- सायंकाळी ६ ते रात्री १२ ही वेळ सर्वांत धोकादायक
- सुमारे ५० टक्के अपघात आणि मृत्यू याच वेळेत
arvind.jadhav@timesgroup.com
Tweet: @ArvindJadhavMT
नाशिक : रस्ते अपघातांच्या दृष्टिकोनातून सायंकाळचे ६ ते रात्री १२ या वेळेत सर्वाधिक अपघात झाले असून, मृत्युमुखी पडणाऱ्यांची संख्याही ४१ टक्क्यांच्या घरात पोहोचली आहे. सायंकाळी सहा ते रात्री नऊ या वेळेत सर्वाधिक वर्दळ असते.
नाशिक शहरात २०१८ मध्ये जीवघेणे, गंभीर, किरकोळ असे एकूण ५८१ रस्ते अपघात झाले. यात २१७ व्यक्ती मृत्युमुखी पडले, तर ३९६ व्यक्ती गंभीर जखमी झाल्या. तब्बल ४३ टक्के अपघात सायंकाळी ६ ते रात्री १२ या अवघ्या सहा तासांत झाले आहेत. याच कालावधीत एकूण रस्ते अपघातातील बळींपैकी ४१ टक्के मृत्यू झाले. हे अपघात कमी करण्यात यश मिळाले, तर शहरातील मृत्युमुखी पडणाऱ्यांची संख्या आपोआप कमी होऊ शकते.
याबाबत बोलताना पोलिस आयुक्त डॉ. रवींद्रकुमार सिंगल यांनी सांगितले, की रस्ते अपघात होतात ही मोठी समस्या आहे. शहरात वर्षाकाठी ३५ ते ४० हत्या होतात. यानंतर बरीच ओरडदेखील होते. याउलट रस्ते अपघातांमध्ये दोनशेपेक्षा अधिक जणांचा मृत्यू होतो, याचा विचार होणे अपेक्षित आहे. सायंकाळी ६ ते रात्री ९ ही वेळ महत्त्वाची असते. दिवसभराचे काम आटोपून नागरिक घराकडे परततात, तर बरेच घराबाहेर पडतात. याच वेळी काळोख पसरतो. वाहनांचा स्पीड, वाहतूक नियमांकडे दुर्लक्ष अशा नियमांकडे दुर्लक्ष केले जाते. अशा वेळी भरधाव वाहनासमोर अचानक पादचारी आला किंवा कुत्रे आडवे आले की अपघात होतात. बहुतांश पादचारी याच वेळेत मृत्युमुखी पडले आहेत. रात्री ९ ते १२ या दरम्यान होणाऱ्या अपघातांमागे बहुतांश मद्यपी वाहनचालक असतात. यानंतर ओव्हरस्पीड हेसुद्धा कारण आहे. याबाबत सातत्याने कारवाई होते. प्रबोधनसुद्धा होत असते. वाहनचालकांनी, त्यांच्या कुटुंबीयांनी याकडे गांभीर्याने पाहायला हवे. हेल्मेटचा वापर नसल्याने ८० टक्के दुचाकीचालकांचा मृत्यू होतो, हे सर्वांनी समजून घेतल्यास रस्ते अपघातांचे प्रमाण कमी होऊ शकते, असे पोलिस आयुक्त सिंगल यांनी स्पष्ट केले.
वेळ- जीवघेणे अपघात- एकूण अपघात- मृत्यू - गंभीर जखमी- वेळेनुसार मृत्यूची टक्केवारी
स. ६ ते ९- १९- ६२- १९- ५२- ८.७५
स. ९ ते दु. १२- १९- ७२- १९- ६१-८.७५
दु. १२ ते ३- २१- ७१- २२- ५१- १०.१३
दु. ३ ते सायं. ६- २५- ७४- २६- ५६- ११.९८
सायं. ६ ते रा. ९- ४९-१२०- ५३- ६७- २४.४२
रा. ९ ते १२-४३- १०५- ४५- ६३- २०.७३
रा. १२ ते ३- २५- ४९- २५- २८- ११.५२
प. ३ ते ६- ८- २८- ८- १८- ३.६८
एकूण- २०९- ५८१-२१७-३९६-१०० टक्के