स्वच्छतेत नाशिकचे मानांकन सुधारले १५१ क्रमांवरून ६३ क्रमांकावर झेप, म. टा. खास प्रतिनिधी, नाशिक स्वच्छ शहरांच्या यादीत नाशिक महापालिकेने आपले मानाकंन सुधारले असून, देशातील सर्वात स्वच्छ शहरांमध्ये नाशिकने गेल्या वर्षापेक्षा यंदा दमदार कामगिरी केली आहे. स्वच्छ नाशिक, सुंदर नाशिक असे ब्रीद मिरवणाऱ्या स्वच्छ शहरांच्या यादीत नाशिकने यंदा १५१ क्रंमाकांवरून थेट ६३ व्या स्थानावर झेप घेतली आहे. त्यामुळे शहराची स्वच्छतेत सुधारणा झाली असली तरी, पहिल्या दहा शहरांमध्ये नाशिकचा क्रमांक पटकवण्याचे मुख्यमंत्र्याचे स्वप्न मात्र भंगले आहे. केंद्र सरकारच्या केंद्रीय नगरविकास मंत्रालयाच्या वतीने स्वच्छ शहरांची यादी जाहीर केली आहे. देशभरातील पाचशे अमृत योजनेतील शहरांच्या सर्वेक्षणानंतर ही यादी जाहिर केली आहे. त्यात नाशिकने ६३ वा क्रमांक पटकावला असून, चार हजार गुणांपैकी नाशिकला २७८६ गुण मिळाले आहेत. त्यामुळे स्वच्छतेत नाशिक महापालिकेची ही चांगली कामगिरी मानली जात आहे. गेल्या वर्षी स्वच्छतेत नाशिकचा १५१ वा क्रमांक होता. तर सन २०१५ मध्ये ८३, २०१४ मध्ये आठव्या स्थानी होते. त्यामुळे स्वच्छतेत नाशिक महापालिकेची कामगिरी सतत घसरली होती. परंतु गेल्या वर्षी मुख्यमंत्री देवेंद्र फडणवीस यांनी महापालिकेत बैठक घेवून नाशिकच्या स्वच्छतेचा आढावा घेतला होता. त्यात नाशिकने स्वच्छ शहरांच्या यादीत पहिल्या दहा मध्ये यावे अशी अपेक्षा व्यक्त केली होती. त्यामुळे प्रशासनानेही कामगिरी सुधारण्यासाठी जोर लावला होता. मुख्यमंत्र्यांची इच्छा अपूर्ण नाशिक शहर हे स्वच्छतेत देशातील पहिल्या दहा शहरांमध्ये यावे अशी इच्छा मुख्यमंत्री देवेद्र फडवणीस यांनी जाहीर केली होती. महापालिकेत येवून त्यांनी आढावा बैठक घेतल्यानंतर नाशिक पहिल्या दहा शहरात यावे यासाठी प्रयत्न करण्याचे आदेश अधिकारी व लोकप्रतिनिधींना दिले होते. परंतु नाशिक हे पहिल्या ५० शहरांमध्येही आले नसल्याने मुख्यमंत्र्याची इच्छापूर्ती न करू शकणाऱ्या अधिकाऱ्यांवर काय कारवाई होते याकडे लक्ष लागून आहे.
मोबाइल अॅप डाउनलोड करा आणि राहा अपडेट
