म. टा. वृत्तसेवा, पंचवटी श्रावणामुळे पंचवटीतील शिव मंदिरांमध्ये दर्शन आणि पूजेसाठी येणाऱ्या भाविकांची सध्या गर्दी होत आहे. या गर्दीत कपालेश्वर मंदिराच्या आवारात दहा-बारा छोटी मुले आणि मुली हातात प्लास्टिकचे डबे घेऊन त्यातील अष्टगंध विविध प्रकारच्या ठशांच्या डिझाइनमध्ये भाविकांच्या कपाळी लावण्याचे 'आग्रही काम' उत्साहाने करताना दिसून येत आहेत. अशा गंध टिळ्यातून दिवसभरात ते किमान शंभर रुपयांपेक्षा जास्त कमाईदेखील करीत आहेत. सण आणि उत्सवांनी भरलेल्या व्रतवैकल्यांच्या श्रावण महिन्यात भक्तिरस ओथंबून वाहत आहे. मंदिरांमध्ये रोज विविध धार्मिक कार्यक्रमांची रेलचेल सुरू आहे. गोदाकाठाच्या परिसरात भाविक आणि पर्यटकांची होत असलेल्या गर्दीचा फायदा घेऊन येथे विविध प्रकारचे छोटे-छोटे व्यवसाय करणाऱ्यांची संख्या दिवसेंदिवस वाढत आहे. येथे कोणत्या वस्तूला कधी किती पसंती मिळेल हे सांगता येत नाही. अशा प्रकारचा एक छोटा पण सहज नजरेत भरणारा व्यवसाय लहान मुला-मुलींनी सुरू केला आहे. गोदाकाठाच्या आसपासच्या भागात पाल टाकून राहणाऱ्या या मुलांनी त्रिशुल, ओमकार, शिवलिंग अशा विविध प्रकारच्या डिझाइन तांब्याच्या तारेपासून तयार केल्या आहेत. प्लास्टिकच्या छोट्या डब्यात अष्टगंधात बुडवून हे विविध आकाराचे ठसे आग्रह करून भाविकांच्या कपाळी लावण्याचे काम ते करीत आहेत. असंख्य भाविकही मोठ्या आवडीने कपाळावर अशा प्रकारचे गंध लावून घेत आहेत. अशा भाविकांकडून या मुलांना दिवसभरात शंभर रुपयांहून अधिकची कमाईदेखील होत आहे. युवावर्गाकडून मिळतेय पसंती या बच्चेकंपनीकडून भाविकांना डिझाइनमधील गंध लावल्यानंतर त्यांच्याकडून एक-दोन रुपयांची मागणी केली जाते. नाही मिळाले, तर ते थोडे नाराजही होतात. अपेक्षेपेक्षा जास्त मिळाल्यास त्यांच्या चेहऱ्यांवर आनंद फुलतो. तिसऱ्या श्रावणी सोमवारी त्र्यंबकेश्वरची फेरी करून आलेल्या भाविकांनी विशेषतः युवावर्गाने कपाळावर अशा प्रकारचा डिझाइनमधील गंध लावून घेत त्यांच्यासोबत सेल्फी काढण्याचा आनंदही गोदाकाठाच्या परिसरात घेतला. (अँकर)
मोबाइल अॅप डाउनलोड करा आणि राहा अपडेट
