म. टा. वृत्तसेवा, धुळे
राईनपाडा घटनेतील आरोपींना मृत्यूदंडाची शिक्षा झालीच पाहिजे, अशा घटना पुन्हा होणार नाही, याची सरकारने हमी घेतलीच पाहिजे आदी मागण्या करीत शनिवारी (दि. ७) अखिल भारतीय भटक्या विमुक्त जाती, जमाती संघटनेच्या वतीने करण्यात आले. साक्रीतील शिवाजी वाचनालय येथून तहसील कचेरीवर हा निषेध मोर्चा काढण्यात आला.
या निषेध मोर्चाला भारिप बहुजन महासंघानेदेखील पाठिंबा देत सहभाग घेतला. राईनपाडा (ता. साक्री) येथे १ जुलैला भटक्या जमातीतील नागपंथी डवरी समाजाच्या ५ भिक्षुकांची मुले पळवणारी टोळी असल्याच्या अफवेतून जमावाने निर्घृणपणे ठेचून हत्या केली. या घटनेच्या निषेधात राज्यभरातील नागपंथी तसेच भटक्या विमुक्त जाती संघटना रस्त्यावर उतरल्या आहेत. शनिवारी साक्रीत अखिल भारतीय भटक्या विमुक्त जमाती संघटना यांच्या वतीने या घटनेविरोधात मोर्चा काढण्यात आला. संघटनेच्या वतीने तहसीलदारांना दिलेल्या निवेदनात राईनपाडा घटनेतील आरोपींना मृत्यूदंडाची शिक्षा झाली पाहिजे, भटक्या विमुक्त समाजाचा पोट भरण्यासाठी भिक्षा मागणे हेच साधन आहे. त्यामुळे सरकारने त्यांना कायमस्वरुपी मान्यता देऊन ओळखपत्र द्यावे, पीडित कुटुंबांना २५ लाख मोबदला देऊन त्यांचे पुनर्वसन करावे, पक्के घर बांधून द्यावे व एका व्यक्तीला सरकारी नोकरी द्यावी, घटनेच्या चौकशीसाठी एसआयटी स्थापन करून सरकारी वकील म्हणून अॅड. उज्ज्वल निकम यांची नियुक्ती करावी, या मागण्या करण्यात आल्या आहेत. मोर्चात भटक्या समाजाचे अशोक गिरी, गोकुळ जगताप, मनोज गोसावी, सागर गोसावी, राहुल शिंदे, उमेश बाबर, गणेश जगताप, भोलानाथ जोशी, प्रकाश साळवे, किशोर वाघ, पंकज मराठे, गोविंदा सोनवणे, भटू पवार आदी सहभागी झाले होते. भारिपने स्वतंत्र निवेदन देत आपल्या मागण्या मांडल्या. या वेळी कमलाकर मोहिते, संजय सूर्यवंशी आदी उपस्थित होते.
मोबाइल अॅप डाउनलोड करा आणि राहा अपडेट
