नाट्यलेखक दत्ता पाटील यांची १५ वर्षांनंतर एंट्री म. टा. खास प्रतिनिधी, नाशिक यंदाची राज्य नाट्य स्पर्धा अनेक अर्थांनी वेगळी ठरणार असून सलग ५० वर्षे नाटक देणारे नेताजी भोईर यंदा हयात नाही; परंतु त्यांची मुलगी नंदा रायते यांनी दादांचे नाटक दिग्दर्शित केले असून ते सादर होणार आहे. तर तब्बल १५ वर्षांनी नाट्यलेखक दत्ता पाटील राज्य नाट्यमध्ये सहभागी होणार आहेत. ज्येष्ठ रंगकर्मी नेताजी भोईर यांची नाट्य कारकीर्द नाशिककरांना माहीत आहे. राज्य नाट्य स्पर्धेत प्रत्येक वर्षी त्यांनी नवे नाटक स्पर्धेला दिले असून गेल्याच वर्षी त्याचा सुवर्णमहोत्सव झाला. मध्यंतरी ९ मे २०१८ रोजी नेताजी भोईर यांचे निधन झाले, त्यामुळे राज्य नाट्य स्पर्धेत त्यांच्या नाटकाची एंट्री राहणार का, असा चर्चेचा विषय झाला होता. परंतु, राज्य नाट्य स्पर्धेची नुकतीच अंतिम यादी जाहीर झाली आणि त्यात विजय नाट्य मंडळातर्फे नाटक असे झळकल्याने या चर्चेला पूर्णविराम मिळाला. नेताजी भोईर यांची मुलगी नंदा रायते यांनी दादांची उणीव भरून काढली असून हा वारसा त्यांनी पुढे सुरू ठेवला आहे. विजय नाट्य मंडळाचे ३ डिसेंबर रोजी 'व्हईल ते दणक्यातच' या नाटकाचे दिग्दर्शन नंदा रायते करणार असून लेखन नेताजी भोईर यांनी केले आहे. यंदाच्या राज्य नाट्य स्पर्धेचे आणखी एक वैशिष्ट्य म्हणजे सुप्रसिद्ध नाट्यलेखक दत्ता पाटील यांनी तब्बल १५ वर्षांनी राज्य नाट्य स्पर्धेत सहभाग घेतला आहे. त्यांनी राज्य नाट्य साठी शेवटचे नाटक २००३ ला लिहिले होते. त्यानंतर आता २०१८ मध्ये त्यांनी 'विसर्जन' हे नाटक राज्य नाट्यसाठी दिले आहे. विश्वास ज्ञान प्रबोधिनी अॅण्ड रिसर्च तर्फे ५ डिसेंबर रोजी 'विसर्जन' हे नाटक सादर होणार आहे. त्याचे दिग्दर्शन सचिन शिंदे यांनी केले आहे. मी दादांची इच्छा पूर्ण करतेय. दादांची इच्छा होती की ५१ वे नाटक सादर करावे. ते तर मला म्हणाले होते, की दिग्दर्शन तूच करावे. मी तुला शिकवलेय, आता तू मला शिकव. त्यामुळे या नाटकाचे दिग्दर्शन मी करतेय. दादांचा वारसा वरुणने उचललाय. - नंदा रायते, नेताजी भोईरांची कन्या मी याला स्पर्धा मानत नाही तर हा नाशिककरांचा महोत्सव आहे, आपल्याला सर्वांनाच नाटक मोठे करायचे आहे, सर्वांच्या सोबतीने ते करायचे आहे असे मी मानतो. पंधरा वर्षांनी हे नाटक स्पर्धेसाठी देतोय, सचिनचा आग्रह होता, प्रायोगिक रंगभूमीला एक नवे नाटक मिळते आहे. त्यामुळे मी तयार झालो. २००३ ला 'खेळिया' नाटक करून मी थांबलो होतो, आता 'विसर्जन' नाटक केले आहे. - दत्ता पाटील, सुप्रसिध्द नाट्यलेखक लोगो : कल्चर वार्ता
मोबाइल अॅप डाउनलोड करा आणि राहा अपडेट
