नाशिकरोडला वाळूमाफियांचा प्रताप; चालक-मालकाविरुद्ध गुन्हा दाखल
म. टा. प्रतिनिधी, नाशिकरोड
वाळूची बेकायदा वाहतूक करणारा ट्रकचालक आणि मालकाने मंडल अधिकाऱ्यांना ठार मारण्याची धमकी देण्याची घटना नाशिकरोडला घडली. जिल्ह्यात बेकायदा वाळू वाहतूक करून सरकारचा लाखो रुपयांचा महसूल बुडवला जात आहे. याबद्दल `मटा`ने वृत्तमालिका प्रसिद्ध केल्यानंतर प्रशासनाने वाळूमाफियांवर कारवाई सुरू केली आहे.
देवळालीगावातील मंडल अधिकारी प्रवीण गौंडाळे, देवळालीचे तलाठी अन्ना लक्ष्मण डावरे, विहीतगावचे रमेश उगले, संसरीचे पांडुरंग गोतीसे व सहकारी बुधवारी (ता. २५) देवळाली मंडलमध्ये बेकायदा वाळू वाहतूक करणाऱ्या वाहनांची तपासणी करत होते. लहवित, बेलतगव्हाण शिवारातील सहा नंबर नाक्याजवळ सायंकाळी सातच्या सुमारास वाळूने भरलेला ट्रक (एमएच १५ सीके ५०६९) या पथकाला दिसला. पथकाने
तपासणी केली असता, त्यात प्रमाणापेक्षा जास्त वाळू भरलेली आढळली. चालक राधाकृष्ण आप्पासाहेब कोळपे (२०, रा. कोळपेवाडी, ता. कोपरगाव) व गाडी मालक रामा खंडू विंचू (रा. वडगाऴ, ता. सिन्नर) यांनी ही वाळू कोपरगावहून आणल्याचे व आपल्याकडे परवाना अथवा कागदपत्रे नसल्याचे सांगितले. गौंडाळे यांनी पंचनामा करुन ट्रक तहसील कार्यालयात जमा करण्यास सांगितले. दुर्गा उद्यानाजवळ ट्रक आला असता चालक कोळपेने तो थांबवला. मालक विंचूने साथीदारांना फोन करुन बोलावून घेतले. या सर्वांनी गौंडाळे यांच्याशी वाद घालून त्यांना ठार मारण्याची धमकी दिली. नंतर हा ट्रक नाशिकरोड पोलिस ठाण्यात आणण्यात आला.
सरकारी कामात अडथळा, गौण खनिज चोरी, सरकारी कर्मचाऱ्यांना जीवे मारण्याची धमकी दिल्याची तक्रार गौंडाळे यांनी कोळपे व विंचूविरुद्ध केली. त्यावरून गुन्हा दाखल झाला आहे.
मोबाइल अॅप डाउनलोड करा आणि राहा अपडेट