मनपा आयुक्त गमे यांचे प्रतिपादन ….. म. टा. प्रतिनिधी, नाशिक नाशिक नगरीचे केवळ धार्मिक महत्त्व नसून, सांस्कृतिक महत्त्वदेखील तितकेच महत्त्वाचे आहे. महानगरीत कला संचलनालयाच्या वतीने प्रख्यात चित्रकार आनंद सोनार यांचा कालिदास कलामंदिरात सन्मान होतो आहे, हा मी नाशिक महापालिकेचा बहुमान समजतो, असे प्रतिपादन नाशिक महापालिकेचे आयुक्त राधाकृष्ण गमे यांनी केले. महाराष्ट्र राज्य कलाप्रदर्शनाच्या विद्यार्थी विभागाचे उद्घाटन व पुरस्कार वितरण समारंभावेळी ते बोलत होते. कालिदास कलामंदिरात बुधवारी हा सोहळा पार पडला. यावेळी नाशिकमधील ज्येष्ठ चित्रकार आनंद सोनार यांचा महाराष्ट्र शासनाच्या वतीने राधाकृष्ण गमे यांच्या हस्ते सन्मान करण्यात आला. शाल, श्रीफळ, स्मृतीचिन्ह, पन्नास हजार रुपयांचा धनादेश व मानपत्र असे पुरस्काराचे स्वरूप होते. यावेळी आयुक्त गमे म्हणाले की, नाशिक ही संतांची भूमी आहे. त्याचप्रमाणे चित्रकार, गीतकार यांचीदेखील भूमी आहे. सत्काराला उत्तर देताना आनंद सोनार म्हणाले, की प्रत्येक कलाकाराने कामात सातत्य ठेवणे गरजेचे आहे. कामात सातत्य ठेवले तर सन्मान आपोआप तुमच्याजवळ येतो. वा. गो. कुलकर्णी यांच्यासारखे गुरू लाभल्याने कलेची सेवा करता आली. सुरुवातीला जहांगीर आर्ट गॅलरीत प्रदर्शन भरविण्यासाठी पैसे नसल्याने मित्रांनी पैसे जमा करून प्रदर्शन भरवले, त्यांचा मी ऋणी आहे. यावेळी कला संचलनालयाचे संचालक राजीव मिश्रा म्हणाले की, संतांच्या भूमीत हे प्रदर्शन आयोजित करताना आम्हाला आनंद होतो आहे. यावेळी त्यांनी शासनाने केलेल्या पुरस्काराच्या रकमेत वाढ केली असल्याचे सागून रक्कम जाहीर केली. ... लोकप्रतिनिधींनी फिरवली पाठ या कार्क्रमासाठी राज्यभरातून विद्यार्थी, शिक्षक आले असताना कार्यक्रमाचे प्रमुख पाहुणे म्हणून शालेय शिक्षणमंत्री विनोद तावडे उपस्थित रहाणार असे जाहीर करण्यात आले. मात्र त्यांनी या कार्यक्रमाकडे पाठ फिरवल्याने कलाकारांनी नाराजी व्यक्त केली. त्याचप्रमाणे महापौर रंजना भनसी, खासदार हेमंत गोडसे, विधानपरिषद सदस्य हेमंत टकले, आमदार बाळासाहेब सानप, सीमा हिरे, देवयानी फरांदे यादेखील अनुपस्थित होत्या.
मोबाइल अॅप डाउनलोड करा आणि राहा अपडेट
