गोवंश हत्या बंदी कायद्याअंतर्गत गेल्या आठवड्यात मालेगाव येथे राज्यातील पहिला गुन्हा दाखल करण्यात आला. मात्र, अशी प्रकरणे यापुढील काळात समोर आल्यास कोणाच्या आणि कुठल्या जनावराला मारले गेले हेही उघड होईल. त्याची खबरदारी म्हणून माहिती किंवा संदर्भासाठी मालेगाव शहर व परिसरातील गायी म्हशींसह सर्व जनावरांचे फोटो सादर करण्याची सूचना मालेगाव पोलिसांनी केली आहे.
जनावरांचे फोटो जमा करण्याचा कुठलाही शासकीय आदेश नाही. मात्र, मालेगाव पोलिसांनी स्वतःहून खबरदारी म्हणून हे पाऊल उचलल्याचे पोलिस उपाधीक्षक महेश सवाई यांनी सांगितले. दरम्यान, जनावरांचे फोटो देण्याच्या सूचनेमुळे स्थानिक जनावरांच्या मालकांमध्ये आश्चर्य व्यक्त केले जात आहे. मालेगावात नक्की किती जनावरे आहेत आणि ती कोणती आहेत याची माहिती या प्रक्रियेतून पोलिसांच्या हाती येणार आहे. गुन्हा घडल्यास त्याचा तपास करण्यात पोलिसांना मदत होईल, असे सांगण्यात येत आहे.
गोवंश हत्या बंदी कायदा लागू झाल्यापासून सामाजिक वातावरण बिघडवण्यासाठी एखाद्या समाजकंटकाने मुद्दाम चुकीची माहिती दिल्यास जनावरांच्या माहितीच्या आधारे त्याला आळा घालता येईल. गैरप्रकारचा आरोप झाल्यास जनावरणाच्या फोटोमुळे तपासात मदत होईल. त्यामुळे पोलिसांबरोबर मनपातही आपल्या जनावरांची माहिती मालकांनी द्यावी, असे सवाई यांनी म्हटले आहे.
मोबाइल अॅप डाउनलोड करा आणि राहा अपडेट