म. टा. खास प्रतिनिधी, नाशिक शहरात यंदा गणेशोत्सव साजरा करण्यावरून महापालिका आणि गणेश मंडळांमधील वाद विकोपाला गेला आहे. शहरात उच्च न्यायालयाच्या आदेशानुसारच गणेश मंडळांना परवानगी देण्याची ठाम भूमिका आयुक्त तुकाराम मुंढे यांनी घेतली असून, नियमांबाबत तडजोडीस नकार दिला आहे. त्यामुळे संतापलेल्या गणेशोत्सव महामंडळाच्या पदाधिकाऱ्यांनी यंदा शहरात शासन आणि प्रशासनाच्या निषेधाचा गणेशोत्सव साजरा करण्याचा इशारा दिला आहे. मुंबई आणि पुण्याच्या धर्तीवर परवानग्या दिल्या नाहीत, तर येत्या चार दिवसांत शहरातील सर्व सार्वजनिक गणेशोत्सव मंडळांचे पदाधिकारी आणि कार्यकर्त्यांचा निषेध मोर्चा महापालिकेवर काढला जाणार आहे. गणेशोत्सव अवघ्या दहा दिवसांवर येऊन ठेपला असतानाही, गणेश मंडळांचा वाद थांबण्याऐवजी वाढतच चालला आहे. गणेशोत्सवाच्या पार्श्वभूमीवर आयुक्त मुंढे यांनी जारी केलेल्या परिपत्रकातील जाचक नियम-अटींवरून गणेश मंडळे आणि प्रशासनात संघर्ष अधिक तीव्र झाला आहे. मनपाच्या नियमावलीनुसार शहरात गणेशोत्सव साजरा होणारच नाही, असा दावा मंडळांनी केला असून याबाबत पालकमंत्री गिरीश महाजन यांच्याकडेही धाव घेतली होती. पुणे आणि मुंबईच्या धर्तीवर नाशिकमध्येही परवानग्या देण्यात याव्यात, अशा मागण्या मंडळांनी केल्या आहेत. बी. डी. भालेकरसह पालिकेच्या पत्रकाबाबत राष्ट्रवादी काँग्रेसचे गटनेते गजानन शेलार, महामंडळाचे अध्यक्ष समीर शेटे, उपाध्यक्ष रामसिंग बावरी, कार्याध्यक्ष पद्माकर पाटील आदी पदाधिकाऱ्यांच्या शिष्टमंडळाने सोमवारी (दि. ३) आयुक्त मुंढे यांची भेट घेत जाचक नियम शिथील करण्याची तसेच मंडप उभारणीसाठी सार्वजनिक बांधकाम विभागाची परवानगीची अट रद्द करण्याची मागणी केली. परंतु, ही मागणी धुडकावून लावत शासन आणि उच्च न्यायालयाच्या निर्देशांव्यतिरिक्त इंचभरदेखील अतिरिक्त जागा मंडळांना उपलब्ध करून न देण्याची भूमिका मुंढे यांनी घेतली. गणेश मंडळांनी मंडपाच्या नकाशाला सार्वजनिक बांधकाम विभागाकडून 'ना हरकत दाखला' घेतल्याशिवाय महापालिकेकडून परवानगी मिळणार नाही, असे स्पष्ट केले. गावठाणात पर्यायी रस्त्यांच्या ठिकाणी मंडप उभारू देण्याच्या मागणीला देखील मुंढे यांनी नकार दिला. यामुळे संतप्त झालेल्या गणेशोत्सव महामंडळाच्या पदाधिकाऱ्यांनी बैठक घेत पत्रकार परिषदेत आपली भूमिका जाहीर केली. यंदा शासन आणि प्रशासनाच्या निषेधाचा गणेशोत्सव साजरा केला जाईल. कुठलाही देखावा न उभारता निषेधाची फलके उभारली जातील. तसेच मंडळांशी चर्चा करून महापालिका मुख्यालय राजीव गांधी भवनावर निषेध मोर्चा काढण्यात येईल, असा इशारा अध्यक्ष शेटे व गटनेते शेलार यांनी दिला. प्रशासनाला जाचक अटी कायम ठेवायच्या असतील तर गणेश मंडळे परवानगीच घेणार नाहीत असा इशाराही त्यांनी दिला. या बैठकीस रामसिंग बावरी, पद्माकर पाटील, देवांग जानी, कैलास मुदलियार, चेतन व्यवहारे, निखील पवार आदी उपस्थित होते. पालकमंत्रीही हतबल आयुक्त मुंढे यांच्या भेटीनंतर नाशिक महानगर गणेशोत्सव महामंडळाचे अध्यक्ष समीर शेटे यांनी पालकमंत्री महाजन यांना भ्रमणध्वनीवर संपर्क साधत आयुक्त भेटीत घडलेल्या प्रकाराची माहिती दिली. गणेशोत्सव दहा दिवसांवर येऊन ठेपला असताना पालकमंत्र्यांनी आदेश दिल्यानंतरही आयुक्तांकडून मंडळांना दिलासा मिळू न शकल्याचे निदर्शनास आणून देण्यात आले. यावेळी पालकमंत्री महाजन यांनी हतबलता व्यक्त केल्याने यंदा निषेधाचा गणेशोत्सव साजरा करण्याचे तसेच महापालिकेवर निषेध मोर्चा काढण्यात येणार असल्याचा निर्णय महामंडळाने घेतल्याची माहिती पालकमंत्र्यांना यावेळी देण्यात आली. काँग्रेसची टीका शहर काँग्रेसच्या वतीने हिंदूत्ववादी सरकारच्या सत्ता काळात उत्सव साजरा करावा की नाही, असा थेट सवाल आयुक्त तुकाराम मुंढे यांना आज निवेदनाद्वारे करण्यात आला. आयुक्त मुंढे यांना दिलेल्या निवेदनात म्हटले की, शहरात पारंपरिक पद्धतीने गणेशोत्सव साजरा केला जातो. परंतु, हिंदूत्वाच्या मुद्द्यावर सत्तेवर आलेल्या सरकारकडून हिंदू सणांवर मोठ्या प्रमाणात निर्बंध आणले जात आहेत. मंडळांना कायद्याचा धाक दाखवून छळ केला जात आहे. परवानगीसाठी दरदिवशी पाचशे रुपये भरणे लहान मंडळांना परवडणारे नाही. मंडप टाकणाऱ्या पदाधिकाऱ्यांवर गुन्हे दाखल केले जात असल्याने मंडळांचे कार्यकर्ते हैराण झाले आहेत. शहर काँग्रेसचे अध्यक्ष शरद आहेर, काँग्रेस गटनेते शाहू खैरे, नगरसेविका वत्सला खैरे, आशा तडवी, राहुल दिवे, सुरेश मारू, नीलेश खैरे आदींसह शेकडो कार्यकर्ते यावेळी उपस्थित होते. भालेकर मैदानाचा वाद मिटला बी. डी. भालेकर मैदानावर सार्वजनिक गणेशोत्सव साजरा करण्याच्या वादावर अखेर पडदा पडला आहे. पालकमंत्री गिरीश महाजन यांनी आयुक्तांना या ठिकाणी सार्वजनिक मंडळांना आरास उभारण्यास परवानगी देण्याचे आदेश दिले होते. त्यानुसार सोमवारी आयुक्तांनी या ठिकाणी गणेश मंडळांना परवानगी देण्यास सहमती दर्शवली आहे. या ठिकाणी स्मार्ट सिटीच्या पार्किंगचे काम सुरू असल्याने गणेश मंडळांना यंदा परवानगी नाकारली होती. त्यावरून मोठा वाद सुरू होता. अखेरीस पालकमंत्र्याच्या आदेशावरून सोमवारी मुंढेंनी माघार घेत, या ठिकाणी गणेश मंडळांना गणेशस्थापनेस परवानगी देण्याचा निर्णय घेतला आहे. त्यामुळे गेल्या अनेक दिवसापासून सुरू असलेला बी. डी. भालेकरचा वाद अखेर संपुष्टात आला आहे. भाजपचे राष्ट्रीय अध्यक्ष अमित शहा कोलकाता शहरात दुर्गा पूजा न झाल्यास हिंसेची भाषा करतात, तर दुसरीकडे महाराष्ट्रात सरकार हिंदू सणांना आडकाठी आणत असल्याने दुजाभाव दिसतो. प्रशासन अटी व शर्तींवर ठाम असतील तर यंदा निषेधाचा गणेशोत्सव साजरा करू व परवानगी घेणार नाही. - समीर शेटे, अध्यक्ष, गणेशोत्सव महामंडळ. प्रशासनाने अग्निशामक बाबतच्या काही अटी रद्द केल्या असून, केवळ स्थळपाहणी करून सुरक्षिततेची खात्री केली जाईल. बांधकाम विभाग आणि विद्युत निरीक्षकाच्या दाखल्याची अट शिथील केली आहे. परंतु, काही जण चुकीचा अर्थ काढत आहेत. उच्च न्यायालय आणि शासनाच्या अटींनुसार काढलेल्या पत्रकावर महापालिका ठाम आहे. - सुहास शिंदे, उपायुक्त, विविध कर विभाग
मोबाइल अॅप डाउनलोड करा आणि राहा अपडेट
