५४ पैकी निम्म्या ग्रामपंचायतींमध्ये सत्तांतर
म. टा. वृत्तसेवा, येवला
येवला तालुक्यातील प्रस्थापित नेतृत्वाला मतदारांनी सपशेल नाकारत नव्या चेहऱ्यांच्या हाती गावाची राजकारणाचे सूत्रे सोपविल्याचे चित्र दिसून आले आहे. ५४ ग्रामपंचायतींपैकी निम्म्या ठिकाणी सत्तांतर झाले असून, या गावांना नवे नेतृत्व भेटले आहे. अंगणगाव, विखरणी, अंदरसूल, पाटोदा, नगरसूल येथील निकालाने भल्याभल्यांचे अंदाज फोल ठरविले.
अवघ्या अर्ध्या तासातच पहिला निकाल हाती आला. तालुक्याच्या राजकारणातील मातब्बर समजले जाणारे मराठा विद्या प्रसारकचे येवला सदस्य अंबादास बनकर यांच्या पॅनलचा अंगणगावमध्ये धुव्वा उडवला गेला. येथे त्यांचा मुलगा संजय बनकर यांना सदस्यपद कायम राखता आले असले तरी प्रतिस्पर्धी विठ्ठलराव आठशेरे यांच्या पॅनलने सात जागांवर विजय मिळवत सत्ता हस्तगत केली. या निकालाची तालुक्यात जोरदार चर्चा सुरू असून, अण्णा पर्व संपल्याचे जाहीररित्या बोलले जात आहे.
हाणामाऱ्यांमुळे जिल्हाभर चर्चेत आलेल्या नगरसूल या सर्वांत मोठ्या ग्रामपंचायतीमध्ये प्रमोद पाटील यांच्या नेतृत्वाखालील सदगुरु पॅनलने ११ जागांवर विजय मिळवत सत्ता आपल्या ताब्यात ठेवली. तर राष्ट्रवादीचे नेते सुनील पैठणकर, सुभाष निकम यांच्या नगरसूल विकास आघाडीला केवळ ६ जागांवर समाधान मानावे लागले. येथे सर्व नेते विरुध्द प्रमोद पाटील असा लक्षवेधी सामना रंगला होता. यात पाटील यांनी बाजी मारली. विशेष म्हणजे दोन वार्डात उभे असलेले सुनील पैठणकर तसेच सुभाष निकम यांच्या पत्नी पराभूत झाल्या आहेत.
याउलट पाटील यांचे पुत्र प्रसाद व भावजय मंदाकिनी हे दोघेही विजयी झाले. वादावादी झालेल्या राजापूर येथे पंचायत समिती सदस्य पोपट आव्हाड, प्रमोद बोडखे, संपतराव वाघ, कैलास मुंढे यांनी सत्ता खेचून आणत ७ जागांवर विजय मिळवला. तर सत्ताधारी परसराम दराडे, रामभाऊ केदार यांना ६ जागा मिळाल्या. आजच्या निकालात आव्हाड यांच्या पॅनलला पाचच, तर दराडेंना सहा जागांवर विजय मिळाला. मात्र, आव्हाड यांच्या दोन जागा अगोदरच बिनविरोध झाल्या असल्याने त्यांनी सत्ता खेचून आणली.
तालुक्यातील सर्वांत मोठी बाजारपेठ असलेल्या अंदरसुल येथे भाऊबंदकीच्या लढाईत राष्ट्रवादीचे युवानेते मकरंद सोनवणे यांच्यासमोर माजी जि. प. अध्यक्ष राधाकिसन सोनवणे, शिवाजी वडाळकर, किसनराव धनगे, हरिभाऊ जगताप आदी नेत्यांनी एकत्रित येऊन आव्हान उभे केले होते. परंतु, मकरंद सोनवणे सर्वांना भारी पडत सत्ता आपल्या ताब्यात ठेवण्यात यशस्वी झाले. त्यांच्या जनहित पॅनलला दहा, तर प्रतिस्पर्धी जनशक्ती पॅनलला सात जागा मिळाल्या. शिवसेनेचे तालुकाप्रमुख झुंजार देशमुख यांच्या पत्नीचा पराभव चर्चेचा ठरला आहे.
पाटोदा येथील निकालही राष्ट्रवादीच्या नेत्यांना झोंबणारा ठरला आहे. येथे जिल्हा परिषदेचे माजी अर्थ व बांधकाम सभापती निवृत्ती पाटील बोरणारे यांचे मतदानाचे आदल्या दिवशी निधन झाले. मतदारांनी त्यांच्या रामेश्वर ग्रामविकास पॅनलला एकतर्फी बहुमत देत आदरांजली वाहिली. येथे पंचायत समिती सदस्य रतन बोरणारे, अशोक मेंगाणे, पुंडलिक पाचपुते यांच्या नेतृत्वाखाली १३ जागा रामेश्वर पॅनलला भेटल्या आहेत, तर राष्ट्रवादीचे माजी जि. प. सदस्य बाळासाहेब पिंपरकर, साहेबराव आहेर, अण्णा दौंडे, यांच्या जनसेवा पॅनलला केवळ तीन जागांवर समाधान मानावे लागले. विशेष म्हणजे येथे पिंपरकर पती पत्नी दोन्हीही पराभूत झाले.
साताळी येथे अर्जुन कोकाटे यांना मतदारांनी साफ नाकारले. त्यांना त्यांच्याच भाचेजावयांनी असमान दाखवले. कोकाटे यांच्या पॅनलला अवघ्या २ जागा मिळाल्या, तर गोरख काळे, कैलास टिळे यांच्या पॅनलला ५ जागांवर विजय मिळाला.
विखरणी येथे राष्ट्रवादी युवक काँग्रेसचे तालुकाध्यक्ष मोहन शेलार यांनी ९ पैकी ८ जागांवर विजय मिळवत सत्ता कायम राखली. विरोधी गटाचे नेतृत्व करणारे ज्येष्ठ नेते विठ्ठलराव शेलार यांचा मुलगा रवींद्र व स्नुषा सविता हे दोघेही पराभूत झाले आहेत. अंगुलगाव येथे जि.प सदस्य प्रविण गायकवाड यांच्या शेतकरी विकास पॅनलला ६ जागांवर विजय मिळाला, तर विरोधी जनसेवा पॅनलला तीन जागा मिळाल्या.
कोटमगाव (विठ्ठलाचे) येथे बाजार समिती संचालक शरद लहरे, नाना लहरे, बाबासो कोटमे यांच्या जगदंबा जनशक्ती विकास पॅनलने ६ जागावर विजय मिळवीत सत्ता हस्तगत केली. जनविकास पॅनलला फक्त एका जागेवर विजय मिळवता आला. पारेगाव येथे सचिन आहेर, बाळकृष्ण पोटे यांच्या जनविकास पॅनलने नऊपैकी नऊ जागांवर विजय मिळवत सत्तांतर घडवले.
२५ वर्षांनंतर परिवर्तन
तालुक्यातील रहाडी ग्रामपंचायतीमध्ये परिवर्तन पॅनलने इतिहास घड़वत २५ वर्षे सत्ताधारी असलेल्या पॅनलचा धुव्वा उडवला आहे. नऊपैकी सात जागी परिवर्तन पनलचे उमेदवार निवडून आले आहेत. या पॅनलमधील सर्व सदस्य प्रथमच निवडून आले असून, सत्ताधारी पॅनलमधील दिग्गज उमेदवारांचा पराभव झाला आहे. पराभूतांमध्ये राष्ट्रवादी कॉग्रेसचे तालुका उपाध्यक्ष सखाहरी गायवकवाड यांचा समावेश आहे. परिवर्तन पॅनलचे नेतृत्व भागवत सोनवणे, बाबुभाई दिलावर शेख, हुसेन अब्बास शेख, बाबू अब्दुल शेख, जनार्दन गायकवाड, श्रावण मोरे यांनी केले.
मोबाइल अॅप डाउनलोड करा आणि राहा अपडेट
