म. टा. प्रतिनिधी, नाशिक
वैद्यकीय शिक्षण घेणाऱ्या विद्यार्थ्यांचे क्रीडा क्षेत्रातही योगदान रहावे, त्यांच्यातील क्रीडा गुणांना वाव मिळावा यासाठी महाराष्ट्र आरोग्य विज्ञान विद्यापीठाने क्रीडा शिष्यवृत्ती देण्याचा निर्णय घेतला आहे. विद्यापीठाचा २०१५-१६ साठीचा अर्थसंकल्प आणि सोळावा वार्षिक अहवाल मंगळवारी मंजूर करण्यात आला.
विद्यापीठाचा गेल्या वर्षाचा अर्थसंकल्प १४२ कोटी रुपयांचा होता. या अर्थसंकल्पात यंदा लक्षणीय वाढ झाली असून, तो यंदा २२५ कोटींचा आहे. विद्यापीठाचे एकत्रित उत्पन्न २२५.१४ कोटी रुपये अपेक्षित आहे. तर, खर्च २२८.६६ कोटी तर वित्तीय तूट ३.५२ कोटी रुपये अपेक्षित आहे. अर्थसंकल्प बैठकीला कुलगुरु डॉ. अरुण जामकर, प्रतिकुलगुरु डॉ. शेखर राजदेरकर, कुलसचिव डॉ. काशिनाथ गर्कळ उपस्थित होते. डॉ. गजानन एकबोटे यांनी अर्थसंकल्प सादर केला. विद्यापीठाचा पंधरावा वार्षिक अहवाल सदस्य डॉ. विठ्ठल धडके यांनी सादर केला. विद्यापीठाचे कुलसचिव डॉ. काशिनाथ गर्कळ यांनी सभेचे संचलन केले.
हे नवीन कोर्सेस सुरू होणार
शिक्षकांना वैद्यकीय शिक्षणात तज्ज्ञ करण्यासाठी ३ ते ५ वर्षांचा मास्टर इन हेल्थ प्रोफेशन एज्युकेशन हा कोर्स सुरू करण्यासाठी (१० लाख), जनुकीय आजारांबद्दल लोकांमध्ये जनजागृती करण्यासाठी जेनेटिक कौन्सेलिंग हा १ वर्षांचा कोर्स सुरू करण्यासाठी (५ लाख), वैद्यकीय अधिकारी यांच्यासाठी अॅडव्हान्स डिप्लोमा इन हॉस्पिटल मॅनेजमेंट हा एक वर्षाचा अभ्यासक्रम करण्यासाठी (५ लाख).
मेक इन इंडियासाठी
वैद्यकीय व्यवसायासाठी आवश्यक असलेली यंत्रसामग्री भारतातच निर्माण व्हावी तसेच आधुनिक यंत्रसामग्रीचा शोध लावण्यासाठी (२५ लाख), वैद्यकीय उपचार व उपचारांसाठी आवश्यक असलेली उपकरणे व साधनांची निर्मिती करण्यासाठी (१० लाख) तरतूद करण्यात आली आहे.
अर्थसंकल्पातील विविध तरतुदी
क्रीडा शिष्यवृत्तीसाठी (२५ लाख), सर्वसमावेशक नवीन संशोधनासाठी (५० लाख), शिक्षकांसाठी कॉम्प्युटरद्वारे कार्यक्रम सुरु करण्यासाठी (५ लाख), गुन्हेगारी प्रवृत्तीच्या व्यक्तींची जनुकीय माहिती गोळा करण्यासाठी डीएनए बँकिंग (१० लाख), रक्तपेशी कमी झाल्यामुळे अॅनेमिया होऊन शरीराची वाढ खुंटते. त्यावर संशोधन करण्यासाठी (५० लाख), कुपोषण असलेल्या भागात आयुर्वेद व अॅलोपॅथी उपचार पध्दतीची माहिती देण्यासाठीच्या त्रिवेणी कार्यक्रमासाठी (५ लाख), आयुष संशोन लॅब तयार करण्यासाठी (१५ लाख), स्वतंत्र मआविवि पंचकर्म केंद्राची स्थापना करण्यासाठी (२० लाख), युनेस्को जैव नीतिशास्त्र केंद्राची स्थापना करण्यासाठी (१० लाख), विद्यापीठ परिसरात सांडपाणी प्रक्रिया प्रकल्पासाठी (५० लाख), ऐरोली येथे इनक्युबेशन सेंटर स्थापण्यासाठी (५ कोटी) दिले जाणार आहेत.
विद्यार्थ्यांच्या विविध कल्याणकारी योजनांसाठी (२ कोटी १५ लाख), विद्यार्थ्यांना राज्यस्तरीय क्रीडा स्पर्धांमध्ये सहभाग घेण्याकरीता विद्यापीठाचे क्रिडा संकूल बांधण्यासाठी (२५ लाख), विद्यार्थ्यांना व्यवसाय मार्गदर्शन देण्यासाठी (६ लाख), मानसिक समुपदेशनासाठी (६ लाख), रॅगिंगला प्रतिबंधात्मक उपाययोजनेसाठी (३ लाख) कुंभमेळ्यात आपत्कालीन प्रशिक्षणासाठी (७० लाख), ग्रामीण भागातील लोकांमध्ये आरोग्य व स्वच्छतेबाबत जनजागृतीसाठी विद्यापीठामार्फत राबविण्यात येणाऱ्या ग्राम दत्तक योजनेसाठी (२५ लाख), आंतर संस्थात्मक सर्वसमावेशक संशोधन केंद्रांतर्फे विविध संस्थांना एकत्रित करुन संशोधनाची माहिती समाजातील विविध घटकांना देण्यासाठी (५० लाख), विद्यापीठाला नॅकचा दर्जा मिळविण्यासाठी (२५ लाख), विद्यापीठ व संस्था दोघांच्या व्यवस्थापनाने प्र्रायोगिक तत्वावर होमिओपॅथी कॉलेज सुरु करण्यासाठी (२५ लाख), शिक्षक व विद्यार्थी यांना फेलोशीप देण्यासाठी (१ कोटी ५० लाख), शिक्षकांना संशोधनास प्रोत्साहन देण्यासाठी प्रवास खर्च व परदेश दौऱ्यासाठी (१० लाख) तरतूद करण्यात आली आहे.
मोबाइल अॅप डाउनलोड करा आणि राहा अपडेट