म. टा. वृत्तसेवा, येवला
राज्य शासनाच्या सामाजिक न्याय विशेष सहाय्य विभागाच्या वतीने चालविण्यात येत असलेल्या येवला तालुक्यातील बाभूळगाव येथील अनुसूचित जाती व नवबौध्द मुलांच्या निवासी शाळेतील ८३ विद्यार्थ्यांना मंगळवारी सकाळी अन्नातून विषबाधा झाल्याचा प्रकार घडला. सकाळचा नाश्ता केल्यानंतर अकराच्या सुमारास शाळेत दाखल झालेल्या विद्यार्थ्यांना मळमळ, चक्कर अन् उलट्या होऊ लागल्याने सर्वांचीच धावपळ उडाली. दुपारी या विद्यार्थ्यांना उपचारासाठी येवला ग्रामीण रुग्णालयात दाखल करण्यात आले. विद्यार्थ्यांची प्रकृती स्थिर असून, काही विद्यार्थ्यांना उपचारानंतर डिस्‍चार्ज देण्यात आला.
बाभूळगाव येथे राज्य शासनाच्या सामाजिक न्याय विभागाच्या वतीने मागसवर्गीय मुलांची निवासी शाळा आहे. दिमाखदार इमारत असलेल्या या वसतिगृह अन् शाळेत सहावी ते दहावीपर्यंत शाळा आहे. या निवासी शाळेत इयत्ता सहावीचे ३४, सातवीचे ३७, आठवीचे ४६ तर नववीचे २७ अशी पटसंख्या आहे. दहावीची परीक्षा नुकतीच संपल्याने विद्यार्थी आपापल्या घरी गेले आहेत. या निवासी शाळेतील विद्यार्थ्यांना सकाळी साडेआठला नाश्ता तर दुपारी १ वाजता जेवण दिले जाते. ठेका देऊन खासगी मेसद्वारे विद्यार्थ्यांना नाश्ता अन् जेवण दिले जाते. सध्या पोपट जगन्नाथ खरे या खासगी ठेकेदरामार्फत हे जेवण अन् नाश्ता पुरविण्यात येतो. मंगळवारी सकाळी साडेआठला मुलांना पोहे व दूध दिले गेले. त्यानंतर विद्यार्थी नेहमीप्रमाणे सकाळी निवासी शाळेत गेले खरे मात्र, त्यांना अकरा ते साडेअकराच्या दरम्यान अचानक मळमळ, चक्कर येऊ लागतांना काहींना पोटात दुखायला सुरुवात झाली. उलट्या सुरू झाल्या. या प्रकाराने सर्वच हादरून गेले. मुख्याध्यापक रामनाथ होंडे व शिक्षकांनी प्राथमिक उपचार म्हणून विद्यार्थ्यांना डायझीनच्या गोळया दिल्या. मात्र त्याचा काहीही परिणाम झाला नाही. दरम्यानच्या काळात काही विद्यार्थ्यांनी दुपारचे जेवण घेतले. दुपारी दीडच्या सुमारास विद्यार्थ्यांना अधिकच त्रास होऊ लागल्याने मुख्याध्यापक होंडे, गृहपाल प्रदीप पाटील, लिपिक सुधीर कराळे आदी शिक्षकांनी रिक्षा बोलावून मुलांना येवला शहरातील ग्रामीण रुग्णालयात आणले.
येवला ग्रामीण रुग्णालयात या विद्यार्थ्यांना आणल्यानंतर वैद्यकीय अधीक्षक डॉ. एस. डी. सदावर्ते यांच्यासह वैद्यकीय अधिकारी डॉ. पंकज पाटील, डॉ. प्रशांत जुन्नरे, डॉ. जितेंद्र पवार, डॉ. स्मिता सोनवणे तसेच खासगी बालरोग तज्ञ डॉ. श्रीकांत भडांगे आदींनी उपचार केले. सर्व विद्यार्थ्यांची प्रकृती नियंत्रणाखाली असल्याचे त्यांनी स्पष्ट केले. तहसीलदार शरद मंडलिक, गटविकास अधिकारी सुनील अहिरे, पंचायत समिती माजी सभापती संभाजी पवार, सभापती प्रकाश वाघ, रवि काळे, पंचायत समिती सदस्य दिलीप मेंगळ यांनी तत्काळ येवला ग्रामीण रुग्णालयाकडे धाव घेत विद्यार्थ्यांच्या प्रकृतीची चौकशी केली. तसेच, ग्रामीण रुग्णालयाच्या डॉक्टरांशी चर्चा करीत अधिक उपचाराबाबत सूचना केल्या.
येवला ग्रामीण रुग्णालयात आणण्यात आलेल्या विद्यार्थ्यांना चक्कर, उलट्या, मळमळ होताना काहींना जुलाब होत होते. अनेक विद्यार्थ्यांना ताप देखील आला होता. येवला ग्रामीण रुग्णालयात आणलेल्या ८३ विद्यार्थ्यांशिवाय निवासी शाळेतील इतर विद्यार्थ्यांवर देखरेख ठेवण्यासाठी पाटोदा, सावरगाव प्राथमिक आरोग्य केंद्रातील डॉक्टर, नर्स अन् आरोग्यसेवक यांचे पथकही हजर झाले होते. प्रभारी तालुका वैद्यकीय अधिकारी डॉ. सुरेश कांबळे, तसेच पाटोदा प्राथमिक आरोग्य केंद्रातील वैद्यकीय अधिकारी डॉ. मिलिंद पारिक आदी येथे लक्ष ठेवून होते.
सकाळी ११ वाजताच मुलांना त्रास होत होता, तर दुपारचे दोन वाजेपर्यंत काय केले. यातून हा प्रकार दडपण्याचे प्रयत्न केले जात होते काय अशी शंका निर्माण होते. याबाबत सखोल चौकशी करून घटनेची जबाबदारी कोणाची हे ठरवून दोषींना शिक्षा व्हावी. तसेच, दूध व पोहे यांच्या तपासणीबरोबर विद्यार्थांचे रक्त व लघवीचे नमुने तपासावे. या आहाराबाबत जो कोणी ठेकेदार असेल त्याच्यावर कारवाई व्हावी.
- संभाजी पवार, माजी सभापती, पंचायत समिती येवला
दाखल सर्व विद्यार्थी रुग्णांवर तत्काळ योग्य ते उपचार करण्यात आले असून, त्यांच्या प्रकृतीला कोणताही धोका नाही. सर्व डॉक्टर लक्ष ठेवून असून, ग्रामीण रुग्णालयात आवश्यक तो औषधसाठा उपलब्ध आहे. विषबाधा कशातून झाली हे आताच सांगता येणार नाही. मुलांचे रक्त अन् झालेल्या उलट्या यांचे नमुने घेण्यात आले असून, ते नाशिक येथील प्रयोगशाळेत तपसणीसाठी पाठविण्यात येतील. तपासणी रिपोर्टनंतरच विषबाधेचे कारण स्पष्ट होईल.
- डॉ. एस. डी. सदावर्ते, वैद्यकीय अधीक्षक, येवला ग्रामीण रुग्णालय
सर्वांची उडाली धांदल
येवला शहरातील ग्रामीण रुग्णालयात अचानक तब्बल ६० च्या वर दाखल करण्यात आलेले विद्यार्थी रुग्ण बघता सर्वांचीच धांदल उडाली. ग्रामीण रुग्णालयाची सध्याची ३० खाटांची संख्या बघता कक्ष भरले गेल्याने रिकाम्या कक्षात खाली सतरंजी टाकत अन् इकडून तिकडे दोरी बांधत त्या दोरीला सलाईन लटकवत उपचार करावे लागले. मात्र, रुग्णालयातील डॉक्टर व परिचारिकांनी न डगमगता मोठी धावपळ करीत तत्काळ उपचार केले.
मोबाइल अॅप डाउनलोड करा आणि राहा अपडेट
