किशोर वडनेरे, लासलगाव
लासलगाव, पिंपळगाव, येवला, निफाडसह जिल्ह्यातील प्रमुख बाजार समित्यांमध्ये गुरुवारी लाल कांद्याच्या दरात जोरदार घसरण झाली. या भाव घसरणीचे तीव्र पडसाद निफाड उपबाजार आवारावर पहावयास मिळाले आहेत. गेल्या सप्ताहात पंधराशे रुपयांच्या आसपास असणारे लाल कांद्याचे दर गुरुवारी दोनशे ते अडीचशे रुपयांनी घसरल्याने निफाड उपबाजार आवारावर संतप्त शेतकऱ्यांनी लिलावाचे कामकाज बंद पडले होते.
व्यापारी बाजारभाव कमी पुकारत असल्याचा आरोप करत लासलगाव बाजार समितीच्या निफाड उपबाजार आवारावर कांदा उत्पादकांनी लिलावाचे कामकाज सुमारे तासभर रोखून धरले. त्यामुळे येथे एकच गोंधळ निर्माण झाला होता. अखेर लासलगाव बाजार समितीचे संचालक शिवाजी ढेपले यांनी संतप्त शेतकऱ्यांची समजूत काढल्याने तासाभराने लिलावाचे कामकाज सुरळीत झाले. एकीकडे अवकाळी पाऊस व गारपिटीचा सामना करत असतांना जो काही लाल कांदा हाताशी आला आहे तोही आता कमी भावाने विकावा लागत असल्याने शेतकऱ्यांच्या चिंतेत मात्र वाढ होताना दिसत आहे. उन्हाळ कांद्याच्या तुलनेत लाल कांद्याची टिकवण क्षमता कमी असल्याने व त्यातच अवकाळी
पाऊस व गारपिटीने कांद्याची प्रतवारी खराब होण्याच्या भीतीने शेतकऱ्यांना मिळेल त्या भावात कांदा विक्री करणे भाग पडत आहे. त्यामुळे जिल्ह्यातील सर्वच बाजार समित्यांमध्ये शेतकरी कांदा विक्रीसाठी गर्दी करतांना दिसत आहे. सध्या सर्वच प्रमुख बाजार समित्यांमध्ये लाल कांद्याच्या अावकेची विक्रमी नोंद होत आहे. परिणामी आवक वाढल्याने मागणी कमी व पुरवठा अधिक होत असल्याने बाजार भावात घसरण होत आहे. दरम्यान निफाड उपबाजार आवारावर लाल कांद्याचे किमान बाजारभाव ३०० कमाल १ हजार १४१ तर सरासरी भाव ८०० रुपये राहिले.
मोबाइल अॅप डाउनलोड करा आणि राहा अपडेट