दिली. शाळांना सुरुवात झाल्यावर गर्दीचा हंगाम सुरू होईल. त्यानंतर या जादा बसेस पुन्हा सुरू करण्यात येणार असल्याचे विभाग नियंत्रक सपकाळ यांनी सांगितले. या वेळी प्रवासी व अधिकाऱ्यांना पेढे वाटून आनंद व्यक्त करण्यात आला.
गेल्या वर्षभरात धुळे विभागाची कामगिरी चांगली राहिली असून, विभागाच्या उत्पन्नातही वाढ झाली आहे. प्रती किलोमीटर मागे महामंडळाला विभागातून दोन रुपयांचे उत्पन्न मिळाले आहे. प्रवाशांची संख्यादेखील वाढलेली आहे. तसेच गेल्या वर्षभरात धुळे विभागाला २७ सीटर आणि ४ स्लिपर शिवशाही बस उपलब्ध झाल्या आहेत. शिवशाहीची आरामदायी प्रवासासाठी मागणी होत आहे. प्रवाशांनी तक्रार केल्यास ती त्वरित सोडविण्यात येत आहे. प्रवाशांशी असभ्य वर्तणूक करणाऱ्यांवर तत्काळ कारवाई करण्यात येत आहे, असेही नियंत्रक सपकाळ यांनी सांगितले.
मोबाइल अॅप डाउनलोड करा आणि राहा अपडेट
