अमृता फडणवीस यांचे आवाहन; विद्यार्थिनींना दहा लाख सॅनिटरी नॅपकिन्सचे वाटप
म. टा. प्रतिनिधी, नाशिक
मासिक पाळीबद्दल समाजात अद्यापही संकुचित मानसिकता असून ती शरीराची नैसर्गिक क्रिया आहे, हे मनात पक्क करणे गरजेचे आहे. आजच्या धावपळीच्या काळात पुरुषांच्या बरोबरीने स्वत:ला सिद्ध करायचे असेल तर मासिक पाळीच्या पलीकडे बघा, असे आवाहन मुख्यमंत्री देवेंद्र फडणवीस यांच्या पत्नी अमृता फडणवीस यांनी शालेय विद्यार्थिनींना केले.
अहिल्या फाऊंडेशन व जिल्हा परिषदेच्या सहकार्याने 'संकल्प स्त्रीत्वाच्या सन्मानाचा' हा कार्यक्रम कालिदास कलामंदिर येथे बुधवारी झाला. यावेळी जिल्ह्यातील १ हजार ६४ शाळांमधील दीड लाख मुलींना एकाचवेळी दहा लाख सॅनिटरी नॅपकिन वाटून जागतिक विक्रम करण्यात आला. वंडर बुक ऑफ रेकॉर्डमध्ये या विक्रमाची नोंद करण्यात आली आहे. माजी आमदार जयंत जाधव यांच्या संकल्पनेतून हा उपक्रम राबविण्यात आला. याप्रसंगी फडणवीस म्हणाल्या, की इतिहासात डोकावून पाहिल्यास मासिक पाळी आलेल्या मुलीची पूजा केली जात असे. तिला नवीन कपडे घेतले जात असते. तिला शारीरिक स्वच्छतेविषयी मार्गदर्शन केले जात असे. त्यामुळे ही लाजिरवाणी बाब कधीच नव्हती. आज जागतिक स्तरावर होणाऱ्या विविध स्पर्धा, खेळ यातून मेडल्स आणणाऱ्यांमध्ये मुलींचे प्रमाण अधिक आहे. कारण त्या मासिक पाळीत अडकून न पडता त्यातून बाहेर पडल्या आहेत. महिला सक्षमीकरण खऱ्या अर्थाने करायचे असेल, तर सुदृढ आरोग्यावर लक्ष केंद्रीत करा, असेही त्या विद्यार्थिनींना उद्देशून म्हणाल्या.
कार्यक्रमाचा प्रारंभ मोहिनी भुसे हिच्या संबळवादनाने झाला. किशोरवयीन मुलींमध्ये मासिक पाळीविषयी जनजागृती करण्याची गरज असल्याचे मत जिल्हा परिषदेच्या अध्यक्षा शीतल सांगळे यांनी प्रास्ताविक करताना सांगितले. तसेच जिल्ह्यातील या उपक्रमाची प्रेरणा राज्यातील इतर जिल्हेही घेतील, असा आशावाद व्यक्त केला. तर एमईटी कॉलेजच्या शेफाली भुजबळ यांनी समाजात मासिक पाळीविषयी असलेला संकुचित दृष्टीकोन बदलण्याची गरज व्यक्त केली.
उपाध्यक्षा नयना गावित, महापौर रंजना भानसी, आमदार देवयानी फरांदे, आमदार दीपिका चव्हाण, शेफाली भुजबळ, शांती राधाकृष्णन्, अर्चना मुंढे, डॉ. अनिला सावंत, अनिता भुसे, रोहिणी दराडे, जान्हवी जाधव, जयश्री गिते, वैशाली झनकर, आमी छेडा आदींची मंचावर उपस्थिती होती. माजी आमदार जाधव यांची कन्या सुप्रिया जाधव हिने 'दसऱ्यापूर्वीच आरोग्याचे सोनं लुटण्याचा हा दिवस आहे', अशी भावना व्यक्त करत या उपक्रमाबाबत अभिमान व्यक्त केला. केटीएचएम कॉलेज, व्ही. एन. नाईक कॉलेज व एसएमआरके कॉलेज यांना व्हेंडिंग मशिन भेट देण्यात आले. तसेच शासकीय माध्यमिक कन्या विद्यालय, सारडा कन्या विद्यालय, आदर्श माध्यमिक विद्यालय, वाय. डी. बिटको, आण्णासाहेब वैशंपायन माध्यमिक विद्यालयाच्या विद्यार्थिनींना प्रातिनिधीक स्वरुपात सॅनिटरी नॅपकिन्सचे वाटप करण्यात आले.
चित्र बदलण्याची गरज
देशातील ८० टक्के स्त्रिया आजही पाळीच्या काळात सॅनिटरी नॅपकिन्सचा वापर न करता कापड वापरतात. यामुळे आरोग्याच्या अनेक तक्रारी उद्भवतात. आजपासून प्रत्येक मुलीने आत्मविश्वासाने सॅनिटरी नॅपकिन्स खरेदी करावेत. या नॅपकिन्सचे दर कमी झाले आहेत, ते अजून कमी करण्याचे व देशभरातील अधिकाधिक महिलांनी त्याचा वापर करावा, याविषयी जनजागृती करण्याचे सरकारचे ध्येय असल्याचे फडणवीस यांनी यावेळी नमूद केले.
फोटो : पंकज चांडोले