म. टा. प्रतिनिधी, सातपूर
नाशिक शहरात सिंहस्थामुळे रस्त्यांचे डांबरीकरणाचे काम सुरू आहे. काही रस्त्यांचे काम अंतिम टप्यात असताना दुसरीकडे डांबरीकरण केलेले रस्ते खोदण्याचे प्रकार सुरू आहेत. डांबरीकरणानंतर रस्ता खोदण्याचे कारण काय, असा सवाल वाहनचालक उपस्थित करीत आहेत. याकडे महापालिकेचे मात्र दुर्लक्ष होत आहे.
नाशिक महापालिकेने अनेक वर्षांनंतर शहरातील मुख्य रस्त्यांची कामे सुरू केली आहेत. असे असताना नव्याने सातपूरला पपया नर्सरी सर्कलवर तयार झालेला रस्ता एकाने वीज कनेक्शन घेण्यासाठी खोदला आहे. यामुळे खोदलेल्या ठिकाणी खड्डा पडल्याने तो वाहनचालकांना त्रासदायक ठरत आहे.
तसेच, सातपूर औद्योगिक वसाहतीत प्रवेश करताना महिंद्रा अॅण्ड महिंद्रा सर्कलवर देखील पाण्याच्या लाइनला लिकेज असल्याने नुकताच डांबरीकरण केलेला रस्ता खोदण्यात आला. काही दिवसांपूर्वी त्र्यंबकेश्वर रस्त्यावरील सिबल हॉटेलच्या समोर देखील डांबरीकरण केलेला रस्ता खोदण्यात आला. अशा प्रकारे नवीन रस्ता खोदताना महापालिकेची यंत्रणा करते काय, असा सवाल या निमित्ताने उपस्थित होत आहे. नुकतेच डांबरीकरण झालेले रस्ते खोदण्यासाठी परवानगी जर कुणी घेत नसतील, तर महापालिका प्रशासन त्यांच्यावर कारवाई का करीत नाही, असा सवाल वाहनचालकक उपस्थित करीत आहेत.
रस्ते खोदल्यानंतर तेथे लगेच तात्पुरत्या स्वरूपात मुरूम टाकून खड्डे बुजविले जात आहेत. यामुळे या जागांवर पुन्हा खड्डे पडण्याची शक्यता आहे. महापालिका प्रशासनाने याकडे लक्ष पुरवावे, अशी मागणी वाहनधारकांकडून केली जात आहे.
महापालिकेने अनेक वर्षांनंतर मुख्य रस्त्यांच्या रुंदीकरणासह डांबरीकरणास सुरुवात केली आहे. असे असताना डांबरीकरण झालेले रस्ते काही कारणास्तव खोदलेले दिसतात. यामुळे नव्यानेच डांबरीकरण झालेल्या रस्त्यांना पुन्हा खड्डे पडले आहेत. याकडे महापालिकेने लक्ष देण्याची गरज आहे.
- किरण निकुंभ, रहिवासी, सातपूर
मोबाइल अॅप डाउनलोड करा आणि राहा अपडेट
