म. टा. प्रतिनिधी, नाशिक
तीव्र इच्छाशक्ती, मेहनत घेण्याची तयारी कोणत्याही आव्हानांचा सामना करू शकते, याचे उदाहरण म्हणजे सागर वसंत बोडके. जन्मत: ७५ टक्के अंधत्व असूनही गिर्यारोहणाच्या आवडीमुळे गड, शिखर पादाक्रांत करत अंगी असलेली जिद्द यशापर्यंत पोहोचवतेच हे त्याने सिद्ध केले आहे. राष्ट्रीय पातळीवर अंधाच्या स्पर्धांमध्ये ॲथलेटिक्स या क्रीडा प्रकारातही त्याने विशेष प्राविण्य मिळविले आहे.
इगतपुरीतील मोडाळे येथील सागरला जन्मत:च अंधाराचा सामना करावा लागला. या आव्हानावर मात करणेही तो शिकला. त्यामुळे शिक्षण, नोकरी, छंद या सर्वांमध्येच तो त्याचे कर्तृत्व सिद्ध करतो आहे. दहावीत ८२.६० टक्के गुण प्राप्त करत सागर विशेष प्राविण्यासह उत्तीर्ण झाला. त्यानंतर उच्च शिक्षणासाठी लागणाऱ्या आर्थिक पाठबळाचा प्रश्न त्याच्यापुढे आ वासून उभा होता. हातमजुरी करणाऱ्या आई-वडिलांनाही त्यामुळे सागरच्या शिक्षणाची चिंता सतावत होती. मात्र, समाज कल्याण विभागाच्या शासकीय वसतिगृहाचा आधार त्याला मिळाल्याने त्याची निवास व भोजनाची चिंता मिटली. त्यामुळे अभ्यास, गिर्यारोहण यात तो यश मिळवू शकला. गिर्यारोहणात असा कोणता गड कोट नाही की, सागरने तो पादाक्रांत केलेला नाही. कळसूबाई शिखर ४ वेळा सर करणारा पहिला अंध तरुण म्हणून त्याने विक्रम प्रस्थापित केला आहे. त्याने याच प्रावीण्याच्या बळावर वर्षभरापूर्वी मुंबई महापालिकेत नोकरीही मिळविली. त्यामुळे सागरला नवा सन्मानही प्राप्त झाला. त्याच्या कर्तृत्वाची दखल घेत अनेक संस्थांनी त्याचा पुरस्कारांनी सन्मान केला आहे.
\Bहे गड, किल्ले केले पादाक्रांत\B
हरिहर गड, सुधागड, रायगड, विश्रामगड, रामशेज, गाळणा, अडकिल्ले, दुर्गाभांडार, पाबरगड किल्ला, किल्ले हतगड, बळवंतगड, चोल्हेरे, मालेगावचा भूईकोट, अंकाई-टंकाई, दुन्धागड, पिसोळगड, किल्ला मुल्लेर, अजमिरा, दातेगड, खांदेरी, उंदेरी, जलदुर्ग, पद्मदुर्ग, कोलाराई, सायन पोर्ट, मुंबई, खैराई, शहगड, पेमगिरी, माणिकपुंज, खोजाभुइकोट, तोरणगड (पुणे), कंकराळा (मालेगाव) आदी किल्ले सागरने लिलाया सर केले आहेत.
आई-वडिल, शिक्षक, प्रशिक्षक तसेच काही सेवाभावी संस्था यांचा माझ्या यशात मोठा वाटा आहे. माझ्यातील कलागुणांना खरी उभारी देण्याचे काम समाज कल्याण विभागाच्या शासकीय वसतिगृहाने केले आहे. वसतिगृहाचे गृहप्रमुख सुभाष फड यांनी वेळोवेळी मार्गदर्शन केले. धीर व आधार दिला यामुळेच मी यश मिळवू शकलो.
- सागर बोडके
लोगो : लुई ब्रेल जयंती विशेष