ग्रामीण विकासाचे मॉडेल मानल जाणाऱ्या धुळे जिल्ह्यातील शिरपूर गावाला २०१४ ची मिस वर्ल्ड रोलेन स्ट्रॉसने बुधवारी भेट दिली. या गावातील जलसंधारण प्रकल्प, आदिवासी जीवन, महिला सबलीकरण तसेच विविध प्रकल्पांची तिने आवर्जून पाहणी केली आणि भारत भेट सार्थ ठरवली. टीव्हीच्या पडद्यावरची मिस वर्ल्ड गावात पाहून शिरपूरवासीय सुद्धा अवाक झाले होते.
मिस वर्ल्ड ऑर्गनायझेशनच्या चेअरवूमन ज्युलिया मोर्ले आणि मिस वर्ल्ड रोलेन स्ट्रॉस या ग्रामीण विकासाचे उदाहरण शोधत होत्या. याचदरम्यान त्यांना शिरपूर पॅटर्नची माहिती मिळाली. शिरपूरमध्ये जलसंधारणामुळे उंचावलेले जीवनमान आणि टेक्सटाईल उद्योगांमुळे झालेले महिला सबलीकरणाचे वृत्त ऐकून त्या प्रभावित झाल्या. त्यांनी लागलीच पहिला भारत दौरा म्हणून थेट शिरपूरची निवड केली. रोलेनने मंगळवार व बुधवार असे दोन दिवस दौरा केला. प्रो. रवी औंधे, चिंतन पटेल, तपन पटेल यांच्या पुढाकाराने ही मिसवर्ल्डची शिरपूर भेट आयोजित करण्यात आली होती.
शिरपूरमधील ८ ते १० टेक्सटाईल हब, जलसंधारण प्रकल्प, आश्रमशाळा, आदिवासी पाडे, शाळा-कॉलेज, हॉस्पिटल्सला रोलेनने भेटी दिल्या. आदिवासी महिलांशी संवाद साधत तिने त्यांची जीवनशैली जाणून घेण्याचा प्रयत्न केला. तसेच विद्यार्थ्यांशीही संवाद साधला.
रोलेन स्ट्रॉस म्हणाली, की मी भारतामध्ये पहिल्यांदाच आले आहे. शिरपूरमध्ये तयार करण्यात आलेला जलसंधारणाचा प्रोजेक्ट खूपच उत्तम आहे. आदिवासी जनतेला यामुळे किती लाभ झाला आहे हे आज मी माझ्या डोळ्यांनी पहिले. शेतातील पिके, पिण्यासाठी पाणी, शिक्षण या सर्वामध्ये त्यांनी प्रगती केल्याचे दिसून येत आहे. अमरीश पटेल यांच्या या प्रकल्पाचे उदाहरण घेऊन प्रत्येक देशाने याचा अवलंब करायला हवा.
ब्युटी फॉर द पर्पज
जलसंधारणाचा हा शिरपूर पॅटर्न जगभरासाठी उपयुक्त ठरणार आहे. आज अनेक देशांमध्ये पाण्याचे दुर्भिक्ष्य आहे. अशा देशांसाठी हा पॅटर्न महत्त्वाचा ठरेल. कारण धरणे बांधण्याच्या तुलनेत याची किंमत दहापट कमी आहे. त्यामुळेच याबाबत विविध देशांमध्ये याचा प्रसार करणार असल्याची माहिती मिस वर्ल्ड ऑर्गनायझेशनचे वर्ल्ड वाईल्ड इव्हेंटचे संचालक स्टीव्ह डग्लस यांनी पत्रकार परिषदेत दिली. ते ज्युलिया मोर्ले यांच्यावतीने बोलत होते.
खरे तर या भागातील लोकांची भाषा आणि माझी भाषा फारच वेगळी आहे. पण त्यांच्या डोळ्यातील प्रेमाची भाषा मला समजली. खूपच सुंदर कार्यक्रमांनी त्यांनी माझे स्वागत केले. महिलांशी संवाद साधल्यानंतर कापड उद्योगामुळे उपलब्ध झालेला रोजगार आणि आर्थिक स्वावलंबन याचीही मला जाणीव झाली. - रोलेन स्ट्रॉस, मिस वर्ल्ड
मोबाइल अॅप डाउनलोड करा आणि राहा अपडेट