दर्जाहीन मशीन मारले माथी; एक कोटीची फसवणूक
म. टा. खास प्रतिनिधी, नाशिक
कंपनीत आवश्यक असणारे एसक्युएफ मशीन तयार करून देण्याच्या बदल्यात एक कोटी तीन लाख एक हजार ५६२ रुपये घेऊन निकृष्ट दर्जाचे मशीन देऊन नाशिकच्या उद्योजकाची फसवणूक करण्यात आल्याचे समोर आले आहे. या प्रकरणी मुंबईस्थित नऊ जणांविरूद्ध अंबड पोलिस ठाण्यात गुन्हा दाखल करण्यात आला. पॉवेल वॅरेझेकोस्की, स्लावोमिर वॉझनियाक, कांची वरदैय्या, मिलिंद कुलकर्णी, हरिष खट्टर, रॉअर्ट सेनोस्की, प्रशांत रॉय, नितीन कुमार पांडे, हेमंत खाचणे (सर्व रा. महापे औद्योगिक वसाहत, मुंबई) अशी संशयितांची नावे आहेत. नाशिकच्या अंबड औद्योगिक वसाहतीतील विनीत प्रकाश पोळ यांनी तक्रार दाखल केली आहे. त्यानुसार पोळ यांना त्यांच्या कंपनीत आवश्यक असलेली एसक्यूएफ मशीनची आवश्यकता होती. ८ एप्रिल २०१५ रोजी या मशीनचे उत्पादन करून देतो, असे आश्वासन देऊन संशयितांनी पोळ यांच्याकडून वेळोवेळी पैसे घेतले. मार्च महिन्यांमध्ये त्यांनी मशीन सुद्धा दिले. परंतु, पोळ यांच्या कंपनीला अपेक्षित असलेले डिझाइन देण्यात आले नाही. तसेच, संबंधित मशीन निकृष्ट पद्धतीने तयार केले. त्या मशीनवर पोळ काहीच काम करू शकले नाहीत. आपली फसवणूक झाल्याचे समोर आल्याने फिर्यादीने अंबड पोलिस ठाणे गाठून विश्वासघात
फसवणूक झाल्याची तक्रार दाखल केली. त्यानुसार संशयितांवर गुन्हा दाखल करण्यात आला.
तोतया पोलिसांनी वृद्धास लुटले
शहरात पुन्हा एकदा तोतया पोलिस सक्रीय झाले असून, त्यांनी वृद्धांना लक्ष्य केले आहे. पोलिस असल्याची बतावणी करीत दोघांनी वृद्धाच्या अंगावरील दागिने काढून घेत त्यांना लुटल्याची घटना शनिवारी (दि. ६) सकाळी म्हसरूळ परिसरात घडली. प्रल्हाद सुकलाल राठोड (६५, रा. चाणक्यपुरी सोसायटी, मखमलाबाद लिंकरोड) यांनी तक्रार दिली. राठोड हे शनिवारी सकाळी किशोर सूर्यवंशीमार्गावरील सप्तशृंगी देवीच्या मंदिरासामोरून जात असताना काळ्या रंगाच्या दुचाकीवरून आलेल्या दोघांनी आपण पोलिस असल्याची बतावणी करीत दागिने काढून ठेवा, अशी दमदाटी केली. तसेच, त्यांच्या गळातील सोन्याची चेन व अंगठी असे ६५ हजाराचे दागिने घेऊन पळून गेले. ही बाब निदर्शनास येताच राठोड यांनी म्हसरूळ पोलिस ठाण्यात धाव घेतली. त्यांच्या तक्रारीनुसार लुटीचा गुन्हा दाखल करण्यात आला आहे.
--
एटीएम बदलले, ४१ हजारांवर डल्ला
पासवर्ड निर्माण करण्यासाठी मदत करण्याच्या बहाण्याने पासवर्ड माहिती करून घेत एटीएम कार्डची बदली करून वृद्धाची ४१ हजार २७८ रुपयांची रोकड लंपास करण्यात आली. ही घटना जिल्हाधिकारी कार्यालय आवारातील स्टेटबँक एटीएम परिसरात घडली. विजय उगडू मेतकर (रा. दुर्गानगर कामठवाडे) यांनी तक्रार दिली. २१ मार्च रोजी ते जिल्हाधिकारी कार्यालय परिसरातील भारतीय स्टेट बँकेत नवीन एटीएम कार्ड सुरू करण्यासाठी गेले होते. नवीन कार्डचा पासवर्ड तयार करण्यासाठी मदत करण्याच्या बहाण्याने
संशयिताने त्यांचा पासवर्ड माहिती करून घेतला. तसेच, हातचलाखीने कार्ड बदलून घेतले. यानंतर विविध ठिकाणांवरून त्यांच्या बँक खात्यातील ४१ हजार २७८ रुपयांची रक्कम काढून घेतली. सरकारवाडा पोलिसठाण्यात गुन्हा दाखल करण्यात आला आहे.
मोबाइल हिसकावला
मोबाइलवर बोलत रस्त्याने पायी जाणाऱ्या व्यक्तीच्या हातातील १५ हजार रुपयांचा मोबाईल दुचाकीवरील तिघा चोरट्यांनी हिसकावून धूम ठोकली. ही घटना भद्रकालीतील पिंपळचौक परिसरात शुक्रवारी (दि. ५) रात्री घडली. अश्विनकुमार नंदकिशोर शौचे (४१, रा. दिंडोरीरोड, पंचवटी) यांनी तक्रार दिली. शुक्रवारी रात्री ते आठ वाजेच्या सुमारास मेनरोडकडून पिंपळपार चौक परिसरात जात असताना पाठीमागून एका दुचाकीवर आलेल्या तीन भामट्यांनी त्यांच्या हातातील १५ हजार रुपयांचा मोबाइल हिसकावून पळ काढला. या प्रकरणी भद्रकाली पोलिस ठाण्यात गुन्हा दाखल करण्यात आला आहे.
