टीम मटा
नाशिक जिल्ह्यात आज होणा-या ग्रामपंचायत निवडणुकीसाठी प्रशासकीय यंत्रणा सज्ज झाली आहे. निवडणूक कर्मचा-यांबरोबरच पोलिस बंदोबस्तही तैनात करण्यात आला आहे. कळवण तालुक्यातील २२ ग्रामपंचायतींसाठी आज मतदान होणार असून, २७१ उमेदवार रिंगणात आहेत. एकूण ५९ मतदान केंद्र असून २९५ अधिकारी व कर्मचारी आदी यंत्रणा सज्ज झाली आहे. ही माहिती निवडणूक निर्णय अधिकारी अनिल पुरे यांनी दिली.
तालुक्यातील नरूळ, ओतूर, भुसणी, मुळाणे वणी, ततानी, लिंगामे, वडाळे, जामले वणी, अभोणा कळमथे, सप्तशृंग गड, मोहनदरी, नांदुरी, पळसदर, मोहमुख, ओझर, सावकी पाळे, बिलवाडी, कुंडाणे, कठारे दिगर, कनाशी, गोसरानणे या ग्रामपंचायतीसाठी आज सकाळी साडेसात वाजता मतदानास सुरुवात होणार असून ५:३० वाजे पर्यंत सुरू राहणार आहे. एका मतदान केंद्रावर तीन मतदान अधिकारी, एक शिपाई, एक पोलिस असे एकूण पाच कर्मचारी राहणार आहेत. फिरते पथक, मतदान मशीनमध्ये काही तांत्रिक अडचण आली तर त्यासाठी ७ कर्मचारी राहणार आहेत. तसेच ओतूर, सप्तशृंग गड या संवेदनशील मतदान केंद्रावर विशेष पोलिस बंदोबस्त देण्यात येणार आहे. दोन पोलिस निरिक्षक, सहा सहाय्यक पोलिस निरिक्षक, शंभर पोलिस कर्मचारी तसेच ५३ होमगार्ड असा बंदोबस्त राहणार आहे.
मनमाडमध्ये ५२ ग्रा. प.
मनमाड : नांदगाव तालुक्यातील ५२ ग्रामपंचायतींसाठी मतदान होत असून, निवडणुकीची सर्व तयारी पूर्ण झाल्याची माहिती तहसीलदार सुदाम महाजन यांनी दिली. एकूण ५९ पैकी ७ ग्रामपंचायतींची निवडणूक बिनविरोध झाली असून, ५२ ग्रामपंचायतींसाठी मतदान होत आहे. १७९ मतदान केंद्रे असून, एक हजार दहा कर्मचारी आणि ३०० पोलिस निवडणूक कामांसाठी कार्यरत आहेत. तहसीलदार सुदाम महाजन यांच्या नियोजनाखाली ६१ निवडणूक निर्णय अधिकारी आणि १० झोनल अधिकारी निवडणूक कामकाजासाठी नेमण्यात आले आहेत. २५ मतदान केंद्रे संवेदनशील असल्याचे तहसीलदार महाजन यांनी सांगितले.
चांदवड सज्ज
चांदवड तालुक्यातील ५३ ग्रामपंचायतींपैकी १५ ग्रामपंचायतींची निवडणूक बिनविरोध झाली असून, बुधवारी ३८ ग्रामपंचायतींसाठी मतदान होत आहे. निवडणूक यंत्रणा सज्ज असल्याची माहिती तहसीलदार मनोज देशमुख यांनी दिली. ३८ ग्रामपंचायतींसाठी १२१ मतदान केंद्रावर मतदान होणार असून, सहाशे कर्मचारी तैनात करणयात आले आहेत. याशिवाय नायब तहसीलदार नितीन गर्जे यांच्यासह ३८ निवडणूक निर्णय अधिकारी, आठ झोनल अधिकारी कार्यरत आहेत, असे तहसीलदार महाजन यांनी सांगितले.
मालेगावात ८४ ग्रा. पं.
मालेगाव तालुक्यातील ९९ पैकी १५ ग्रामपंचायतींच्या निवडणुका बिनविरोध झाल्या असल्या तरी ८४ ग्रामपंचायत आणि एका पोटनिवडणूकसाठी आज मतदान होणार आहे. महिन्यापासून गावाकडील राजकारण चांगलेच तापले होते. मतदान यंत्रणादेखील मतदान प्रक्रिया शांततेत व सुरळीत पार पडावी यासाठी सज्ज झाली आहे . ८४ ग्रामपंचातींसाठी सुमारे एक हजार आठशे कर्मचारी तैनात करण्यात आले आहेत. विविध गावांच्या मतदान केंद्रांवर साहित्य नेण्यासाठी तहसील कार्यालयात गर्दी झाली होती. अक्षय तृतीयेसारखा सण असूनही सुट्टी मिळाली नसल्याने अनेक कर्मचारी नाराजी व्यक्त करीत होते. मात्र दुपारपर्यंत सर्वच मतदान केंद्राचे साहित्य वाटप करण्यात आले. तसेच या कर्मचाऱ्यांना सोडण्यासाठी २६ बसेस व ३० जीप गाड्यांची व्यवस्था करण्यात आली होती. मतदानाच्या दुसऱ्याच दिवशी म्हणजे २३ तारखेला येथील शिवाजी जिमखाना येथे सकाळी १० वाजल्यापासून मतमोजणी होणार असल्याची माहिती तहसीलदार दीपक पाटील यांनी दिली.
सटाण्यात तयारी पूर्ण
बागलाण तालुक्यातील सुमारे ३० ग्रामपंचायतीच्या सार्वत्रिक निवडणुका आज बुधवार (दि. २२) होत असून सहा ठिकाणी पोटनिवडणुका होत आहेत. या निवडणुकांसाठी सुमारे ५०० कर्मचारी तैनात करण्यात आले असून, पोलिस बंदोबस्त ठेवण्यात आला आहे. ही माहिती निवडणूक निर्णय अधिकारी तथा बागलाणचे तहसीलदार अश्विनीकुमार पोतदार यांनी दिली. तालुक्यातील अत्यंत महत्त्वपूर्ण असलेल्या लखमापूर, नामपूर, खमताणे, ब्राह्मणगाव, मोराणे सांडस, नवी शेमळी, जुनी शेमळी, ठेगोंडा, कऱ्हे आदी ठिकाणी चुरशीच्या लढाई होत आहेत. तालुक्यातील राजकारणात अत्यंत संवेदनशील असलेल्या या ठिकाणी ग्रामपंचायती निवडणुकांमुळे वातावरण ढवळून निघाले आहे.
मोबाइल अॅप डाउनलोड करा आणि राहा अपडेट