नाशिकमधून हेमंत गोडसे, तर दिंडोरीतून डॉ. भारती पवार यांचे उमेदवारी अर्ज दाखल
...
म. टा. खास प्रतिनिधी, नाशिक
शिवसेना, भाजप, रिपाइं व रासप महायुतीचे नाशिकमधील उमेदवार हेमंत गोडसे आणि दिंडोरीच्या उमेदवार डॉ. भारती पवार यांनी सोमवारी जोरदार शक्तिप्रदर्शन करीत उमेदवारी अर्ज दाखल केले. 'शिवसेना-भाजप महायुतीचा विजय असो', 'जय भवानी, जय शिवाजी' अशा घोषणा देत ढोल-ताशांच्या गजरात जल्लोषात मिरवणूक काढली. भाजप-सेनेच्या स्थानिक पदाधिकाऱ्यांच्या मनोमिलनाचेही दर्शन या निमित्ताने घडून आले. महायुतीच्या या शक्तिप्रदर्शनाने परिसर भगवेमय बनला होता.
उमेदवारी अर्ज भरण्याच्या निमित्ताने महायुतीने मिरवणुकीद्वारे आपली ताकद दाखविण्याचा प्रयत्न केला. शालिमार येथील शिवसेनेच्या मध्यवर्ती कार्यालयात छत्रपती शिवाजी महाराज, डॉ. बाबासाहेब आंबेडकर यांच्या प्रतिमेस तसेच, बी. डी. भालेकर शाळेलगतच्या अण्णा भाऊ साठे यांच्या पुर्णाकृती पुतळ्यास उमेदवारांच्या हस्ते पुष्पहार अर्पण करून मिरवणुकीला प्रारंभ करण्यात आला. मिरवणुकीत सहभागी झालेल्या हजारो युतीच्या कार्यकर्त्यांनी हाती उंचावून धरलेले धनुष्यबाण आणि कमळाचे चिन्ह लक्ष वेधून घेत होते. रणरणत्या उन्हाची तमा न बाळगता मोठ्या संख्येने आबालवृद्ध, महिला या मिरवणुकीत सहभागी झाले होत्या. हाती भगवा डौलाने फडकत कार्यकर्ते युतीच्या उमेदवाराच्या विजयाच्या घोषणा देत पुढे सरकत होते. बी. डी. भालेकर मैदानावरून निघालेली ही मिरवणूक अण्णा भाऊ साठे पुतळा, बी. डी. भालेकर शाळेसमोरून गंजमाळ सिग्नलमार्गे दूधबाजार, भद्रकाली मार्केट, संत गाडगे महाराज चौक, मेनरोड, वंदे मातरम चौक, रविवार कारंजा, रेडक्रॉस सिग्नल, एम. जी. रोड, मेहर सिग्नलमार्गे, जिल्हाधिकारी कार्यालयावर पोहोचली. भव्य मिरवणुकीमुळे अवघा परिसरच भगवा झाला होता. घोषणांनी परिसर दुमदुमून गेला होता.
मिरवणुकीनंतर महायुतीच्या प्रमुख नेत्यांच्या उपस्थितीत गोडसे यांनी जिल्हाधिकारी तथा जिल्हा निवडणूक निर्णय अधिकारी सूरज मांढरे, तर डॉ. पवार यांनी अप्पर जिल्हाधिकारी नीलेश सागर यांना उमेदवारी अर्ज सादर केले.
....
दिग्गजांची हजेरी
मिरवणुकीच्या अग्रभागी सजवलेल्या रथावर उमेदवार गोडसे, डॉ. भारती यांच्यासह पालकमंत्री गिरीश महाजन, खासदार संजय राऊत, ग्रामविकास राज्यमंत्री दादा भुसे यांच्यासह शिवसेनेचे जिल्हा संपर्कप्रमुख भाऊसाहेब चौधरी, उपनेते बबन घोलप, जिल्हाप्रमुख विजय करंजकर, महापौर रंजना भानसी, जि. प. अध्यक्ष शीतल सांगळे, जिल्हा बॅँक अध्यक्ष केदा आहेर, भाजप शहराध्यक्ष बाळासाहेब सानप, प्रदेश चिटणीस लक्ष्मण सावजी, आमदार देवयानी फरांदे, अनिल कदम, सीमा हिरे, राजाभाऊ वाजे, राहुल आहेर, योगेश घोलप, मनपा विरोधी पक्षनेते अजय बोरस्ते, गटनेते विलास शिंदे, सुधाकर बडगुजर, विनायक पांडे, महानगरप्रमुख सचिन मराठे, महेश बडवे, प्रथमेश गिते, दिनकर पाटील, शिवाजी चुंभळे आदी उपस्थित होते.
...
डमी मोदीने वेधले लक्ष
महायुतीच्या उमेदवारांच्या शक्तिप्रदर्शन मिरवणुकीत नरेंद्र मोदींची हुबेहूब छबी असलेल्या विकास महंते हा कलाकारही सहभागी झाला होता. खासदार गोडसे व डॉ. भारती पवार यांच्यासोबत मिरवणूक चित्ररथावर असलेल्या महंतेनेही मोदींसारखेच हातवारे आणि शब्दफेकी केल्याने ही मिरवणूक लक्षवेधी ठरली. मिरवणूक मार्गावर ते सर्वांनाच अभिवादन करीत होते. त्यामुळे कार्यकर्त्यांना जोश चढला होत, तर दुसरीकहे सर्वसामान्य मतदार कुतूहलाने बघत होते.
...
एकीचे घडविले दर्शन
शक्तिप्रदर्शनात शिवसेना-भाजपच्या नेत्यांमधील एकीचे दर्शनही दिसून आले. महापालिकेतील भाजप-सेनेचे नगरसेवक, जिल्हा परिषदेतील सदस्यासंह नगरपालिका ते ग्रामपंचायतीतील सदस्यही मोठ्या संख्येने उपस्थित होते. दरम्यान, या शक्तिप्रदर्शनाकडे रिपाइंच्या कार्यकर्त्यांची उपस्थिती असली, तरी प्रमुख नेत्यांनी पाठ फिरवली.
....
पाच वर्षांच्या संधीचे सोने केले आहे. मतदारसंघासाठी अनेक प्रकल्प आणून मार्गी लावले आहेत. त्यामुळे मतदारांचा वाढता प्रतिसाद पाहता मतदारसंघाच्या विकासासाठी पुढच्या पाच वर्षांसाठी सुद्धा जनतेकडून मलाच संधी दिली जाणार आहे.
- हेमंत गोडसे, शिवसेना उमेदवार
..
दिंडोरी मतदारसंघात शेती, शिक्षण, आरोग्य क्षेत्रावर काम करण्यासाठी मतदारांनी मला संधी दिली पाहिजे. मतदारसंघाचा अनुषेश भरून काढण्यासाठी निवडणूक लढवत आहे. जिल्हा परिषदेच्या माध्यमातून काम करण्याचा अनुभव असून, द्राक्ष निर्यात आणि आदिवासींच्या विकासाला प्राधान्य देणार आहे.
- डॉ. भारती पवार, भाजप उमेदवार