म. टा. खास प्रतिनिधी, नाशिक भाभानगर येथील शंभर खाटांच्या महिला रुग्णालयामागील शुक्लकाष्ठ संपण्याची चिन्हे दिसत नाहीत. महिला रुग्णालय उभारण्याच्या मुद्यावर तक्रारदारांचे आक्षेप नोंदविण्यापूर्वीच महापालिकेने वार्षिक भाडेतत्त्वावर जागा देण्याचा ठराव संमत केल्याने याचिकाकर्त्यांनी पुन्हा उच्च न्यायालयात म्हणणे मांडण्याासाठी अर्ज सादर केला आहे. याबाबतचा ठराव अंतिम झाला नसला, तरी त्याची अंमलबजावणी सुरू झाल्याने रुग्णालयाच्या उभारणीत पुन्हा कायदेशीर अडचण निर्माण होण्याची शक्यता आहे. राज्य सरकारने २००९ मध्ये महिलांसाठी शंभर खाटांचे रुग्णालय मंजूर केले असले, तरी जागेच्या निर्णयावरून रुग्णालयाचे काम अद्यापही सुरू झालेले नाही. सर्वप्रथम विभागीय संदर्भसेवा रुग्णालयाच्या जागेच्या आवारात रुग्णालय उभारण्याचा निर्णय घेण्यात आला होता. वृक्षतोड होणार असल्याने या जागेवरही न्यायालयाच्या आदेशाने काट मारण्यात आली. त्यानंतर वडाळा गाव, भाभानगर, टाकळीरोड आणि पुन्हा भाभानगर असा जागेचा प्रवास सुरू आहे. आमदार प्रा. देवयानी फरांदे यांनी सुचविलेल्या भाभानगर येथील दादासाहेब गायकवाड सभागृहाच्या आवारातील जागेच्या पर्यायाला माजी आमदार वसंत गिते यांच्यासह स्थानिकांनी तीव्र विरोध केला आहे. जागेचा हा वाद थेट उच्च न्यायायलयासह मुख्यमंत्र्यांपर्यंत पोहोचला. मुख्यमंत्र्यांनी आमदार फरांदेंच्या बाजूने निकाल दिला. मात्र, तरीही वाद सुरूच राहिला. महिला रुग्णालयाच्या जागेवरून आजी-माजी आमदारांमध्ये शीतयुद्ध सुरू झाल्याच्या पार्श्वभूमीवर महापालिकेने गायकवाड सभागृहाच्या आवारातील जागा देण्याचा निर्णय घेतला. वार्षिक शंभर रुपये भाडेतत्त्वावर तीस वर्षांसाठी जागा देण्याचा ठराव गेल्या आठवड्यात स्थायी समितीने मंजूर केला. ज्येष्ठ नागरिक संघाचे प्रकाश क्षीरसागर यांनी उच्च न्यायालयात दाखल याचिकेवर न्यायालयाने महापालिकेकडे आक्षेप नोंदविण्यास सांगितले. त्यानुसार महापालिकेकडे आक्षेप दाखल करण्यात आले आहेत. परंतु, या आक्षेपांवर सुनावणी होण्यापूर्वीच स्थायी समितीने केलेल्या ठरावावर याचिकाकर्त्यांनी आक्षेप घेतला आहे. त्यामुळे न्यायालयाचा आदेश पाळला जात नसल्याबद्दल संबंधितांनी पुन्हा उच्च न्यायालयात धाव घेतली असून, अर्ज दाखल केल्याची माहिती याचिकाकर्त्याचे वकील अॅड. संदीप शिंदे यांनी दिली. -- याचिकाकर्त्यांचे आक्षेप... महापालिकेकडे सादर करण्यात आलेल्या आक्षेपावरून रुग्णालयाच्या अडचणी वाढण्याची शक्यता आहे. नियमानुसार रुग्णालयाच्या शंभर मीटर आवारात नो सायलेन्स झोन असावा लागतो. दादासाहेब गायकवाड सांस्कृतिक सभागृह असल्याने तेथे वर्षभरात अनेक कार्यक्रम होत असल्याने नो सायलेन्स झोनचा भंग होणार आहे. विकास आराखड्यात पंधरा मीटर रुंद रस्ता दाखविण्यात आला असला, तरी प्रत्यक्षात दहा मीटर रस्ता उपलब्ध आहे. त्याशिवाय दुसऱ्या बाजूने नंदिनी (नासर्डी) नदीचे पात्र असल्याने रस्ता पूररेषेत येतो. सभागृह व रुग्णालयाचे पार्किंग सामुदायिक दर्शविण्यात आल्याने ते नियमात बसत नाही, असे याचिकाकर्त्यांचे आक्षेप आहेत.
मोबाइल अॅप डाउनलोड करा आणि राहा अपडेट